Read efik ŊWED MBON EPHESUS 1 Bible Online

ŊWED MBON EPHESUS 1 - efik bible

ŊWED MBON EPHESUS 1

¹PAUL, emi edide apostle Christ Jesus oto ke uduak Abasi, ewet ɔnɔ esɔk ikɔt Abasi emi edude ke Ephesus, ye mbon akpanikɔ ke Christ Jesus.

²Mfɔn ye emem akpakam oto ke ubɔk Abasi Ete nnyin ye Ɔbɔŋ Jesus Christ etiene mbufo.

³Itoro enyene Abasi ye Ete Ɔbɔŋ nnyin Jesus Christ, emi akadade kpukpru ŋkpɔ mfɔn eke spirit ke mme itie heaven ɔdiɔŋ nnyin ke Christ.

⁴Abasi ekemek nnyin ke Enye ndien ediwuk adaha ererimbot, ete nnyin ikpasana inyuŋ inana ndo ke iso Imɔ.

⁵Ke ima Esie Enye ekebem iso ebiere onim ndida nnyin nsin ke ubon Esie nte nditɔ Esie oto ke Jesus Christ;

⁶enem Enye esit ndinam emi, man ɔwɔrɔ itoro ɔnɔ ubɔŋ mfɔn Esie, emi Enye ɔkɔfɔnde ye nnyin ke Eyen Ima Esie.

⁷Nnyin inyuŋ inyene ubɔhɔ-ufin nnyin ke Enye oto ke iyip Esie, kpa erifen mme idiɔk-ŋkpɔ nnyin, adaŋa nte mfɔn Esie awakde.

⁸Abasi okonyuŋ anam mfɔn Esie awak akan ɔnɔ nnyin eti-eti,

⁹ke erinɔ nnyin kpukpru ɔniɔŋ ye asian, onyuŋ anam nnyin ifiɔk ŋkpɔ eke okodibede ke esit Esie, kpa nte enemde Enye esit ndiduak ke Christ;

¹⁰ete Imɔ ikpataŋ kpukpru ŋkpɔ idɔŋ ke Christ, ŋkpɔ eke edude ke enyɔŋ, ye ŋkpɔ eke edude ke isɔŋ, man oto do Obio Ubɔŋ eke ekemde ye Uyɔhɔ ini edidaha ada.

¹¹Ke Christ enyuŋ enam nnyin (mme Jew) idi udeme Abasi, sia Enye, emi adade ekikere esit Esie anam kpukpru ŋkpɔ ewɔrɔ, ekebemde iso aduak ndinim nnyin nnɔ emi;

¹²man nnyin, emi ikebemde iso idori enyin ke Christ, ikpakabare inɔ ubɔŋ Esie itoro.

¹³Mbufo nde (mme Gentile) emokop ikɔ akpanikɔ ke Enye, kpa gospel erinyaŋa mbufo. Ke Enye ŋko, ke ini mbufo ema ekonim ke akpanikɔ, emada Edisana Spirit emi ekeŋwɔŋɔde efik mbufo idiɔŋɔ;

¹⁴kpa Spirit emi edide akpa ubak udeme nnyin, tutu osim ini eke edifakde ofuri udeme enɔ nnyin ida inyene, man ubɔŋ Abasi enyene itoro.

¹⁵Mmɔdo ami nde, ke mma ŋkokop mbaŋa mbuɔtidem eke mbufo enyenede ye Ɔbɔŋ Jesus,

¹⁶ye ima eke mbufo emade kpukpru ikɔt Abasi, ndopke ndinɔ ekɔm mbaŋa mbufo, nnyuŋ nsiak enyiŋ mbufo ke akam mi;

¹⁷Mmebeŋe nte Abasi Ɔbɔŋ nnyin Jesus Christ, Ete ubɔŋ akpakam ɔnɔ mbufo spirit ɔniɔŋ ye eriyarare, emi mbufo edidade efiɔk Enye;

¹⁸Enye akpakam onyuŋ aŋwaŋa enyin esit mbufo, man mbufo efiɔk se idori-enyin eke Enye okotde nnyin idibɔ edide;

¹⁹ye se uwak ubɔŋ udeme eke Enye enyenede ke ikɔt Esie edide; ye adaŋa nte odudu Esie ɔsɔŋɔde okpon ɔnɔ nnyin emi inimde ke akpanikɔ, nte asaŋade ekekem ye ata ɔkpɔsɔŋ odudu Esie,

²⁰eke Enye akadade anam utom ke idem Christ, ke adaŋemi anamde Enye eset ke mkpa, onyuŋ anamde Enye etie ke ubɔk nnasia Esie ke mme itie heaven,

²¹Okoŋ akan kpukpru mme andikara ye mme enyene-nsɔŋ-uyo ye mme enyene-odudu ye mme enyene-ubɔŋ, ye kpukpru enyiŋ eke edisasiak, idige ke eyo emi ikpɔŋ, edi ke eyo eke edidide ŋko;

²²okonyuŋ ada kpukpru ŋkpɔ adak Enye ke ukot, onyuŋ ɔnɔ Enye ete edi Ibuot kpukpru ŋkpɔ, ɔnɔ ufɔn ufɔk Abasi,

²³emi edide Idem Esie, kpa se iyɔhɔde ye Enye emi ɔyɔhɔde ke kpukpru ŋkpɔ.