Read efik 2 ŊWED CORINTH 5 Bible Online

2 ŊWED CORINTH 5 - efik bible

2 ŊWED CORINTH 5

¹KORO nnyin imɔfiɔk ite, edieke ataya eke idaŋde ke esit ke isɔŋ emi owurede, imenyene ufɔk eke Abasi ɔnɔde, eke midaha ubɔk owo ibɔp, eke ebigide ke nsinsi ke heaven.

²Koro ke ini idaŋde ke ataya emi, idu ke mmum; ke ɔdɔŋ nnyin eti-eti ndiduk nsine ebiet iduŋ emi otode heaven,

³koro ima idoduk isine ke esit, eridi Ɔbɔŋ idisimke nnyin iferi.

⁴Ke akpanikɔ nnyin emi idaŋde ke ataya emi idu ke mmum, koro efefihe nnyin ke esit; emi iwɔrɔke ite, nnyin iyom efɔrɔre nnyin ikpɔhidem eduɔk, edi iyom esine nnyin ŋkpɔ ke idem edori, man uwem ekpemen se inyenede ndikpa emen.

⁵Edi Enye emi ekebeŋede nnyin onim ɔnɔ ŋkpɔ emi edi Abasi, emi ɔkɔnɔde nnyin Spirit nte akpa ubak udeme nnyin.

⁶Mmɔdo nnyin ikokop isɔŋ-esit kpukpru ini, inyuŋ ifiɔk ite, adaŋa ini nte nnyin idodu ke ikpɔhidem, iduhe ɔtɔ kiet ye Ɔbɔŋ;

⁷(koro isasaŋa ke mbuɔtidem idu uwem, isaŋake ke erikut ke enyin);

⁸Ŋkɔm ikokop isɔŋ-esit, onyuŋ odu nnyin ke udɔŋ akan ndidaha ŋkpɔŋ ikpɔhidem ŋkodu ye Ɔbɔŋ.

⁹Emi onyuŋ esin nnyin iŋwana, ye idude uwem ye miduhe ke ini Enye edide, ndinem Enye esit.

¹⁰Koro kpukpru nnyin inyene ndiwɔrɔ nyarare ke iso itie-ikpe Christ; man owo kiet kiet ɔbɔ utip eke ekemde ye se enye akanamde ke ikpɔhidem, ye ŋkpɔ oro edide eti, ye onyuŋ edide idiɔk.

¹¹Sia nnyin ifiɔkde ndik Ɔbɔŋ ndien, imekpe ye owo, edi imayarare iwut Abasi idem; mmonyuŋ ndori enyin nte nnyin iyarare ke esit mbufo nde.

¹²Nnyin itɔŋɔke ntak itoro idem inɔ mbufo, edi itiŋ, man inɔ mbufo ntak ndida mbure mbure mbaŋa nnyin, man mbufo enyene se edade ebɔrɔ mmɔ emi eburede ke nnam-ŋwut, midige ke esit.

¹³Koro edieke ibuot ɔbɔhɔde nnyin, ɔwɔrɔ nnyin ntre ɔnɔ Abasi; onyuŋ edieke nnyin inyenede eti ibuot, edi man ɔfɔn ye mbufo.

¹⁴Koro ima Christ efefik nnyin; koro ida ntem ite, Owo kiet ama akakpa abaŋa kpukpru owo, kpukpru owo ekpaŋa ndien;

¹⁵Enye okonyuŋ akpa abaŋa kpukpru owo, man mme odu-uwem ekudu uwem aba enɔ idem mmɔ, edi edu uwem enɔ Enye emi akakpade abaŋa mmɔ, onyuŋ esetde.

¹⁶Ntre ɔtɔŋɔde ke emi nnyin ifiɔkke owo ke ido obukidem; ekpedi nte ikɔfiɔkde Christ ke ido obukidem, ifiɔkke Enye aba ke usuŋ oro.

¹⁷Ntem edieke owo odude ke Christ, ema ebot enye obufa; ŋkani ŋkpɔ ema ebe efep: sese, emekabare edi mbufa.

¹⁸Edi kpukpru ŋkpɔ eto Abasi, emi akamade nnyin itie ke emem ye Enye ke Christ, okonyuŋ ɔnɔ nnyin utom, ete nnyin inam owo etie ke emem ye Enye;

¹⁹ete, ke Christ Abasi ke ananam ererimbot etie ke emem ye Enye, ke mibatke ndudue owo inɔ mmɔ; okonyuŋ emen ikɔ erikabare ntie ke emem ye Enye esin nnyin ke ubɔk ete ikwɔrɔ.

²⁰Ntre ke nnyin idi mme isuŋutom emi edide ke enyiŋ Christ, nte ŋkpɔ eke Abasi adade nnyin ekpe ye mbufo; imekpe mbufo ubɔk ke ibuot Christ, ekabare etie ke emem ye Abasi.

²¹Abasi akanam Enye emi mikɔfiɔkke idiɔk-ŋkpɔ akabare edi idiɔk-ŋkpɔ ke ntak nnyin; man nnyin ikabare idi edinen ido Abasi ke Enye.