Read efik 2 ŊWED CORINTH 10 Bible Online

2 ŊWED CORINTH 10 - efik bible

2 ŊWED CORINTH 10

¹EDI ami Paul ke idem mi nda ifure-ifure ido ye mmem-ido Christ nnɔ mbufo uyo-ami emi ndide owo nsuk-idem ke iso mbufo, ke ini ndude ye mbufo, edi nsɔŋde inua ye mbufo, ke ini mmenduhe ye mbufo:

²Edi mmekpe mbufo ubɔk nte, ke ini ndide ke ɔtɔ mbufo, ŋkusɔŋ inua ye mbufo, ke nsɔŋ-iso eke nduakde ndida ntiŋ uko-uko ye ndusuk owo emi ebatde ete nnyin isaŋa nte ido obukidem edide.

³Ke akpanikɔ nnyin idodu uwem ke obukidem, edi nnyin iŋwanake ekɔŋ nte ido obukidem edide

⁴(koro ŋkpɔ-ekɔŋ, eke idade iŋwana ekɔŋ, idige ŋkpɔ-ekɔŋ obukidem, edi se ikopde idem ke enyin Abasi ndiwuri mkpɔsɔŋ ebiet);

⁵Nnyin iwuri ekikere esit owo, ye kpukpru edikoŋ ŋkpɔ eke emenerede idem ke enyɔŋ eŋwana ye ifiɔk Abasi; inyuŋ imum kpukpru ekikere nte mbuot-ekɔŋ, inam mmɔ esuk ibuot enɔ Christ;

⁶inyuŋ ibeŋe idem ndinɔ ufen ke kpukpru nsɔŋ-ibuot, ke mbufo ema eneŋere esuk ibuot.

⁷Ese se inade mbufo ke iso. Edieke owo ekededi oburede ɔfiɔk ete imɔ idi owo Christ, yak enye ɔtɔŋɔ ntak ekere emi ŋko ke esit esie, ete, nte imɔ idide owo Christ, kpa ntre ke nnyin idi.

⁸Ŋkponyuŋ mbobure ŋkaha mbaŋa odudu emi nnyin inyenede (ndien edi Ɔbɔŋ ɔkɔnɔ odudu oro ndida nnam mbufo ekɔri, idige ndida nsosobo mbufo,) ikpanamke mi but;

⁹edi nnamke ntre, mbak editie nte nyomde ndida ŋwed nsin mbufo ndik.

¹⁰Koro mmɔ edɔhɔ ete, Ŋwed esie edobi enyuŋ esɔŋ; edi enye ke idem esie edi mmem-mmem, ikɔ-inua esie inyuŋ idige ŋkpɔ.

¹¹Yak owo emi etiŋde ntem ada emi ete, adaŋa nte nnyin idide ke ikɔ ke ŋwed ke ini miduhe ye mbufo, ntre ke nnyin inyuŋ idedi ke se nnyin inamde ke ini idude ye mbufo.

¹²Koro ke akpanikɔ nnyin inyeneke esit ndiduk otu ye ndusuk owo emi etorode idem, ndinyuŋ nda idem ndomo ye mmɔ. Mmɔ oro esese idaha idem mmɔ eda edomo idem; mmɔ inyeneke eti ibuot.

¹³Edi nnyin idibureke mbure ibe adaŋa, edi nte asaŋade ekekem ye idomo udeme utom eke Abasi okodomode onim ɔnɔ nnyin, ete ikposim mbufo.

¹⁴Koro nnyin inyanake ibe adaŋa, nte ŋkpɔ eke mikosimke mbufo; koro nnyin ima ida gospel isaŋa isim mbufo.

¹⁵Nnyin idaha utom owo eŋwen inam mbure ibe adaŋa nnyin; edi imenyene idorenyin ite, mbuɔtidem mbufo eyekɔri esin nnyin iforo ke otu mbufo ika iso inam utom ikaha, nte asaŋade ekekem ye udeme utom eke Abasi okonimde ɔnɔ nnyin;

¹⁶man nnyin ika ikɔkwɔrɔ gospel ke mme ebiet eke ebede mbufo, ikuda se nnyin ikade ikosim ikut ke udeme utom owo efen inam mbure.

¹⁷Yak owo emi oburede mbure obure ke Ɔbɔŋ.

¹⁸Koro idige owo emi otorode idem ke ebat ke eti, edi owo emi Ɔbɔŋ otorode.