Read efik 1 ŊWED CORINTH 14 Bible Online

1 ŊWED CORINTH 14 - efik bible

1 ŊWED CORINTH 14

¹EBINE ima; enyuŋ eyom enɔ eke spirit ye ofuri esit mbufo, edi eyom ekan ndisiak uduak Abasi.

²Koro owo eke esemde usem itiŋke inɔ owo, edi etiŋ ɔnɔ Abasi; koro baba owo kiet ikopke, edi enye etiŋ ndibe-ndibe ikɔ ke spirit esie.

³Edi owo eke asiakde uduak Abasi etiŋ se inamde owo ɔkɔri ke ifiɔk, ye se isɔŋɔde owo esit, ye se inɔde owo idɔŋesit.

⁴Owo eke esemde usem anam idem esie ɔkɔri ke ifiɔk; edi owo eke asiakde uduak Abasi anam ufɔk Abasi ɔkɔri ke ifiɔk.

⁵Mmama mbufo kpukpru esem usem, edi ɔdɔŋ mi akan ete mbufo ekpesiak uduak Abasi. Koro asiak-uduak-Abasi akan owo eke esemde usem, ibɔhɔke esem-usem akabare se enye etiŋde, man anam ufɔk Abasi ɔkɔri ke ifiɔk.

⁶Edi nte edide ke emi, Nditɔ-ete, edieke ndide ke ɔtɔ mbufo nsem usem, nso udori ke nda nsɔk mbufo, adaŋa nte mmenemeke ŋkpɔ ye mbufo ke usuŋ eriyarare, mme ke usuŋ ifiɔk, mme ke usuŋ erisiak-uduak Abasi, mme ke usuŋ erikpep-ŋkpɔ?

⁷Ŋkɔm kpa mme ŋkpɔ eke minyeneke uwem, nte ifiom ye ndido-uruk eke esiorode uyo, edieke mmɔ misinke ukpuhɔre ke uyom eke mmɔ enamde, owo edinam didie ɔfiɔk se efride ke ifiom mme se ebrede ke ndido-uruk?

⁸Koro edieke obukpoŋ osiorode uyo eke owo midiɔŋɔke se ɔwɔrɔde, anie editim idem ebeŋe ekɔŋ?

⁹Ntre ŋko, edieke mbufo midaha edeme mbufo isem usem eke ememde owo idem ndikop, edisaŋa didie efiɔk se mbufo etiŋde?

¹⁰Koro mbufo eŋwaŋa ikɔ mbufo eduɔk ke ofim. Ŋkɔm usem ewak oruk eti-eti ke ererimbot, kpukpru mmɔ kiet kiet enyuŋ enyene se mmɔ ewɔrɔde.

¹¹Ntre edieke mme-ndfiɔŋɔke se ikɔ eke owo etiŋde ɔwɔrɔde, nyedi esen owo ke enyin anditiŋ, anditiŋ eyenyuŋ edi esen owo ke enyin mi.

¹²Mmɔdo ndien, sia ɔsɔŋɔde ɔdɔŋ mbufo edinyene enɔ eke spirit, eyom uwak enɔ eke spirit emi edinamde ufɔk Abasi ɔkɔri ke ifiɔk.

¹³Yak owo eke esemde usem ndien ebeŋe ete, imɔ idikeme ndikabare se itiŋde.

¹⁴Koro edieke mbɔŋde akam ke usem, edi spirit mi ke ɔbɔŋ akam; edi ekikere esit mi isioŋoke mfri.

¹⁵Ɔwɔrɔ didie ndien? Nyebɔŋ akam ke spirit, nyenyuŋ mbɔŋ akam ke ekikere esit mi; nyekwɔ itoro ke spirit, nyenyuŋ ŋkwɔ itoro ke ekikere esit mi.

¹⁶Koro edieke afo otorode Abasi ke spirit, owo eke mimeheke ye usem edinam didie ibɔrɔ ite Amen idian ye ekɔm fo, sia enye mifiɔkke se afo ɔdɔhɔde?

¹⁷Ke akpanikɔ afo ototim ɔnɔ ekɔm, edi owo efen isioho ifiɔk ke esit ikɔri.

¹⁸Mmɔkɔm Abasi koro mmesem usem ŋkan mbufo kpukpru;

¹⁹edi ke ufɔk Abasi mkpakam nda ekikere esit mi ntiŋ ikɔ ition ŋkpep mmɔ eŋwen ŋkpɔ, ŋkan nditiŋ thousand ikɔ duop ke esen usem.

²⁰Nditɔ-ete mi, ekudi nditɔwɔŋ ke ekikere, edi ke erinam ibak etie nte nsek nditɔ; edi ke ekikere etie nte ikpɔ owo.

