Read efik 1 ŊWED CORINTH 8 Bible Online

1 ŊWED CORINTH 8 - efik bible

1 ŊWED CORINTH 8

¹Edi kabaŋa se ekawade enɔ ndem; nnyin imɔfiɔk ite kpukpru nnyin inyene ifiɔk. Ifiɔk anam owo okohore idem, edi ima ɔbɔp owo ɔkɔri ke nti ido.

²Owo ama ese ete imɔ ifiɔk ŋkpɔ, enye ifiɔkke kaŋa ŋkpɔ nte enye ɔkpɔfiɔkde;

³edi edieke owo amade Abasi, Abasi ɔmɔfiɔk enye.

⁴Kabaŋa eridia ŋkpɔ eke ekawade enɔ ndem ndien; nnyin imɔfiɔk ite, idem baba kiet iduhe ke ererimbot, Abasi baba inyuŋ iduhe, ibɔhɔke kiet.

⁵Koro okposuk edi nte se ekotde abasi edude ke enyɔŋ ye ke isɔŋ, nte mme abasi ye mbɔŋ ewakde ke emi,

⁶Nnyin imenyene Abasi kiet kpɔt, emi edide Ete, emi kpukpru ŋkpɔ etode Enye ewɔŋɔ, emi nnyin inyuŋ idude uwem inɔ Enye: imonyuŋ inyene Ɔbɔŋ kiet, kpa Jesus Christ, emi otode Enye ke kpukpru ŋkpɔ edu, onyuŋ otode Enye ke nnyin idu.

⁷Edi kpukpru owo inyeneke ifiɔk emi. Ndusuk owo, sia mmɔ emehede ye ndem tutu osim emi, edia oruk udia emi nte unam eke ekawade enɔ idem; ndien esit mmɔ, koro ememde ntem, akabare edehe.

⁸Edi udia inamke nnyin inyene eti itie ke iso Abasi. Edieke nnyin midiaha, inamke nnyin idiɔk; onyuŋ edieke nnyin idiade, inamke nnyin ifɔn.

⁹Etim ekpeme ndien, mbak ŋkpɔ eke esit mbufo ayakde ɔnɔ mbufo edikabare edi ŋkpɔ-iduɔ ɔnɔ mbon mmem-mmem esit.

¹⁰Koro edieke owo okutde fi emi enyenede ifiɔk, nte etiede ke itie-udia ke temple ndem, nte enye emi edide owo mmem-mmem esit idisɔŋke idem esie esit ndidia se ewade enɔ ndem?

¹¹Ntre ke oto ke ifiɔk fo, owo emi edide mmem-mmem atak, eyen-ete, emi Christ akakpade ke ibuot esie.

¹²Ntre, ke emi mbufo enamde nditɔ-ete mbufo idiɔk ntem, enyuŋ esinde mmɔ eda unan ke mmem-mmem esit mmɔ, mbufo edue Christ

¹³Ntem, edieke unam edisinde eyen-ete mi atuak ukot ɔduɔ, nditaha unam tutu amama, mbak ndinam eyen-ete mi atuak ukot ɔduɔ.