Read efik 1 ŊWED CORINTH 15 Bible Online

1 ŊWED CORINTH 15 - efik bible

1 ŊWED CORINTH 15

¹NDITƆ-ETE mi, mmanam mbufo efiɔk gospel oro ŋkɔkwɔrɔde nnɔ mbufo, emi mbufo ekenyuŋ ebɔde, enyuŋ esɔŋɔde eda ke esit;

²emi enyuŋ edade enye enyaŋa mbufo, adaŋa nte mbufo esɔŋɔde emum nte ŋkɔkwɔrɔde enye ekama, ibɔhɔke mbuɔtidem mbufo ama ɔwɔrɔ ikpikpu.

³Koro mma mmen se ŋkɔbɔde nyak nnɔ mbufo ke akpaitie, nte, Christ ama akpa abaŋa mme idiɔk-ŋkpɔ nnyin, nte asaŋade ekekem ye se ŋwed Abasi ɔdɔhɔde; enyuŋ ebuk Enye;

⁴enyuŋ enam Enye eset ke mkpa ke ɔyɔhɔ usen ita, nte asaŋade ekekem ye se ŋwed Abasi ɔdɔhɔde:

⁵Enye onyuŋ ayarare idem owut Cephas; ekem owut mbet Esie duopeba;

⁶Ekem Enye ayarare idem ini kiet owut nditɔ-ete emi ewakde ebe owo ikie ition, emi akamba ubak mmɔ esuk edude tutu emi, edi ndusuk ke otu mmɔ ema ede idap.

⁷Ekem Enye ediyarare idem owut James; ekem owut kpukpru mme apostle.

⁸Ndien ke ata ukperedem, Enye ediyarare idem owut mi ŋko, emi ntiede nte eyen eke amanade ke ini mikemke.

⁹Koro mmeŋkpri ŋkaha ke otu mme apostle, emi mmendotke ndikere apostle, koro ŋkesinde ufɔk Abasi enyin.

¹⁰Edi oto mfɔn Abasi ndi se ndedi: ndien mfɔn emi Abasi ɔnɔde mi ikɔwɔrɔke ikpikpu; edi mmanam utom ŋkan mmɔ kpukpru; inyuŋ idige ami nnam, edi mfɔn Abasi eke odude ye ami anam.

¹¹Ededi ami ŋkwɔrɔ ndien, onyuŋ ededi mmɔ ekwɔrɔ, ntem ke nnyin ikwɔrɔ, ntem ke mbufo enyuŋ enim ke akpanikɔ.

¹²Edi edieke ekwɔrɔde ebaŋa Christ, ete enam Enye eset ke mkpa, ndusuk owo ke otu mbufo enam didie edɔhɔ ete eriset mme akpa-mkpa iduhe?

¹³Edi edieke eriset mme akpa-mkpa miduhe, ikonyuŋ inamke Christ eset naŋa ke mkpa:

¹⁴ndien edieke mikanamke Christ eset ke mkpa, se nnyin ikwɔrɔde ɔwɔrɔ ikpikpu, mbuɔtidem mbufo edinyuŋ okpu.

¹⁵Ndien eyarare ekut ete nnyin idi mme ntiense nsu inɔ Abasi; ke emi nnyin iketiŋde ikɔ idian Abasi, ite Enye akanam Christ eset; emi Enye mikanamke eset, edieke anade nte minamke mme akpa-mkpa eset.

¹⁶Koro edieke minamke mme akpa-mkpa eset, ikonyuŋ inamke Christ eset naŋa.

¹⁷Edi edieke mikanamke Christ eset, mbuɔtidem mbufo ɔwɔrɔ ikpikpu; mbufo ke esuk edodu ke mme idiɔk-ŋkpɔ mbufo.

¹⁸Ŋko-ŋko, mmɔ emi ekedede idap ke Christ ema etak.

¹⁹Edieke nnyin minyeneke se ibede idori-enyin ke Christ ke uwem emi, nnyin idi mmɔ emi enyenede mbɔm ikan kpukpru owo eŋwen.

²⁰Edi ke akpanikɔ ema enam Christ eset ke mkpa, nte akpa mbuŋwum ke otu mmɔ emi edede idap.