²¹Ke ŋwed ibet ewet ntem ete, Jehovah ɔdɔhɔ ete, Nyeda mmɔ emi esemde esen usem ye mkpɔk-inua isen owo ntiŋ ŋkpɔ ye mbio emi; edi kpa ke ini nnamde ntem, mmɔ idikopke uyo Mi.

²²Ntem ke enim ete erisem usem edi idiɔŋɔ, inaŋa inɔ mmɔ emi enimde ke akpanikɔ, edi ana ɔnɔ mmɔ emi minimke ke akpanikɔ. Edi erisiak-uduak-Abasi ana ɔnɔ mmɔ emi enimde ke akpanikɔ, inaŋa inɔ mmɔ emi minimke ke akpanikɔ.

²³Mmɔdo kini ofuri ufɔk Abasi obonode, edieke kpukpru owo esemde usem, mmɔ emi mimeheke ye usem ye mmɔ emi minimke ke akpanikɔ enyuŋ edukke edi, nte mmɔ ididɔhɔke ite, ibuot abiara mbufo?

²⁴Edi edieke kpukpru mbufo esiakde uduak-Abasi, ndien owo emi minimke ke akpanikɔ minyuŋ ifiɔkke ŋkpɔ oduk edi, ikɔ mbufo kpukpru eyeyarare idem esie owut enye, onyuŋ odomo enye;

²⁵ndibe ŋkpɔ eke edude enye ke esit ewɔrɔ ke aŋwa; ntem ke enye eyeduɔ okibi iso esie ke isɔŋ, onyuŋ atuak ibuot ɔnɔ Abasi, onyime aŋwa-aŋwa ete Abasi odu ke otu mbufo ke akpanikɔ.

²⁶Didie ke mbufo ekpenam ŋkpɔ ndien, nditɔ-ete? Ke adaŋemi mbufo ebonode, owo kiet ye psalm, enye eken ye ukpep-ŋkpɔ, owo emi ye ikɔ eriyarare, enye oko ye usem, enye eken nde ye ukeme erikabare usem; ke erinam kpukpru, eyom ŋkɔri ufɔk Abasi.

²⁷Ama edi mme esem usem, yak edi owo iba, mme owo ita ke ŋwak-ŋkan, esem usem ke esop kiet; mmɔ enyuŋ etiŋ ke iduɔk ke iduɔk; owo onyuŋ akabare se mmɔ etiŋde.

²⁸Edi edieke akabare-usem miduhe ɔfɔn esem-usem okibi inua etie suŋ-ŋ ke ufɔk Abasi, onyuŋ eneme nneme ye idem esie ye Abasi.

²⁹Ama edi mme asiak-uduak-Abasi, owo iba mme ita etiŋ ikɔ, mmɔ eken enyuŋ ekere se mmɔ etiŋde.

³⁰Edieke eyararede ŋkpɔ enɔ owo efen emi etiede tie, yak akpan anditiŋ odop uyo.

³¹Mbufo kpukpru emekeme ndisiak uduak-Abasi ke iduɔk ke iduɔk, man kpukpru owo ebɔ ukpep-ŋkpɔ, enyuŋ ekop ndɔŋ-esit;

³²ndien spirit mme asiak-uduak-Abasi esine ke idak erikara mme asiak-uduak-Abasi.

³³Koro Abasi idige Abasi ndutime, edi edi Abasi emem; nte ido edide ke kpukpru mme ufɔk mbon Abasi.

³⁴Yak iban edop uyo etie suŋ ke ufɔk Abasi; koro iyakke mmɔ etiŋ ikɔ; mmɔ enyene ndidu ke nsuk-idem, nte ibet etemede.

³⁵Edieke ɔdɔŋde mmɔ ndikpep ŋkpɔ ekededi, yak mmɔ ebup ebe mmɔ ke ufɔk: koro ɔwɔrɔ esuene ŋwan nditiŋ ikɔ ke ufɔk Abasi.

³⁶Mme eyom ndineni nte ikɔ Abasi okoto mbufo ɔwɔrɔ osim mmɔ eŋwen? Mme ndi mbufo ikpɔŋ ke ikɔ Abasi okosim?

³⁷Edieke owo abatde idem ete idi asiak-uduak-Abasi inyuŋ inyene spirit, yak enye ɔfiɔk ete se ŋwetde nnɔ esɔk mbufo edi uyo Ɔbɔŋ.

³⁸Edieke owo mfiɔkke uyo Ɔbɔŋ yak enye amana etre ndifiɔk.

³⁹Mmɔdo nditɔ-ete, eyom ndisiak uduak-Abasi ke ofuri esit mbufo, ekunyuŋ ebiɔŋɔ owo ndisem usem;

⁴⁰edi enam kpukpru ŋkpɔ ke nde ye ke ido nte eyede.