Read efik ŊWED MBON GALATIA 4 Bible Online

ŊWED MBON GALATIA 4 - efik bible

ŊWED MBON GALATIA 4

¹EDI ndɔhɔ mbufo ntem nte, adaŋa ini nte eyen emi edi ediade ufɔk edide eyenɔwɔŋ, enye ikpuhɔkere ye ofin ke baba ŋkpɔ kiet, okposuk edi nte enye edide andinyene kpukpru ŋkpɔ:

²enye esine ke idak mme andikpeme ye mme akama-ukpɔhɔre, tutu osim ini eke ete esie ekebierede onim.

³Kpa ntre ŋko, ke adaŋemi nnyin ikedide nditɔwɔŋ, ema emum nnyin ekama ke ufin ke idak mme odudu emi ekarade ererimbot:

⁴edi ke adaŋemi ekemde uyɔhɔ ini, Abasi osio Eyen Esie ɔdɔŋ ŋwan aman Enye, Enye onyuŋ esine ke idak-ibet

⁵ete afak mmɔ emi edude ke idak ibet, man nnyin ikpɔbɔ itie nditɔ inyene.

⁶Ndien sia mbufo edide nditɔ, Abasi ama ɔdɔŋ Spirit Eyen Esie edidu nnyin ke esit ete, ikot Enye ite, Abba Ete.

⁷Ntre ke afo udige aba ofin, edi edi eyen; ndien edieke edide eyen, Abasi anam fi onyuŋ ada udeme enyene.

⁸Edi adaŋoro, sia mbufo mikɔfiɔkke Abasi, mbufo ekeduk ufin enɔ se midige Abasi ke uduot mmɔ;

⁹Edi ke emi mbufo ema ekefiɔk Abasi, ŋkpakam ndɔhɔ nte, ke emi Abasi ama ɔkɔfiɔk mbufo, nsinam mbufo efiakde ebine mmeme nditaha mme odudu oro, enyuŋ eyom nditɔŋɔ ntak nduk ufin nnɔ mmɔ?

¹⁰Mbufo ke enenim usen ye ɔfiɔŋ ye ini ye isua.

¹¹Mmenyene ndik mbaŋa mbufo, nte ndusuk ŋkakpa utom ikpikpu ke idem mbufo.

¹²Mmekpe mbufo ubɔk, nditɔ-ete, ekabare etie nte ami ntiede, koro ami ŋko mmakabare ntie nte mbufo etiede.

¹³Mbufo ikanamke mi baba idiɔk ŋkpɔ kiet. Mbufo efiɔk ete ke okoto mmemidem mi ŋkwɔrɔ gospel nnɔ mbufo ke eritɔŋɔ;

¹⁴ndien se ikpedide ŋkpɔ iduɔ inɔ mbufo ke obukidem mi, mbufo ikesehe ke ndek, inyuŋ isinke; edi mbufo ekadara mi nte angel Abasi, nte Christ Jesus.

¹⁵Idaresit oro mbufo ekekopde enye? Koro ndi ntiense nnɔ mbufo nte, edieke usuŋ okpodude, mbufo ekpewubere enyin mbufo esio enɔ mi.

¹⁶Nte mmekabare ndi asua mbufo koro nsiande mbufo akpanikɔ?

¹⁷Mmɔ oro esin esit ekpek mbufo, edi mmɔ inamke ke eti esit; mmɔ eyom ndibahare mbufo ye nnyin, man mbufo ekpek mmɔ.

¹⁸Ɔfɔn owo esin esit ekpek mbufo ke eti utom, edi emi ekpedi kpukpru ini, ikpedige ke ini ndude ye mbufo ikpɔŋ.

¹⁹Ŋkpri nditɔ mi, emi ntɔŋɔde ntak ndu ke ubiak uman mbaŋa mbufo, tutu Christ oboro mbufo ke esit;

²⁰ŋkpakam ndu ye mbufo ke emi, nnyuŋ ŋkpuhɔre uyo mi; koro esit oduyo mi abaŋa mbufo.

²¹Esian mi, mbufo emi eyomde ndidu ke idak ibet, nte mbufo ikopke ibet?

²²Koro ewet ete Abraham ekenyene nditɔ-iren iba, kiet oto ofin aŋwan, kiet oto amana-isɔŋ.

²³Eyen emi otode ofin aŋwan akamana nte ido obukidem edide, edi enye emi otode amana-isɔŋ akamana oto uŋwɔŋɔ Abasi.

²⁴Ŋke odu ke esit oruk ŋkpɔ emi esine. Iban iba emi edi ediomi iba; kiet oto ke Obot Sinai, aman nditɔ esin ke ufin, emi edide Hagar.

²⁵Koro Hagar oro edi Sinai, obot emi odude ke Arabia, Enye asaŋa ekekem ye Jerusalem emi odude ke emi; koro Jerusalem ye nditɔ esie etie ke ufin.

²⁶Edi Jerusalem emi odude ke enyɔŋ edi amana-isɔŋ, onyuŋ edi enye edi eka nnyin;

²⁷koro ewet ete, Dara O ada emi mumanke eyen; Bumere, fiori, afo emi mufiɔkke ubiak uman: Koro nditɔ ikpɔŋ aŋwan ewak ekan nditɔ ŋwan ndɔ.

²⁸Nditɔ-ete, mbufo edi nditɔ uŋwɔŋɔ nte Isaac ekedide.

²⁹Edi kpa nte eyen emi amanade ke ido obukidem ɔkɔkɔbɔde eyen emi amanade ke ido Spirit ke eyo oko, kpasuk ntre ke edi ke emi.

³⁰Edi ŋwed Abasi ɔdɔhɔ didie? ete, Bin ofin-aŋwan ye eyen esie duɔk: koro eyen ofin-aŋwan idinyeneke udeme ye eyen amana-isɔŋ.

³¹Ntem, nditɔ-ete, nnyin idige nditɔ ofin-aŋwan, edi idi nditɔ amana-isɔŋ.