Read efik 1 ŊWED CORINTH 9 Bible Online

1 ŊWED CORINTH 9 - efik bible

1 ŊWED CORINTH 9

¹NTE nnyeneke unen ndinam nte mmade? Nte ndige apostle? Nte ŋkekwe Jesus Ɔbɔŋ nnyin? Nte mbufo idige ubɔk-utom mi ke Ɔbɔŋ?

²Edieke mmendige apostle nnɔ owo eŋwen, ndi apostle nnɔ mbufo; koro mbufo edi idiɔŋɔ itie-apostle mi ke Ɔbɔŋ.

³Oro edi ibɔro nyaŋa-idem eke mbɔrɔde mmɔ eke edomode mi.

⁴Nte nnyin inyeneke unen ndidia nnyuŋ ŋŋwɔŋ ŋkpɔ?

⁵Nte nnyin inyeneke unen ndida ŋwan emi edide eyen-ete nte nsaŋa nnyin, kpa nte mme apostle eken, ye nditɔ-ete ke Ɔbɔŋ, ye Cephas enamde?

⁶Mme nte ami ikpɔŋ ye Barnabas inyeneke unen nditre utom ndinam?

⁷Ewe owo-ekɔŋ akanam ada okuk esiemɔ aka ekɔŋ? Anie ɔtɔ iŋwaŋ vine, ndien etre ndidia mbuŋwum eke otode ke esit?

⁸Anie ɔbɔk erɔŋ, ndien etre ndiŋwɔŋ mmɔŋeba erɔŋ? Nte ntiŋ ikɔ emi nte edide ido owo nditiŋ? mme nte ibet idɔhɔke kpa ntre?

⁹Koro ewet ke ibet Moses ete, Kubɔp enaŋ inua, ke ini enye edigide ibokpot. Ndi enaŋ ke Abasi ekere abaŋa?

¹⁰Mme nte Enye ɔdɔhɔ emi kabaŋa ufɔn nnyin ofuri-ofuri? Ke akpanikɔ ewet kabaŋa ufɔn nnyin; koro odotde ofuŋ-isɔŋ ofuŋ isɔŋ ye idori-enyin, onyuŋ odotde otim-ibokpot otim ye idori-enyin ete inyenyene udeme udia.

¹¹Edieke nnyin ikɔtɔde se idide ŋkpɔ spirit inɔ mbufo, mme edi akwa ŋkpɔ ke nnyin idɔkde se idide ŋkpɔ obukidem mbufo?

¹²Edieke owo eŋwen enyenede unen emi ke idem mbufo, nte nnyin inyeneke ikan? Edi nnyin ikanamke nte nnyin inyenede unen ndinam. Nnyin ikam ibiom kpukpru ŋkpɔ, mbak nnyin idisin ŋkpɔ ɔbiɔŋɔ gospel Christ ndika iso.

¹³Nte mbufo ifiɔkke ite mmɔ emi enamde utom temple edadia se itode ke temple? mmɔ emi edade mbet itie-uwa ebuana udeme-udia ye itie-uwa?

¹⁴Kpa ntre ke Ɔbɔŋ ebiere onim, ete mmɔ emi ekwɔrɔde gospel ekpeda se itode ke gospel edu uwem.

¹⁵Edi ami ŋkadaha mme ŋkpɔ emi baba kiet ŋkama idem; nnyuŋ ŋwetke mme ikɔ emi man ekpeda mmɔ enam ntre ye ami: koro ɔfɔn ye ami ndikpa, akan ndiyak baba owo kiet anam mbure mi akabare ɔwɔrɔ ikpikpu.

¹⁶Koro edieke ŋkwɔrɔde gospel, nnyeneke ntak mbure; utom oro obiomo mi ke idem nte ŋkpɔ eke nnyenede ndinam; koro idifɔnke fɔn inɔ mi edieke mmeŋkwɔrɔke gospel.

¹⁷Koro edieke nnamde utom emi ke erinyime esit mi, mmenyene utip; edi edieke mmenamke ke erinyime esit, ntie nte akama-ukpɔhɔre emi eyakde utom esin enye ke ubɔk, ete anam.

¹⁸Utip mi edi nso ndien? ete, ke ŋkwɔrɔde gospel, ŋkpɔnɔ enye ke mfɔn, ŋkunyuŋ nda ɔyɔhɔ odudu itie mi ke gospel.

¹⁹Koro okposuk edi nte mmensineke baba owo kiet ke idak, mmoduk ufin nnɔ kpukpru owo, man nduri owo nda awak akan.

²⁰Mmakabare ntie ye mme Jew nte eyen Jew, man nduri mme Jew nda. Ye mmɔ emi esinede ke idak ibet, mmakabare ntie nte owo eke odude ke idak ibet, okposuk edi nte ami ke idem mi mmenduhe ke idak ibet, man nduri mmɔ oro edude ke idak ibet nda.

²¹Ye mmɔ emi minyeneke ibet ke ntie nte owo eke minyeneke ibet, idige nte ndianarede ŋkpɔŋ ibet Abasi, edi nsine ke idak ibet Christ, man nduri mmɔ oro minyeneke ibet nda.

²²Mmakabare ntie ye mbon mmemidem nte owo mmemidem, man nduri mbon mmemidem nda. Mmakabare ndi kpukpru ŋkpɔ nnɔ kpukpru owo, man nte ededi ŋkpekeme ndinyaŋa ndusuk mmɔ.

²³Nanam kpukpru ŋkpɔ kabaŋa gospel, man ami nde nnyene udeme ke esit.

²⁴Nte mbufo ifiɔkke ite edi kpukpru mbon itɔk efehe mbuba, edi edi owo kiet ɔbɔ utip. Efehe ndien ke usuŋ nte edibɔde utip.

²⁵Owo ekededi eke onyuŋ aŋwanade mbɔk akama idem ke ufat ke kpukpru usuŋ. Ndien mmɔ enam emi ndibɔ anyanya eke edibiarade; edi nnyin inam man ibɔ anyanya eke midibiarake.

²⁶Ntre ndien ke ami mfehe mbuba; mfeheke nte owo eke minyeneke iwuk ebiet eke enye akade: ntem ŋko ke ntop ita; ntopke nte owo ɔtɔde ofim;

²⁷edi ntɔŋɔ idem mi ita, nnam enye oduk ufin, mbak, ke mma ŋkɔkwɔrɔ nnɔ owo eŋwen, ke usuŋ ekededi edisio mi ke idem mi eduɔk.