Read efik 2 ŊWED CORINTH 1 Bible Online

2 ŊWED CORINTH 1 - efik bible

2 ŊWED CORINTH 1

¹PAUL, emi edide apostle Christ Jesus ke uduak Abasi, ye Timothy eyen-ete nnyin, ewet ŋwed emi enɔ esɔk ufɔk Abasi emi odude ke Corinth, ye kpukpru ikɔt Abasi emi edude ke ofuri Achaia.

²Mfɔn ye emem akpakam oto Abasi Ete nnyin ye Ɔbɔŋ Jesus Christ osim mbufo.

³Itoro enyene Abasi ye Ete Ɔbɔŋ nnyin Jesus Christ, Ete mbɔm ye Abasi kpukpru ndɔŋesit:

⁴emi ɔdɔŋde nnyin esit ke kpukpru ukut nnyin, man nnyin ikpekeme ndida ndɔŋesit eke Abasi ɔnɔde nnyin ndɔŋ mmɔ emi edude ke ukut ekededi esit.

⁵Koro nte ndutuhɔ Christ etienede nnyin uwak-uwak, kpa ntre ke ndɔŋesit nnyin onyuŋ awak oto ke Christ.

⁶Edi edieke nnyin ikutde ukut, edi man mbufo enyene ndɔŋesit ye erinyaŋa; edieke ibɔde ndɔŋesit, edi man mbufo enyene ndɔŋesit, eke anamde mbufo enyene ukeme ndibiom ukem-ukem ndutuhɔ eke nnyin inyuŋ ikutde:

⁷imonyuŋ inyene ɔkpɔsɔŋ idori-enyin ibaŋa mbufo; koro nnyin ifiɔk ite, kpa nte mbufo ebuanade ke ndutuhɔ, ntre mbufo etiene ebuana ke ndɔŋesit.

⁸Koro nnyin ikpamaŋa mbufo etre ndifiɔk, nditɔ-ete, mbaŋa ukut emi ɔkɔwɔrɔde ɔnɔ nnyin ke Asia. Ekɔsɔŋɔ efik nnyin eti-eti, akan nte ikemede ndibiom, tutu iduɔk idori-enyin ite iyedu uwem:

⁹ke akpanikɔ esit nnyin eketetiŋ ɔnɔ nyin ete, iyekpa; man ikubuɔt idem ye idem nnyin, edi ye Abasi emi anamde mme akpa-mkpa eset:

¹⁰emi akanyaŋade nnyin osio ke utɔ akwa mkpa oro, eyenyuŋ anyaŋa: nnyin inyuŋ idori enyin ke Enye, ite, Enye eyemana osio nnyin:

¹¹ke mbufo enyuŋ etienede enyaŋa ke mkpe-ubɔk mbufo; man ediwak owo ekpenɔ Abasi ekɔm ebaŋa nnyin, ke mfɔn eke Enye ɔfɔnde ye nnyin oto ke mkpe-ubɔk ediwak owo.

¹²Koro mbure eke nnyin iburede edi emi, kpa ikɔ-ntiense emi esit nnyin etiŋde ete, nnyin ikasaŋa ke edisana ido ye akpanikɔ Abasi idu uwem ke ererimbot; isaŋake ke ikike eke obukidem, edi ke mfɔn Abasi; inyuŋ isaŋa ntem idu uwem ke otu mbufo ikan.

¹³Koro nnyin iwetke ŋkpɔ efen inɔ esɔk mbufo, ibe se mbufo ekotde enyuŋ enyimede ete edi ntre, ŋdien mmodori enyin nte mbufo eyenyime ete edi ntre tutu amama;

¹⁴kpa nte mbufo enyimede ebaŋa nnyin esisit, ete, nnyin idi ŋkpɔ mbure mbufo, kpa nte mbufo edide ŋkpɔ mbure nnyin, ke usen Ɔbɔŋ nnyin Jesus.

¹⁵Sia nnimde emi ke akpanikɔ, ŋkoyom ndibem iso ndi ke ɔtɔ mbufo, man mbufo ekpekut utɔŋɔ-ntak ufɔn;

¹⁶ndinyuŋ mbe ke ŋkaŋ mbufo ŋka ke Macedonia, nnyuŋ nto ke Macedonia mfiak ndi ndise mbufo, man mbufo eda mi ekeyak ke erika mi ke Judea.

¹⁷Sia nyomde ndinam ntem, nte ŋwut nte ndi anana-iwuk? Mme se nduakde ndinam, nte ndaduak ke ido mbon obukidem, man ikɔ mi ɔkpɔwɔrɔ, “Edi ntre”, mme, “Idige ntre”?

¹⁸Nte Abasi edide akpanikɔ, ikɔ eke nnyin iketiŋde inɔ mbufo iwɔrɔke “Edi ntre, mme Idige ntre”.

¹⁹Koro Eyen Abasi, Jesus Christ, emi nnyin, kpa ami ye Silvanus ye Timothy, ikɔkwɔrɔde ke otu mbufo, idige “Edi ntre, mme, Idige ntre”; edi ke Enye ke Abasi etiŋ ete, “Edi ntre” (anam gospel ɔsɔŋɔ ada).

²⁰Mme uŋwɔŋɔ Abasi enyuŋ ewak nte ewewak, ke Enye ke “Edi ntre” odu (mmɔ ewɔrɔ esu ke Enye): mmɔdo onyuŋ oto ke Enye nnyin ibɔrɔ ite, “Amen” (yak edi ntre), inɔ Abasi ubɔŋ.

²¹Ndien Andinam nnyin ye mbufo isɔŋɔ ida ke ŋkpɔ Christ, ye Andinim nnyin ke itie nnyin, edi Abasi;

²²emi okonyuŋ efikde nnyin idiɔŋɔ ke idem, onyuŋ esinde Spirit Esie ke esit nnyin, nte akpa ubak udeme nnyin.

²³Edi mmokot Abasi nte edidi ntiense abaŋa ukpɔŋ mi, ete ŋketre ndidi ke Corinth mbak ndisihere mbufo.

²⁴Idige nte nnyin idedi mme andikara mbufo ke ŋkpɔ mbuɔtidem, edi nte idedi mme andiŋwam mbufo ndiyene idaresit. Koro ke mbuɔtidem ke mbufo edada.