Read efik ŊWED MBON GALATIA 3 Bible Online

ŊWED MBON GALATIA 3 - efik bible

ŊWED MBON GALATIA 3

¹O MBON Galatia, emi enanade ibuot, anie ekebre esin mbufo ewɔŋɔre ekpɔŋ Jesus Christ; emi ekosiode ke iso mbufo nte owo emi ewotde ke cross?

²Emi edi ukure se nyomde mbufo esian mi; nte mbufo ekebɔ Spirit koro enamde utom ibet, mme koro mbufo ekopde ikɔ Abasi ye mbuɔtidem? Nte mbufo enana ibuot ntre?

³Ke ema eketɔŋɔ uwem ke Spirit, nte emɔŋ edinam mbufo efɔn ema ke obukidem?

⁴Nte ekokut uwak ukut ntem ke ikpikpu? edike edide ke ikpikpu ke akpanikɔ.

⁵Nte Enye, emi ɔnɔde mbufo Spirit, onyuŋ anamde mme utibe-ŋkpɔ ke otu mbufo, anam ntre koro mbufo enamde utom ibet, mme koro mbufo ekopde ikɔ ke mbuɔtidem?

⁶Kpa nte Abraham ɔkɔbuɔtde idem ye Abasi, ndien ebat oro enɔ enye ke edinen ido.

⁷Efiɔk ndien ete, mmɔ eke mbuɔtidem edi nditɔ Abraham.

⁸Edi ŋwed Abasi, sia ekebemde iso okut ete Abasi eyetebe mme Gentile ikpe ke ntak mbuɔtidem, ebem iso ɔkwɔrɔ ikɔ ufɔn ɔnɔ Abaraham ete, Oto fi ke kpukpru mme idut eyekut ufɔn.

⁹Mmɔdo ndien mmɔ eke mbuɔtidem etiene Abraham emi ɔkɔbuɔtde idem ekut ufɔn.

¹⁰Koro kpukpru mmɔ eke erinam utom ibet edu ke idak isuŋi: koro ewetde ete, Ɔdɔdiɔk ɔnɔ kpukpru owo emi miyireke ke kpukpru mme item eke ewetde ke ŋwed ibet, ite inim mmɔ.

¹¹Edi otim ayarare ete ikpe itebeke baba owo kiet ke iso Abasi ke ntak erinim ibet: edi ete, Edinen owo edida mbuɔtidem odu uwem.

¹²Edi ibet isaŋake ŋkpɔ ye mbuɔtidem; edi, Owo eke onimde ibet edida ibet odu uwem.

¹³Christ akafak nnyin osio ke isuŋi ibet emi odorode nnyin, sia Enye amakabare edi ŋkpɔ isuŋi ke ibuot nnyin; koro ewetde ete, owo eke eyiride ke eto edi ŋkpɔ isuŋi Abasi;

¹⁴man oto do ufɔn eke Abraham okokutde okposim mme Gentile ke Christ Jesus; man nnyin ikponyuŋ ida mbuɔtidem ibɔ Spirit emi Abasi ɔkɔŋwɔŋɔde ndinɔ.

¹⁵Nditɔ-ete, ntiŋ ŋkpɔ nsin ke nde edu owo. Ke adaŋemi owo ɔsɔŋɔde ediomi, baba owo kiet ibiatke ediomi oro, inyuŋ idianke ŋkpɔ ke esit.

¹⁶Edi ekeŋwɔŋɔ mme uŋwɔŋɔ enɔ Abraham ye eyen emi enye edibonde. Idɔhɔke enye ete, Nditɔ emi afo edibonde, nte ŋkpɔ eke mmɔ edide ediwak; edi etiŋ nte owo etiŋ abaŋa owo kiet ete, Eyen emi afo edibonde; ndien Eyen oro edi Christ.

¹⁷Mmɔdɔhɔ ntem nte, Ibet, eke edide ke isua ikie inaŋ ye edip ye duop ema ekebe, ibiatke ediomi eke Abasi ekebemde iso ɔbɔp, inyuŋ isinke uŋwɔŋɔ Abasi ɔwɔrɔ ikpikpu.

¹⁸Koro edieke erida udeme nnyene asaŋade ye erinim ibet, isaŋake aba ye uŋwɔŋɔ: edi Abasi akada uŋwɔŋɔ emen ŋkpɔ emi ɔnɔ Abraham.

¹⁹Nso ke ikpɔdɔhɔ ndien ibaŋa ibet? Ekada ibet edisin, man ndudue owut idem, tutu Eyen oro ekeŋwɔŋɔde uŋwɔŋɔ enɔ Enye edidi; ekeda mme angel enɔ ibet, ke ubɔk owo emi esinede ke ufɔt.

²⁰Edi esine-ufɔt oro isaŋake ŋkpɔ ye Eyen kiet oro; edi Abasi edi kiet.

²¹Nte ibet aŋwana ndien ye mme uŋwɔŋɔ Abasi? Idige ntre. Koro edieke ekɔnɔde ibet emi ekemede ndinam owo odu uwem, ke akpanikɔ edinen ido okpoto ke ibet oro.

²²Edi ŋwed Abasi okokui kpukpru ŋkpɔ abaha esin ke idak idiɔk-ŋkpɔ, man ekpemen uŋwɔŋɔ, emi otode ke eribuɔt-idem ye Jesus Christ, enɔ mmɔ emi enimde ke akpanikɔ.

²³Edi ke ini mbuɔtidem oro mika-idige kaŋa, ekesin nnyin ke itie-ukpeme ke idak ibet, ebaha nnyin enim do enɔ mbuɔtidem eke ediyararede.

²⁴Ntem ke ibet ekedi andikpeme nnyin, emi adade nnyin ɔsɔk Christ, man enam ikpe etebe nnyin ke mbuɔtidem.

²⁵Edi kini mbuɔtidem ama ekedi, nnyin iduhe aba ke idak andikpeme.

²⁶Koro kpukpru mbufo edi nditɔ Abasi oto ke mbuɔtidem mbufo ke Christ Jesus.

²⁷Koro kpukpru mbufo emi ekanade baptism ebe eduk ke Christ ememen Christ esine.

²⁸Jew ye Greek ikemeke ndidu, ofin ye eyen-isɔŋ ikemeke ndidu, erenowo ye ŋwan inyuŋ ikemeke ndidu; koro kpukpru mbufo edi kiet ke Christ Jesus.

²⁹Edi edieke mbufo edide eke Christ, mbufo enyuŋ edi nditɔ Abraham; nte uŋwɔŋɔ edide, mbufo edi mme ada-udeme nyene.