Read efik 1 ŊWED CORINTH 16 Bible Online

1 ŊWED CORINTH 16 - efik bible

1 ŊWED CORINTH 16

¹KABAŊA etibe emi edinɔde esɔk ikɔt Abasi; nte ŋkɔnɔde mme ufɔk Abasi ke Galatia uyo nte enam, mbufo enam kpa ntre.

²Ke akpa usen urua, mbufo owo kiet kiet esio ŋkpɔ ke udori eke ekutde, ekpɔnɔre enim ŋkaŋ kiet, mbak mbufo edinyene nditip etibe ke ini ndide.

³Ndien mma nsim do, nyemen ŋwed nnɔ mmɔ emi mbufo edimekde, nnyuŋ ndɔŋ mmɔ eda enɔ mbufo eka Jerusalem;

⁴ndien edieke odotde ami nde ŋka, mmɔ eyesaŋa ntre ye ami eka.

⁵Edi nyedi ndise mbufo, ke mma nsaŋa mbe ke Macedonia; koro mmɔŋ ndida isaŋ mbe ke Macedonia; edi iso ɔfɔn,

⁶nyebigi do esit ye mbufo, midige, nyedu ye mbufo ke ofuri ukwɔ, man mbufo eda mi ekayak ke usuŋ ebiet eke ndikaka.

⁷Koro nyomke ndikut mbufo ke isaŋ emi nte nsaŋade mbe; koro mmodori enyin nte nyebigi ye mbufo esit, edieke Ɔbɔŋ onyimede.

⁸Edi nyedu ke Ephesus tutu osim Pentecost;

⁹koro ema eberere usuŋ akamba enɔ mi ndinam akwa utom do, mmɔ eke eŋwanade ye ami enyuŋ ewak.

¹⁰Edi edieke Timothy edide ke ɔtɔ mbufo, etiŋ enyin enam enye etie ye mbufo anana ndik; koro enye ke anam utom Ɔbɔŋ, kpa nte ami nnyuŋ nnamde.

¹¹Ntre owo okusin enye. Eda enye ekeyak ke usuŋ ke emem, man enye etiene mi; koro ke ntie mbet enye ye nditɔ-ete eken.

¹²Ama edi eyen-ete Apollos, mmekpe eti-eti ye enye nte asaŋa ye nditɔ-ete edise mbufo; edi enye inyimeke ndidi kaŋa idahemi; edi eyedi ke ini enye okutde ifet.

¹³Edu ke ukpeme; esɔŋɔ eda ke mbuɔtidem; enam ŋkpɔ nte iren-owo; ekop odudu.

¹⁴Enam kpukpru se enamde ke ima.

¹⁵Edi mmekpe mbufo ubɔk, nditɔ-ete; mbufo emediɔŋɔ ufɔk Stephanas, ete edi akpa mbuŋwum eke ekpeŋede ke Achaia, mmɔ enyuŋ esin ifik enamŋkpɔ enɔ ikɔt Abasi.

¹⁶Nyom mbufo esuk idem enɔ mmɔ emi etiede ntem, enyuŋ esuk idem enɔ kpukpru mmɔ emi eŋwamde ke utom, enyuŋ enamde utom ɔkpɔsɔŋ.

¹⁷Mmadara eridi Stephanas ye Fortunatus ye Achaicus; mmɔ enɔ mi se ŋkananade ke ubɔk mbufo.

¹⁸Mmɔ ekedemere mi uwem, kpa nte mmɔ edemerede mbufo uwem. Etim ediɔŋɔ mmɔ emi etiede ntre.

¹⁹Mme ufɔk Abasi ke Asia ete ekɔm mbufo. Aquila ye Prisca ye ufɔk Abasi emi esopde ke ebiet mmɔ ete ekɔm mbufo eti-eti ke Ɔbɔŋ.

²⁰Kpukpru nditɔ-ete ekɔm mbufo. Ekɔm kiet eken ye ntim-inua eke asanade.

²¹Ami Paul nda ubɔk mi ŋwet ekɔm mi emi.

²²Edieke owo ekededi mimaŋa Ɔbɔŋ, Ɔdɔdiɔk ɔnɔ enye.

²³Ɔbɔŋ nnyin ke edi. Mfɔn ɔbɔŋ Jesus akpakam odu ye mbufo.

²⁴Ima mi akpakam odu ye mbufo kpukpru ke Christ Jesus. Amen.