Read efik 1 ŊWED CORINTH 2 Bible Online

1 ŊWED CORINTH 2 - efik bible

1 ŊWED CORINTH 2

¹NDIEN ami, ke adaŋemi ŋkedide ke ɔtɔ mbufo, nditɔ-ete, nsaŋake ye akan ikɔ mme ifiɔk ŋkwɔrɔ ndibe-ŋkpɔ Abasi nnɔ mbufo.

²Koro ŋkadaduak nte ndifiɔkke baba ŋkpɔ kiet ke otu mbufo, ke mibɔhɔke Jesus Christ, ye nte ekewotde Enye ke cross.

³Ami ŋkonyuŋ ndu ye mbufo ke mmem-idem, ye ndik, ye akwa nnyek-idem;

⁴ikɔ mi ye ukwɔrɔ-ikɔ mi ikonyuŋ isaŋake ke nnem-inua ye ifiɔk owo, edi edi Spirit akada odudu anam ŋkpɔ aŋwaŋa mbufo;

⁵man mbuɔtidem mbufo ɔkukɔŋɔ ke ifiɔk owo, edi ɔkɔŋɔ ke odudu Abasi.

⁶Edi nnyin itiŋ ŋkpɔ ifiɔk ye mmɔ emi ema ekekponi; edi idige ifiɔk eyo emi, inyuŋ idige eke mme andikara eyo emi, emi ke ekabare edi ikpikpu.

⁷Edi nnyin itiŋ ifiɔk Abasi ke ndibe-ŋkpɔ, kpa ifiɔk eke okodibede, eke Abasi okonimde ndien edibot mme eyo, ete edi ubɔŋ ɔnɔ nnyin.

⁸Edi mme andikara eyo emi baba kiet ikenyeneke ifiɔk emi: koro edieke mmɔ ekpe-nyenede, mmɔ ikpowotke Edidem Ubɔŋ ke cross;

⁹Edi nnyin itiŋ, nte ewetde ete, Se enyin mikekwe, utɔŋ mikonyuŋ ikopke, Se minyuŋ idukke owo ke esit ndikere, Ŋkpɔ ekededi eke Abasi ekebeŋede onim ɔnɔ mmɔ emi emade Enye.

¹⁰Edi Abasi akayarare mme ŋkpɔ emi ɔnɔ nnyin ke Spirit Esie; koro Spirit ɔdɔduŋɔre kpukpru ŋkpɔ, kpa ndituŋɔ ŋkpɔ Abasi.

¹¹Koro anie ke otu owo ɔfiɔk ekikere owo, ke mibɔhɔke Spirit eke owo eke emi esinede enye ke esit? Kpasuk ntre ke baba owo kiet ifiɔkke ekikere Abasi ke mibɔhɔke Spirit Abasi.

¹²Edi nnyin ikɔbɔhɔ spirit ererimbot emi, edi ikɔbɔ spirit emi otode Abasi, man oto do nnyin ikpɔfiɔk mme ŋkpɔ eke Abasi ɔnɔde nnyin ke mfɔn.

¹³Nnyin ineme nneme mme ŋkpɔ emi; edi nnyin idaha usem eke eti ibuot owo ekpepde ineme, edi usem eke spirit ekpepde; nnyin ida usem spirit isiak ŋkpɔ spirit.

¹⁴Edi owo eke minyeneke spirit ibɔhɔ mme ŋkpɔ Spirit Abasi; koro mmɔ edide ndisime ŋkpɔ ke enyin esie; enye inyuŋ ikemeke ndifiɔk mmɔ, koro edi spirit ekpep owo edomo mmɔ efiɔk.

¹⁵Edi owo eke enyenede spirit odomo kpukpru ŋkpɔ ɔfiɔk, edi owo idomoke enye.

¹⁶Koro anie owo ɔmɔfiɔk ekikere Ɔbɔŋ, nte ɔkpɔnɔde Enye item? Edi nnyin imenyene ekikere Christ.