Read efik 2 ŊWED CORINTH 13 Bible Online

2 ŊWED CORINTH 13 - efik bible

2 ŊWED CORINTH 13

¹EMI edi ɔyɔhɔ eridi mi utim ikata ke ɔtɔ mbufo; ke inua ntiense iba mme ita ke kpukpru ikɔ eyesɔŋɔ eda.

²Nte mma ŋkebem iso ndɔhɔ mbufo ke udiana ini emi ndude ye mbufo, ntre ke emi mmonyuŋ nduhe do, mmebem iso ndɔhɔ mmɔ emi eduede ke ini eke ebede, ye kpukpru mmɔ eken, nte ndituaha owo mbɔm ke mma ntɔŋɔ ntak ndi.

³Sia mbufo eyomde ŋwut mbufo nte edi Christ esine mi ke idem etiŋ ikɔ, Enye idige anana-odudu ke ɔtɔ mbufo: Enye eneneŋere okop idem ke otu mbufo.

⁴Koro ekowot Enye ke cross ke mmem-idem, edi Enye ke odudu uwem ke emi ke odudu Abasi. Nnyin nde idi mmeme ke Enye, edi iyeda odudu Abasi isaŋa ye Enye idu uwem inɔ mbufo.

⁵Edomo idem mbufo ese mme mbufo edu ke mbuɔtidem: etim edomo idem mbufo efiɔk. Nte mbufo ifiɔkke ibaŋa idem, ite, Christ oduŋ mme imɔ ke esit? Edieke midige ntre, mbufo edi mbukpo owo.

⁶Edi mmodori enyin nte mbufo emefiɔk ete nnyin idige mbukpo.

⁷Imekpe Abasi ubɔk ite mbufo ekudue ke baba ŋkpɔ kiet; ibeŋeke man ikpetie nte nti owo, edi man mbufo enam se inende okposuk edi nte ebatde nnyin nte mbukpo owo.

⁸Koro nnyin mikemeke ndinam ŋkpɔ mbiɔŋɔ akpanikɔ, edi inanam ŋkpɔ ida ye akpanikɔ.

⁹Nnyin idat esit ke ini imemde, edieke mbufo esɔŋɔde idem.

¹⁰Nnyin inyuŋ ibeŋe ntem, ite mbufo ekpekam ekabare efɔn ema. Emi esin ŋwet mme ŋkpɔ nnɔ mbufo ke ini mmenduhe kaŋa do, mbak ami ndisɔŋ ido ye mbufo, ke ini ndidide ke ɔtɔ mbufo, ye odudu eke Ɔbɔŋ ɔkɔnɔde mi ndida nnam mbufo ekɔri ke ido Esie, idige ndida nsuan mbufo.

¹¹Ke akpatre ikɔ, nditɔ-ete, etie suŋ. Ekabare efɔn ema; ekut ndɔŋesit; enyene esit kiet; etie emem-emem; ndien Abasi ima ye emem eyedu ye mbufo.

¹²Ekɔm kiet eken ye edisana ntim-inua.

¹³Kpukpru ikɔt Abasi ete ekɔm mbufo.

¹⁴Mfɔn Ɔbɔŋ Jesus Christ, ye ima Abasi, ye nsaŋa Edisana Spirit, akpakam odu ye mbufo kpukpru.