²¹Koro kpa nte mkpa okotode owo, eriset ke mkpa onyuŋ oto owo.

²²Koro nte kpukpru owo ekpaŋade ke Adam, kpa ntre ŋko ke Christ ke eyenam kpukpru owo edu uwem.

²³Edi kpukpru owo ke idaha esie; Christ ebem iso eset nte akpa mbuŋwum; ekem mmɔ emi edide ikɔt Christ eyediana ye Enye ke eridi Esie.

²⁴Edikem ke edisim utit ini, emi Enye ediyakde itie-ubɔŋ Esie ɔnɔ Abasi, kpa Ete Esie; ke Enye ama okosobo kpukpru erikara ye kpukpru nsɔŋ-uyo ye odudu.

²⁵Koro Enye enyene ndida ubɔŋ tutu Enye onuk kpukpru mme asua Esie ke idak ikpat.

²⁶Akpatre usua emi Enye edisobode edi mkpa.

²⁷Koro Abasi akada kpukpru ŋkpɔ esin Enye ke idak ikpat. Edi ke ini edɔhɔde ete, Ekada kpukpru ŋkpɔ esin Enye ke idak, ikɔ owut idem aŋwa-aŋwa ete, Enye emi adade kpukpru ŋkpɔ esin Enye ke idak itieneke isaŋa do.

²⁸Ndien ke ini kpukpru ŋkpɔ edisuhɔde esine Enye ke idak ikpat, adaŋoro ndien ke Eyen ke Idem Esie edisuhɔ ɔnɔ Enye emi akadade kpukpru ŋkpɔ adak Enye ke ikpat; man ke usuŋ ekededi Abasi ekpedi kpukpru ŋkpɔ.

²⁹Edieke ŋkpɔ mibonoke ntem, mmɔ emi enade bpatism ebaŋa mme akpa-mkpa edinam nso? Edieke minamke nam mme akpa-mkpa eset, nsidi ndien ntak emi mmɔ enade baptism ebaŋa mmɔ oro?

³⁰nsinyuŋ idi ntak emi nnyin isuk idodu ke ɔkpɔsɔŋ afanikɔŋ kpukpru ini?

³¹Mmada mbure emi mburede mbaŋa mbufo ke Christ Jesus Ɔbɔŋ nnyin, nditɔ-ete, ŋwɔŋɔ nte ke ntie nte owo mkpa kpukpru usen.

³²Edieke mma ŋkaŋwana ye mme idiɔk unam ke Ephesus, nte owo edɔhɔde, nso udori ke oro ada ɔsɔk mi? Edieke minamke mme akpa-mkpa eset, yak idia inyuŋ iŋwɔŋ, koro iyekpa mkpa mkpɔŋ.

³³Ekubiaŋa idem mbufo ke ŋkpɔ emi. Idiɔk nsaŋa ababiat eti ido.

³⁴Efara ke idem edinen-edinen, enyuŋ etre mme idiɔk-ŋkpɔ, koro ndusuk owo inyeneke ifiɔk Abasi. Ntiŋ emi man but anam mbufo.

³⁵Edi owo eyebup ete, Edinam mme akpa-mkpa eset didie? Nso oruk ikpɔhidem ke mmɔ edinyuŋ eda edi?

³⁶Afo owo anana ibuot, inamke se afo ɔtɔde odu uwem ibɔhɔke enye ebem iso akpa.

³⁷Se afo ɔtɔde, inyuŋ idige idem eke ediwɔrɔde oŋwum ke afo ɔtɔ, edi mkpasip ikpɔŋ, ndusuk mkpasip ibokpot, midige, oruk mkpasip eŋwen;

³⁸edi Abasi ɔnɔ mkpasip oro idem nte enemde Enye esit, onyuŋ ɔnɔ kpukpru mkpasip kiet kiet idem eke ekemde ye mmɔ.

³⁹Kpukpru obukidem idige ukem-ukem obukidem; obukidem eke owo odu; obukidem eke unam onyuŋ odu; obukidem eke inuen onyuŋ odu; obukidem eke iyak onyuŋ odu ŋko.

