Read efik 1 ŊWED CORINTH 6 Bible Online

1 ŊWED CORINTH 6 - efik bible

1 ŊWED CORINTH 6

¹NTE owo mbufo ekededi, emi enyenede ikɔ ye eyen-ete esie, edidede aka ikpe ye enye ke iso owo eke minenke ido, ikaha ke iso ikɔt Abasi?

²Mme nte mbufo ifiɔkke ite, ikɔt Abasi eyekpe ikpe enɔ ererimbot? edieke mbufo edidide mme ebierikpe ererimbot, nte mbufo idotke ndibiere ŋkeŋe ndutaŋ uyo?

³Nte mbufo ifiɔkke ite, nnyin iyekpe ikpe inɔ mme angel? ŋwaŋwaediso ke nnyin ikpekpe ikpe ke ŋkpɔ uwem emi?

⁴Edi ke ini mbufo enyenede ikɔ ebaŋa ŋkpɔ uwem emi, nte mbufo eda ɔwɔrɔ ke iso mmɔ emi minyeneke ukpono ke ufɔk Abasi?

⁵Mmɔdɔhɔ emi man but akpanam mbufo. Mme ɔwɔrɔ ete enyene-ibuot owo iduhe ke otu mbufo, emi ekemede ndibiere ikɔ ke ufɔt nditɔ-ete esie?

⁶Edi eyen-ete enyene ndikot enyen-ete-ikpe, onyuŋ ada enye aka ke iso mmɔ emi minimke ke akpanikɔ.

⁷Ke akpanikɔ idiɔk-ŋkpɔ ama akan mbufo ama, emi mbufo ekotde kiet eken ikpe. Nsinam mbufo mikam ibɔhɔ utuk ibiom? Nsinam mbufo miyakke ebɔ mbufo ŋkpɔ ke ŋkanubɔk.

⁸Edi mbufo ke enanam owo utuk, enyuŋ ebɔ owo ŋkpɔ ke ŋkanubɔk:

⁹mbufo enyuŋ enam ntem ye nditɔ-ete mbufo. Mme nte mbufo ifiɔkke ite, mme anam-ukwaŋido ididaha Obio Ubɔŋ Abasi inyene? Ekubiaŋa idem mbufo. Mbon-use, ye mme okpono-ndem, ye mme esin-efibe,

¹⁰ye mmɔ eke ebietde iban, ye mmɔ eke esabarede idem, ye mme inɔ, ye mme esin esit ke ŋkpɔ owo, ye mme ɔyuhɔ mmin, ye mbon idiɔk inua, ye mme akan owo ubɔk ididaha Obio Ubɔŋ Abasi inyene.

¹¹Ndien ndusuk mbufo eketie ntem; edi ema eyet mbufo, ema enam mbufo esana, ema etebe mbufo ikpe ke enyiŋ Ɔbɔŋ Jesus Christ, ye ke Spirit Abasi nnyin.

¹²Kpukpru ŋkpɔ enen mi ndinam; edi idige kpukpru ŋkpɔ efɔn. Kpukpru ŋkpɔ enen mi ndinam; edi ndiyakke ŋkpɔ ekededi akara mi.

¹³Ebot udia enɔ idibi, enyuŋ ebot idibi enɔ udia; edi Abasi eyenam mmɔ mbiba ewɔrɔ ikpikpu.

¹⁴Edi Abasi ikonimke ikpɔhidem inɔ use, edi onim ɔnɔ Ɔbɔŋ; onyuŋ onim ete, Ɔbɔŋ akara ikpɔhidem. Edi Abasi akanam Ɔbɔŋ eset ke mkpa, eyenyuŋ ada odudu Esie anam nnyin iset ke mkpa.

¹⁵Nte mbufo ifiɔkke ite, ikpɔhidem mme imɔ edi ndido Christ? Nte ŋkpada ndido Christ nnam mmɔ ekabare edi ndido ŋwan use?

¹⁶Ŋwaŋa nsa O! Mme nte mbufo ifiɔkke ite, owo eke adiande idem ye ŋwan use akabare edi ikpɔhidem kiet ye enye? Koro Abasi ɔdɔhɔ ete, Mmɔ mbiba eyekabare edi obukidem kiet.

¹⁷Edi owo eke adiande idem ye Ɔbɔŋ edi spirit kiet ye Enye.

¹⁸Mbufo efehe ebɔhɔ use. Idiɔk-ŋkpɔ ekededi eke owo anamde ibehe iduk enye ke ikpɔhidem; edi owo eke anamde use edue ikpɔhidem esie.

¹⁹Mme nte mbufo ifiɔkke ite, ikpɔhidem mbufo edi temple Edisana Spirit, emi oduŋde mbufo ke esit, kpa Spirit emi mbufo ekebɔde ke ubɔk Abasi?

²⁰Mbufo inyuŋ idige eke mbufo. Ekedep mbufo ke ekɔm-urua; mmɔdo enɔ Abasi ubɔŋ ke ikpɔhidem mbufo.