Read efik 2 ŊWED CORINTH 6 Bible Online

2 ŊWED CORINTH 6 - efik bible

2 ŊWED CORINTH 6

¹NTE mme abuana-utom ye Abasi, nnyin ikpe mbufo ubɔk ite, ekuyak mfɔn Abasi, emi mbufo ekɔbɔde, ɔwɔrɔ ikpikpu;

²(koro Enye ɔdɔhɔ ntem ete, Mma nyere fi ke ini mfɔn-ido, Mma nnyuŋ nnyaŋa fi ke usen erinyaŋa. Sese, ini mfɔn-ido mi; sese, usen erinyaŋa mi).

³Nnyin inimke ubiɔŋɔ baba kiet ke afaŋ mbufo, mbak owo editiŋ ŋkpɔ abiat utom eke inamde:

⁴Edi ke kpukpru usuŋ imowut ite idi ata mme asaŋutom Abasi, ke akwa erime ime, ke ukut, ke mfihe, ke mbaba,

⁵ke ikpa, ke ŋkpɔkɔbi, ke itie ndutime, ke ɔkpɔsɔŋ utom, ke ataba idap, ke erikpa biɔŋ;

⁶ke edisana ido, ke ifiɔk, ke anyan ime, ke mfɔn-ido, ke spirit eke asanade, ke ata ima, ke ikɔ akpanikɔ, ke odudu Abasi;

⁷ke erisaŋa ye ŋkpɔ-ekɔŋ edinen ido ke ubɔk nnasia ye ufien;

⁸ke ini ukpono ye ke ini esuene, ke idiɔk etop eke esiode nnyin, ye ke eti etop; ebat nnyin ke owo abiaŋa, edi nnyin idi owo akpanikɔ;

⁹Ebat nnyin ke didie-didie owo, edi idi ɔwɔrɔ-iso owo; ete, enye edi owo emi oyomde ndikpa, edi sese, ke isuk idodu uwem; ete, enye edi owo emi Abasi ɔtunɔde, edi iwotke wot nnyin; ete enye edi owo mfuhɔ,

¹⁰edi idu ke idaresit kpukpru ini; ete, enye edi idem-idem owo, edi ke inanam ediwak owo ekabare mbon inyene; ete, enye inyeneke baba ŋkpɔ kiet, edi imenyene kpukpru ŋkpɔ.

¹¹Imatat inua itiŋ ikɔ aŋwa-aŋwa inɔ mbufo, O mbon Corinth; imenyene iŋwaŋ-iŋwaŋ esit ye mbufo.

¹²Idige nnyin inam esit afaha mbufo, edi unana mbɔm anam esit mbufo afaha nnyin.

¹³Enɔ nnyin usiene eke ekemde se inɔde mbufo (ntiŋ emi nte etiŋde enɔ nditɔwɔŋ) enyene iŋwaŋ-iŋwaŋ esit ye nnyin.

¹⁴Ekubɔp idem utiŋe-utiŋe ye mmɔ eke minimke ke akpanikɔ.

¹⁵Nso udeme ke edinen ido enyene ye ukwaŋido? Nso abuana ke uŋwana enyene ye ekim? Nso nduk ke Christ oduk ye Belial? Nso udeme ke andinim ke akpanikɔ enyene ye owo eke minimke ke akpanikɔ?

¹⁶Nso ediomi ke temple Abasi odiomi ye ndem? Koro nnyin idi temple Abasi uwem; kpa nte Abasi ɔdɔhɔde ete, Nyeduŋ, nyenyuŋ nsaŋa ke otu mmɔ, Ndien nyedi Abasi mmɔ, mmɔ eyenyuŋ edi ikɔt Mi.

¹⁷Mmɔdo, Jehovah ɔnɔ uyo ete, Ewɔŋɔ ke otu mmɔ, enyuŋ edianare eda. Ekunyuŋ etuk ŋkpɔ ndek baba kiet; Ndien nyedara mbufo,

¹⁸Nnyuŋ ndi Ete mbufo. Ndien mbufo eyedi nditɔ iren Mi ye nditɔ Mi iban. Ntem ke Jehovah Ata Ɔkpɔsɔŋ ɔdɔhɔ.