Read efik 2 ŊWED CORINTH 4 Bible Online

2 ŊWED CORINTH 4 - efik bible

2 ŊWED CORINTH 4

¹MMƆDO sia nnyin inyenede utom emi ite inam, kpa nte Abasi akatuade nnyin mbɔm, esit iduɔhɔ nnyin:

²edi imakpaŋa nsa ye ndibe-ndibe ido eke enyenede but, isaŋake ke ŋkari, inyuŋ idaha nsu ibuak ye ikɔ Abasi; edi ke erisian se idide akpanikɔ aŋwa-aŋwa, ke inam kpukpru owo efiɔk ke esit mmɔ, ete nnyin inanam se inende ke iso Abasi.

³Edi edieke gospel nnyin odibede owo ndien, odibe mmɔ emi etatak;

⁴emi abasi eyo emi akanamde ikike mmɔ eke minimke ke akpanikɔ okim, mbak uŋwana gospel ubɔŋ Christ, emi edide mbiet Abasi, edisem ɔnɔ mmɔ.

⁵Koro idige idem nnyin ke nnyin ikwɔrɔ, edi Christ Jesus, ite, Enye edi Ɔbɔŋ, inyuŋ ikwɔrɔ ibaŋa idem nnyin, ite, idi ifin mbufo kabaŋa Jesus.

⁶Sia edide Abasi, emi ɔkɔnɔde uyo ete, Yak uŋwana ayama ke ekim, akayama nnyin ke esit, man Enye aŋwaŋare owo enyin ndifiɔk ubɔŋ Abasi ke iso Jesus Christ.

⁷Edi nnyin ikama ɔsɔŋurua ŋkpɔ emi ke abaŋ mbat, man akwa ubom odudu esie okpoto Abasi, itoho nnyin.

⁸Nnyin ikop mfihe ke kpukpru edem, edi iduhe ke mbaba; efina nnyin ekikere,

⁹edi itiehe ke ŋkim-enyin; esin nnyin enyin, edi Abasi ikpɔŋke nnyin; eyibi nnyin eduɔk ke isɔŋ, edi ibiatke nnyin uwem;

¹⁰kpukpru ini ke ibiom eriwot eke ewotde Jesus ke ikpɔhidem nnyin isaŋa, man uwem Jesus nde ɔwɔrɔ owut idem ke ikpɔhidem nnyin.

¹¹Koro kpukpru ini ke edada nnyin ye uwem eyak enɔ mkpa kabaŋa Jesus, man uwem Jesus onyuŋ ɔwɔrɔ owut idem ke obukidem nnyin emi edikpade.

¹²Ntem ndien ke mkpa ananam nnyin utom ke idem, edi uwem ananam mbufo utom ke idem.

¹³Edi sia nnyin inyenede spirit mbuɔtidem kiet ye enye emi ewetde ete, Mmonim ke akpanikɔ, nnyuŋ ntiŋ; nnyin nde imonim ke akpanikɔ, inyuŋ itiŋ;

¹⁴ke ifiɔkde ite Enye, emi akanamde Ɔbɔŋ Jesus eset ke mkpa, eyenam nnyin nde iset ye Jesus, eyenyuŋ ada nnyin ye mbufo onim ke iso Esie.

¹⁵Koro kpukpru ŋkpɔ ewɔrɔ kabaŋa ufɔn mbufo, man mfɔn Abasi ɔdɔdiɔŋ awak oto ke ediwak owo, onyuŋ anam ekɔm awak akan, ɔnɔ Abasi ubɔŋ.

¹⁶Ke ntak emi esit iduɔhɔ nnyin; edi okposuk edi nte ikpɔhidem nnyin ataharede, idem nnyin emi odude ke esit-esit ke akabare edi obufa, ke usen ke usen.

¹⁷Koro mfefere ukut nnyin, emi midibigike bigi, ɔdɔdiɔŋ anam nnyin inyene nsinsi ubɔŋ, eke okponde odobi;

¹⁸sia nnyin midɔŋke enyin ke se owo okutde ke enyin, edi idɔŋ enyin ke se owo mikwe ke enyin; koro se owo okutde ke enyin edibede efep, edi se owo mikwe ke enyin eyebigi ke nsinsi-nsinsi.