Read efik 2 ŊWED CORINTH 3 Bible Online

2 ŊWED CORINTH 3 - efik bible

2 ŊWED CORINTH 3

¹NTE imɔŋ inyuŋ itɔŋɔ ntak imana itoro idem nnyin? Mme ana nte ibɔ ŋwed itoro ida isɔk mbufo, mme ibɔ mbufo ŋwed itoro ida isɔk mmɔ eŋwen, nte ndusuk owo enyenede ndinam?

²Mbufo edi ŋwed nnyin, emi ewetde ke esit nnyin, emi kpukpru owo efiɔkde enyuŋ ekotde.

³Ana aŋwa-aŋwa ete mbufo edi ŋwed Christ emi nnyin ikamade isaŋa, ŋwed emi mikewetke ke mmɔŋ-ŋwet, edi ewetde ke Spirit Abasi uwem; emi miwetke ke ŋkpɔ-uwet-ŋwed eke edade itiat enam, edi ewet ke ŋkpɔ-uwet-ŋwed eke edide esit owo.

⁴Edi emi edi oruk mbuɔtidem eke Christ esinde nnyin ke esit ke utom eke nnyin inamde inɔ Abasi.

⁵Emi iwɔrɔke ite nnyin imekeme ke idem nnyin ndibiere ŋkpɔ ekededi ke odudu idem nnyin:

⁶ukeme nnyin oto Abasi; emi okonyuŋ anamde nnyin ikem ndidi mme asaŋa-utom obufa ediomi; emi midige ediomi eke ewetde wet, edi edi ediomi eke ebɔpde ke spirit; koro se ewetde owotde wot, edi spirit ɔnɔnɔ uwem.

⁷Edi edieke erida ediomi mkpa ndi, eke ewetde enyuŋ ekapde ke itiat, akasaŋade ye ubɔŋ edi, tutu nditɔ Israel ikemeke ndiwuk enyin nse Moses iso, ɔnɔ ubɔŋ iso esie eke ɔtɔtɔŋɔ ndinime;

⁸adaŋa didie akan ke erida ediomi spirit ndi edisaŋa ye ubɔŋ.

⁹Koro edieke erida ubiom-ikpe ndi akasaŋade ye ubɔŋ, erida edinen ido ndi enyene ubɔŋ eke okponde akan eti eti.

¹⁰Koro ke akpanikɔ se ikenyenede ubɔŋ inyeneke aba ubɔŋ oto ke ubɔŋ eke okponde ebe.

¹¹Koro edieke se ibebe ifep ekenyenede ubɔŋ, se midibehe ifep enyene ubɔŋ eke okponde akan eti eti.

¹²Sia nnyin inyenede oruk idori enyin emi, itetiŋ ikɔ ye akwa uko; ntiehe nte Moses,

¹³emi akadade ufuk-iso okui iso, mbak nditɔ Israel ediwuk enyin ese utit ubɔŋ oro ebebe efep.

¹⁴Edi esit mmɔ akabare ɔsɔŋ: koro tutu osim mfin emi, ke adaŋemi ekotde ŋwed akani ediomi, ufuk-iso oro osuk odu do; iŋwaŋake kaŋa mmɔ ke enyin, ete Christ ama anam ubɔŋ oro ebe efep.

¹⁵Edi tutu osim mfin emi, ke ini ekotde ŋwed Moses, ufuk-iso oro ɔkɔŋɔ ke esit mmɔ.

¹⁶Edi ini ekededi mmɔ ewɔŋɔrede etiene Ɔbɔŋ, emen ufuk-iso oro efep.

¹⁷Edi Ɔbɔŋ edi Spirit; ndien ɔtɔ nte Spirit Ɔbɔŋ odude, ubɔhɔ-ufin etiene odu do ŋko.

¹⁸Edi kpukpru nnyin imada iso emi mikuihi, imum ubɔŋ Ɔbɔŋ ikama, nte ukuriso omumde ŋkpɔ; ntre ke nnyin ikpuhɔre ibe ikabare inyene mbiet Esie, ikɔrɔ ubɔŋ ke ubɔŋ, kpa nte Ɔbɔŋ emi edide Spirit anamde.