Read efik 2 ŊWED CORINTH 2 Bible Online

2 ŊWED CORINTH 2 - efik bible

2 ŊWED CORINTH 2

¹EDI mma mbiere ye idem mi nte, nditɔŋɔke ntak nda mfuhɔ ndi ke ɔtɔ mbufo.

²Koro edieke ami nnamde mbufo mfuhɔ, anie ndien anam mi ndat esit, ke midige kpa enye emi ami nnamde enye mfuhɔ?

³Ntem ŋkewet ŋwed ke ntak emi, mbak ndidi ndibɔ mfuhɔ ke ubɔk mmɔ emi ekpenamde mi idaresit; koro mburede mfiɔk mbaŋa kpukpru mbufo, nte idaresit mi edi idaresit kpukpru mbufo.

⁴Koro ŋketie ke akwa ukut ye mbaba esit ŋwet ŋwed oro nnɔ esɔk mbufo ye ediwak mmɔŋ-eyet; ŋkewetke man nnam mbufo mfuhɔ, edi man mbufo efiɔk ima mi eke awakde eti-eti ye mbufo.

⁵Edi edieke owo kiet ekededi ekesinde mfuhɔ odu, idige ami ikpɔŋ-ikpɔŋ ke enye anam mfuhɔ, edi kpukpru mbufo, mkpakam ndɔhɔ nte, ndusuk mbufo, man ŋkubiom enye ŋkaha.

⁶Ufen emi ediwak mbufo ema emia utɔ owo emi ekem;

⁷ntre ke mbufo ekpekam efen enye, enyuŋ edɔŋ enye esit, mbak akakan mfuhɔ edimen enye emen.

⁸Ntre ke mmekpe mbufo ubɔk, nte enam ima eke mbufo emade enye aŋwaŋa enye ke enyin.

⁹Koro ŋkonyuŋ ŋwet ŋwed nnɔ esɔk mbufo ye ntak emi, man ndomo mbufo mfiɔk mme mbufo enyime ndinam nte ntemede ke kpukpru ŋkpɔ.

¹⁰Owo emi mbufo efende enye ŋkpɔ ke ami mfen ŋko; koro se ededi eke ami ŋkefende enye, edieke ŋkefende enye ŋkpɔ, ŋkefen enye ke iso Christ ke ntak mbufo;

¹¹mbak Satan edikan nnyin ke baba usuŋ kiet; koro nnyin minanake ifiɔk ibaŋa ŋkari ye ŋkukan esie.

¹²Edi kadaŋemi ŋkosimde Troas ndikwɔrɔ gospel Christ, ndien ebererede usuŋ enɔ mi ke Ɔbɔŋ,

¹³nnyeneke nduɔk-odudu ke spirit mi, sia mmeŋkwe Titus eyen-ete mi. Ntre ke ndaha ŋkpɔŋ mmɔ, nsio ŋka Macedonia.

¹⁴Edi ekɔm enyene Abasi, emi adade nnyin asaŋa ubɔŋ-ubɔŋ ke Christ kpukpru ini, onyuŋ adade nnyin anam owo ekop ufik ifiɔk Esie ke kpukpru ebiet.

¹⁵Nnyin itie nte edinem ufik, emi Christ osioŋode ɔnɔ Abasi, ye mmɔ emi enyanyaŋa ye mmɔ emi etatak;

¹⁶ye mmɔ emi, nte ufik eke ɔkɔrɔde mkpa ke mkpa, ye ye mmɔ eken, nte ufik eke ɔkɔrɔde uwem ke uwem.

¹⁷Ndien anie ekeme ndinam utɔ utom oro? Nnyin imekeme; koro nnyin itiehe nte ediwak owo emi enyanyam ikɔ Abasi eŋwana udori; edi itiŋ ikɔ ke Christ ke iso Abasi, nte owo emi edide owo akpanikɔ ye owo Abasi etiŋde.