Read efik 2 ŊWED CORINTH 12 Bible Online

2 ŊWED CORINTH 12 - efik bible

2 ŊWED CORINTH 12

¹ANA nte mbure mbure, okposuk edi nte oro minyeneke udori: mmɔŋ nditiŋ mbaŋa ŋkukut ye eriyarare Ɔbɔŋ.

²Mmɔdiɔŋɔ owo kiet ke Christ emi ekpobide enye eda edɔk ke ɔyɔhɔ heaven ita nte isua duopenaŋ ekebe. Mme enye okodu ke ikpɔhidem, mme ema esio enye ke ikpɔhidem mfiɔkke; Abasi ɔmɔfiɔk.

³Mmonyuŋ ndiɔŋɔ oruk owo emi (mme enye okodu ke ikpɔhidem, mme ema esio enye ke ikpɔhidem, mfiɔkke;

⁴Abasi ɔmɔfiɔk), nte ekpobide enye edɔk eduk ke Paradise, enye onyuŋ okop ikɔ eke enyaŋade edeme nditiŋ, minyuŋ inenke owo nditiŋ.

⁵Nyenam mbure mbaŋa oruk owo oro; edi ndibureke mbaŋa idem mi, ibɔhɔke ke mmem-idem mi.

⁶Koro edieke ɔkpɔdɔŋde mi ndinam mbure, ndidige ndisime, koro se ntiŋde edi akpanikɔ; edi nnamke, mbak owo edibat ete mmokpon ŋkan nte imɔ isede mi inyuŋ ikopde ke inua mi;

⁷Koro se eyararede enɔ mi okponde eti-eti; ntre, mbak ndiseri iseri ŋkaha, ke esin mi ŋkukim ke obukidem, isuŋutom Satan edituai mi, mbak ndiseri iseri ŋkaha.

⁸Mbaŋa ŋkpɔ emi ke ŋkekpe ɔbɔŋ ubɔk utim ikata, nte adaha ɔkpɔŋ mi.

⁹Edi Enye ete mi, Mfɔn mi ke ekekem fi; koro enamde odudu Mi ɔfɔn ama ke mmem-idem. Ntre ke adat mi esit eti-eti ndinam mbure ke mmem-idem mi, man odudu Christ odoro ofuk mi.

¹⁰Mmɔdo mmadara ke mmem-idem, ye esuene, ye afanikɔŋ, ye isin-enyin, ye mbaba, kabaŋa Christ; koro ke adaŋemi idem ememde mi, adaŋoro ke ntim nnyene nsɔŋ-idem.

¹¹Mmakabare ndi ndisime; mbufo ke enyenyik mi esin ke esit. Mbufo ekpekam etoro mi; koro mmeŋkprike ŋkan mme akakan apostle ke baba usuŋ kiet, okposuk edi nte mmendige ŋkpɔ.

¹²Ke akpanikɔ mma nda anyan ime nnam kpukpru utom itie apostle ke otu mbufo, ke mme idiɔŋɔ ye mme utibe-ŋkpɔ ye utom odudu.

¹³Ke usuŋ ewe ke ekanam mbufo ekpri ekan mme ufɔk Abasi eŋwen, ke midige ke emi mmendige mbiomo nnɔ mbufo? Edahado enɔ mi ke ndudue emi.

¹⁴Sese, emi edi ɔyɔhɔ iduɔk ita eke mbeŋede idem ndidi ke ɔtɔ mbufo, ndien ndidige mbiomo nnɔ mbufo; koro idige inyene mbufo ke nyom, edi mbufo ke idem mbufo. Koro idige nditɔ ekpenim ŋkpɔ enɔ ete ye eka, edi ete ye eka enɔ nditɔ.

¹⁵Ndien mmonyime ke uyɔhɔ idaresit ndida se nnyenede nnam ŋkpɔ, ndinyuŋ nda idem mi nnam ŋkpɔ nnɔ ukpɔŋ mbufo. Edieke ima eke mmade mbufo ɔdiɔŋde diɔŋ awak aka iso, nte ima eke mbufo emade mi ɔdɔdiɔŋ ekpri?

¹⁶Edi yak oro etie; ami ke idem mi ŋkedige mbiomo nnɔ mbufo; edi sia ndide owo ŋkari, ŋkada abiaŋa ŋkan mbufo ubɔk.

¹⁷Nte ŋkada baba mmɔ emi ndɔŋde ke ɔtɔ mbufo nyaŋ mbufo?

¹⁸Ŋkɔnɔ Titus uyo nte edi ke ɔtɔ mbufo, nnyuŋ nsio eyen-ete nte asaŋa ye enye. Nte Titus akayaŋ mbufo? nte nnyin isaŋake ke Spirit kiet? nte nnyin ikemke ikpat isaŋ?

¹⁹Etie mbufo nte ofuri ini emi ntetiŋ emi ŋwana ndinyaŋa idem ke iso mbufo? Ntie ke Christ ntiŋ ikɔ ke iso Abasi. Edi ndima mme ufan, ntiŋ kpukpru ŋkpɔ emi, man mbufo ekɔri ke ido Abasi.

²⁰Koro mfefehe ndik nte, ke adaŋemi ndidide, ndusuk nyekut nte mbufo idige se nyomde mbufo edi, mbufo eyenyuŋ ekut ete ami ndige se mbufo emade; mbak ndusuk nyekut utɔk, ye ufup, ye ifuresit, ye mdomo-idem, ye idiɔk ibaŋa, ye erikama owo, ye ŋkohore-idem, ye ndutime ke otu mbufo;

²¹mbak ndusuk Abasi mi eyesuhɔre mi ke iso mbufo, ke ini ntɔŋɔde ntak ndi, ndien nyekop mfuhɔ mbaŋa ediwak owo emi ekeduede ke ini eke ebede, edi mituaha mkpɔfiɔk ikabare esit ikpɔŋ mbubiam ido ye use ye otime-otime ido eke mmɔ ekenamde.