⁴⁰Ntre ke ikpɔhidem edu emi edide eke heaven, ikpɔhidem enyuŋ edu emi edide eke isɔŋ: edi ubɔŋ ikpɔhidem emi enyenede heaven edi oruk ubɔŋ kiet, ubɔŋ ikpɔhidem emi enyenede isɔŋ onyuŋ edi oruk ubɔŋ efen.

⁴¹Ubɔŋ utin edi oruk ubɔŋ kiet, ubɔŋ ɔfiɔŋ edi oruk ubɔŋ efen, ubɔŋ ntantafiɔŋ onyuŋ edi oruk ubɔŋ efen; koro ntatafiɔŋ kiet ɔkpuhɔrede ye ntantafiɔŋ efen ke ubɔŋ.

⁴²Ntem ke onyuŋ edi ye eriset mme akpa-mkpa. Etɔ ikpɔhidem ke mbiara; enam enye eset nte ŋkpɔ eke mikemeke ndibiara: etɔ enye ke esuene;

⁴³enam enye eset ke ubɔŋ: etɔ enye ke mmem-idem; enam enye eset ke odudu:

⁴⁴etɔ enye nte idem eke otode ke uduot obukidem; enam enye eset nte idem eke otode ke uduot spirit. Edieke idem eke otode ke uduot obukidem odude, kpa ntre ŋkpo ke idem eke otode ke uduot spirit onyuŋ odu.

⁴⁵Ntre ke ewet ete, Adam, akpa owo, akabare edi ukpɔŋ emi odude uwem; akpatre adam edi spirit emi ɔnɔde uwem.

⁴⁶Edi idige se idide uduot spirit ebem iso edi, edi se idide uduɔt obukidem ebem, ndien se idide uduot spirit editiene ke edem.

⁴⁷Akpa owo okoto isɔŋ, eke ntan-isɔŋ; udiana-akpa owo oto ke heaven.

⁴⁸Nte andito ntan-isɔŋ edide kpa ntre ke mmɔ emi edide eke ntan-isɔŋ enyuŋ edi; nte andito heaven edide, kpa ntre ke mmɔ emi edide eke heaven enyuŋ edi.

⁴⁹Ndien kpa nte nnyin ima ikobiom mbiet owo eke otode ntan-isɔŋ, nnyin iyenyuŋ ibiom mbiet owo eke otode heaven ŋko.

⁵⁰Edi ndɔhɔ emi, nditɔ-ete, obukidem ye iyip ikemeke ndibɔ Obio Ubɔŋ Abasi nda nnyene; mbiara inyuŋ ikemeke ndibɔ se midibiarake nda nnyene.

⁵¹Sese mmɔŋ ndɔhɔ ndibe-ŋkpɔ nnɔ mbufo. Idige kpukpru nnyin iyede idap, edi eyenam kpukpru nnyin ikpuhɔre,

⁵²ke idaha kiet, ke eriyip enyin kiet, ke adaŋemi edifride akpatre ukorowo. Koro eyefri ukorowo, ndien eyenam mme akpa-mkpa eset nte mmɔ midikemeke ndibiara aba, eyenyuŋ ekpuhɔre nnyin.

⁵³Koro mbiara ikpɔhidem emi enyene ndisine se midibiarake, ikpɔhidem mkpa emi onyuŋ enyene ndisine se midikpaha.

⁵⁴Ndien ke adaŋemi mbiara ikpɔhidem emi edisinede se midibiarake, ikpɔhidem mkpa emi edinyuŋ esinede se midikpaha, adaŋoro ndien ke ikɔ ediwɔrɔ osu, nte ewetde ete, Eda erikan emen mkpa.

⁵⁵O mkpa, erikan fo enye?

⁵⁶O mkpa, ifɔt fo enye? Ifɔt mkpa edi idiɔk-ŋkpɔ. Odudu idiɔk-ŋkpɔ edi ibet;

⁵⁷edi yak ekɔm enyene Abasi, emi ɔnɔde nnyin erikan, oto ke Ɔbɔŋ nnyin Jesus Christ.

⁵⁸Mmɔdo ndima nditɔ-ete mi, esɔŋɔ eda, ekuyak ŋkpɔ esehere mbufo; eyɔhɔ kpukpru ini ke utom Ɔbɔŋ; sia emɔfiɔk ete utom eke mme imɔ inamde idiwɔrɔke idi ikpikpu ke Ɔbɔŋ.