Read efik 1 ŊWED CORINTH 3 Bible Online

1 ŊWED CORINTH 3 - efik bible

1 ŊWED CORINTH 3

¹NDIEN ami, nditɔ-ete, ŋkekemeke ndineme nneme ye mbufo nte ye mbon spirit, edi nte ye mbon obukidem, nte nsek nditɔ ke Christ.

²Ŋkada mmɔŋeba mbɔk mbufo, ndaha udia; koro mbufo mikekemeke ndibɔ udia kaŋa.

³Ŋkɔm tutu osim emi mbufo ikemeke kaŋa ndibɔ udia, koro mbufo esuk edide nbon obukidem; koro adaŋa ini nte ufup ye utɔk edude ke otu mbufo, nte mbufo idige mbon obukidem, inyuŋ isaŋake nte mme owo esaŋade?

⁴Adaŋa nte owo mbufo kiet ɔdɔhɔde ete, Ami nda ke ŋkaŋ Paul, enye eken onyuŋ ɔdɔhɔde ete, Ami nda ke ŋkaŋ Apollos; nte mbufo idige mbon obukidem?

⁵Apollos edi nso? Paul onyuŋ edi nso? Mmɔ edi mme isuŋutom, emi okotode mmɔ mbufo enim ke akpanikɔ, nte Ɔbɔŋ ɔnɔde mmɔ kiet kiet.

⁶Ami ŋkɔtɔ, Apollos ɔkɔbɔk ke mmɔŋ; edi ŋkɔri oto Abasi.

⁷Ntre ndien idige anditɔ edi ŋkpɔ, inyuŋ idige andibɔk ke mmɔŋ, edi Abasi emi ɔnɔde ŋkɔri.

⁸Ntem ke anditɔ ye andibɔk ke mmɔŋ edi ukem-ukem; mmɔ kiet kiet eyenyuŋ ebɔ utip mmɔ, nte ekemde ye utom mmɔ.

⁹Koro nnyin isaŋa ikpat kiet idi mme anam-utom Abasi; mbufo edi iŋwaŋ eke Abasi ɔkɔtɔde, edi ufɔk eke Abasi ɔkɔbɔpde.

¹⁰Nte mfɔn emi Abasi ɔkɔnɔde mi edide, nte etubom ubɔp-ufɔk emi enyenede eti ibuot, mma nnim itiat-ukot-ufɔk, owo efen ke onyuŋ ɔbɔp odori ke esit. Edi ɔfɔn kpukpru owo ekpeme se mmɔ ebɔpde edori ke esit.

¹¹Koro baba owo kiet ikemeke ndinim itiat-ukot-ufɔk efen mbe se ema ekenim, emi edide Jesus Christ.

¹²Edi edieke owo adade gold, mme silver, mme ɔsɔŋ-urua itiat, mme obukpɔk, mme nyanyaŋa, mme mbio, ɔbɔp odori ke enyɔŋ itiat-ukot-ufɔk oro;

¹³utom kpukpru owo kiet kiet eyeyarare; koro usen oro eyewut enye, koro usen oro edisierede ke ikaŋ; ikaŋ eyenyuŋ odomo se kpukpru owo ekanamde owut oruk utom eke edide.

¹⁴Edieke utom eke owo ɔkɔbɔpde odori ke esit osuk edidu, owo oro eyebɔ utip.

¹⁵Edieke ikaŋ editade utom owo, eyetak owo oro; edi eyenyaŋa enye ke idem esie, nte ŋkpɔ eke ekebede ke ikaŋ ɔbɔhɔ.

¹⁶Nte mbufo ifiɔkke ite mme imɔ idi temple Abasi, Spirit Abasi onyuŋ oduŋ mme imɔ ke esit?

¹⁷Edieke owo owuride temple Abasi, Abasi eyesobo owo oro. Koro temple Abasi edide ibet, mbufo enyuŋ edi temple oro.

¹⁸Owo okubiaŋa idem. Edieke owo mbufo ekededi esede idem ke enyene-ibuot owo ke eyo emi, yak enye akabare edi ndisime, man enye ɔfiɔk ŋkpɔ.

¹⁹Koro ifiɔk ererimbot emi edi ndisime ke iso Abasi. Koro ewet ete, Enye omum mme enyene-ibuot owo ke ŋkari mmɔ;

²⁰enyuŋ ewet ŋko ete, Jehovah ɔmɔfiɔk ekikere mme enyene-ibuot owo, ete mmɔ edi ikpikpu.

²¹Ntre ke owo okubure mbure ke owo; koro kpukpru ŋkpɔ enyenede mbufo;

²²edide Paul mme Apollos, mme Cephas, onyuŋ edide ererimbot, mme uwem, mme mkpa, mme se idude ke emi, mme se ididude; kpukpru enyene mbufo;

²³ndien mbufo enyene Christ, Christ onyuŋ enyene Abasi.