Read efik 2 ŊWED CORINTH 7 Bible Online

2 ŊWED CORINTH 7 - efik bible

2 ŊWED CORINTH 7

¹SIA nnyin imenyene mme uŋwɔŋɔ emi, ndima mi, eyak nnyin iyet kpukpru se isabarede obukidem ye spirit ifep ke idem nyin, inam nti ido nnyin efɔn ema ke eribak Abasi.

²Enɔ nnyin afaŋ ke esit mbufo; nnyin ikeduehe baba owo kiet, ikabiatke baba owo kiet, ikotukke baba owo kiet.

³Ndɔhɔke emi man mbiom mbufo; koro ŋkebem iso ndɔhɔ nte, ŋkama mbufo ke esit nnyin nsaŋa, ntiene mbufo ŋkpa mkpa, nnyuŋ ntiene mbufo ndu uwem.

⁴Uko eke nnyenede ye mbufo omokpon, mbure eke mburede mbaŋa mbufo omonyuŋ okpon; mmɔyɔhɔ ye ndɔŋesit, nnyuŋ nnyene ɔyɔhɔ idaresit ke kpukpru ukut mi.

⁵Koro kpa ke ini nnyin isimde Macedonia, ikopde nduɔk-odudu ke obukidem; efefik nnyin ke kpukpru ŋkan; eŋwan odu nnyin ke edem, ndik odu nnyin ke esit.

⁶Edi Abasi emi ɔdɔŋde mbon nsuk-idem esit, ada eridi Titus ɔdɔŋ nnyin esit;

⁷inyuŋ idaha eridi esie ikpɔŋ, edi ada ndɔŋesit, emi enye ɔkɔbɔde ke ubɔk mbufo, ɔdɔŋ nnyin esit ŋko; enye asian nnyin nte itɔŋ mi ɔdɔŋde mbufo, ye nte mbufo efuhɔde ebaŋa mi, enyuŋ ekopde ufup ebaŋa mi; ntre ke ndɔdiɔŋ ndaresit ŋkan.

⁸Koro edieke ŋkadade ŋwed mi nnam mbufo efuhɔ, ntuaha mkpɔfiɔk; edi ŋkatua mkpɔfiɔk, ke adaŋemi ŋkutde nte se ŋwetde anam mbufo efuhɔ ke ekpri ibio ini.

⁹Ke emi mmadat esit; idige koro ŋkanamde mbufo efuhɔ, edi koro mfuhɔ mbufo ɔwɔrɔde edi erikabare esit. Koro mbufo efuhɔ nte ekemde ye ido Abasi, man baba ŋkpɔ kiet okutak mbufo oto ke nnyin.

¹⁰Koro mfuhɔ ido Abasi anam owo akabare esit osim erinyaŋa, eke owo mikemeke ndiseme;

¹¹edi mfuhɔ ido ererimbot ɔsuŋɔ ke mkpa. Mbufo ese kpa idem erifuhɔ emi mbufo efuhɔde, eke ekemde ye ido Abasi; nte enye anamde mbufo etiŋ enyin ekere ŋkpɔ, nte enye esinde mbufo ekaŋ idem, enyuŋ eyat esit; enyuŋ ekop ndik, enyuŋ enyene udɔŋ, enyuŋ ekop ufup, enyuŋ esio usiene. Ke kpukpru usuŋ mbufo emowut idem nte owo emi esanade ke ŋkpɔ emi.

¹²Ntre se ŋkewetde nnɔ mbufo, ke ŋwetke kabaŋa andinam idiɔk, ŋkonyuŋ ŋwetke kabaŋa andikut idiɔk; edi ŋkewet, man ayarare ɔnɔ mbufo ke iso Abasi, ete, mbufo emeneŋere ekere nnyin.

¹³Emi edi se inɔde nnyin ndɔŋesit. Ndien ke ufɔt ndɔŋesit nnyin, ndat esit ŋkakaha mbaŋa idaresit Titus, koro kpukpru mbufo emanam uwem eset enye ke idem.

¹⁴Koro edieke ŋkoburede mbure nnɔ enye mbaŋa mbufo ke usuŋ ekededi, ndiaha but; edi nte kpukpru se iketiŋde ye mbufo edide akpanikɔ, kpa ntre ŋko kpukpru mbure eke mburede nnɔ Titus mbaŋa mbufo ɔwɔrɔ edi akpanikɔ.

¹⁵Ndien enye ɔdɔdiɔŋ ama mbufo ke esit esie, ke ini enye etide nte mbufo kpukpru ekopde uyo esie, enyuŋ edade enye ke ndik ye nnyek-idem.

¹⁶Mmadara koro mmenyene esit mbaŋa mbufo ke kpukpru ŋkpɔ.