Read efik ŊWED MBON GALATIA 2 Bible Online

ŊWED MBON GALATIA 2 - efik bible

ŊWED MBON GALATIA 2

¹EKEM ke isua duopenaŋ ema ekebe, nsaŋa ye Barnabas ntɔŋɔ ntak ndɔk ŋka Jerusalem, nda Titus ŋko ŋka.

²Ndien ŋkaka ke ntak eke Abasi owutde mi; nnyuŋ mmen gospel emi ŋkwɔrɔde ke otu mme Gentile nnim mmɔ ke iso, edi mmen ke ndibe nnim ke iso mmɔ emi edide mme ɔwɔrɔ-etop, mbak ke usuŋ ekededi itɔk eke mfehede ye itɔk eke ŋkefefehe ediwɔrɔ ikpikpu.

³(Edi ikenyikke kpa Titus, eyen Greek emi odude ye ami, ana mbobi).

⁴Edi nnim gospel mi ke iso mmɔ kabaŋa nditɔ-ete abiaŋa emi edipde idem eduk edi ndiyep itie eyen-isɔŋ emi nnyin inyenede ke Christ Jesus, man eda nnyin eduk ufin:

⁵edi nnyin inyimeke uyo mmɔ, inyuŋ isukke ibuot inɔ mmɔ baba esisit, man akpanikɔ gospel osuk odu ye mbufo.

⁶Edi mmɔ oro ebatde ke ikpɔ owo (mmɔ edi se ededi, ibeheke mi do; Abasi iteŋeke owo enyin)—mme ɔwɔrɔ-etop oro ikɔrɔke mi baba obufa item kiet;

⁷edi ke ini mmɔ ekutde ete, ekenɔ mi gospel nda ŋkwɔrɔ nnɔ mmɔ emi minaŋa mbobi, kpa nte ekɔnɔde Peter gospel ada ɔkwɔrɔ ɔnɔ mme ana-mbobi

⁸(koro Enye emi akanamde Peter akabare edi apostle mme ana-mbobi okonyuŋ anam mi ŋkabare ndi apostle mme Gentile);

⁹ke ini mmɔ efiɔkde ufɔn eke Abasi ɔkɔnɔde mi, James ye Cephas ye John, emi ebatde mmɔ nte mme adaha, ekam enɔ mi ye Barnabas ubɔk nnasia nsaŋa, ete nnyin itiene mme Gentile, mme imɔ inyuŋ itiene mme ana-mbobi.

¹⁰Edi ukure-ŋkpɔ mmɔ ebeŋe nnyin ete, iti nditɔ ubuene; ŋkpɔ emi edi se nsinde ifik nnam.

¹¹Edi ke adaŋemi Cephas ama edi ke Antioch, mbiɔŋɔ enye iso ye iso, koro enye anamde se ibiomde enye.

¹²Koro ke ini ndusuk nditɔ-ete mika-itoho kaŋa ke ɔtɔ James idi, enye adadia ŋkpɔ ye mme Gentile; edi ke ini mmɔ edide, enye ke ododudi idem afiak adianare ye mme Gentile, koro enye efehede mme ana-mbobi.

¹³Mme Jew eken enyuŋ etiene enye enam mbubik ido oro, tutu enam kpa Barnabas awaha ɔduɔ oduk ke mbubik mmɔ.

¹⁴Edi ke adaŋemi ŋkutde nte mmɔ ineŋekere isaŋa ikekem ye akpanikɔ gospel, ndɔhɔ Cephas ke iso kpukpru mmɔ nte, Edieke afo, emi edide Jew, adade ido mme Gentile odu uwem, mudaha ido mme Jew, nsinam afo enyikde mme Gentile eda ido mme Jew edu uwem?

¹⁵Sia nnyin, emi idide mme Jew ke uduot nnyin, minyuŋ idige mme anam-idiɔk emi etode ke otu mme Gentile,

¹⁶ifiɔkde ite inɔŋɔ owo utebe-ikpe ke ntak erinam utom ibet, edi ke ntak mbuɔtidem eke enye enyenede ke Christ Jesus ikpɔŋ-ikpɔŋ, kpa nnyin ŋko ikɔbuɔt idem ye Christ Jesus, man ikpe ekpetebe nnyin ke ntak mbuɔtidem nnyin ye Christ, idige ke ntak erinam utom ibet; koro baba owo kiet midikwe utebe-ikpe ke ntak erinam utom ibet.

¹⁷Edi edieke nnyin ikenyenede ndida itie mme anam-idiɔk, ke adaŋemi nnyin iyomde etebe nnyin ikpe ke Christ, nte Christ oduk nsaŋa-utom ye idiɔk-ŋkpɔ? Idige ntre.

¹⁸Koro edieke ntɔŋɔde ntak mbɔp se ŋkowuride, mmowut nte ndi abiat-ibet.

¹⁹Koro ŋkada ibet ŋkpa ŋkpɔŋ ibet, man ŋkpodu uwem nnɔ Abasi.

²⁰Ema ewot mi ke cross ye Christ; edi ke ndodu uwem; edi idige aba ami ke idem mi ke ndu uwem, edi Christ ke odu uwem ke esit mi. Ndien uwem eke ndude ke obukidem ke emi, ke ndu ke mbuɔtidem, kpa mbuɔtidem eke nnyenede ye Eyen Abasi, emi akamade mi, okonyuŋ ayakde Idem Esie ɔnɔ abaŋa mi.

²¹Nnamke mfɔn Abasi okpu: koro edieke enɔde owo edinen ido oto ke erinim ibet, mkpa Christ ɔkɔwɔrɔ ikpikpu naŋa.