Read efik ŊWED MBON EPHESUS 4 Bible Online

ŊWED MBON EPHESUS 4 - efik bible

ŊWED MBON EPHESUS 4

¹MMƆDO ami, emi ndide owo-ŋkpɔkɔbi ke Ɔbɔŋ, mmekpe mbufo ubɔk, nte, esaŋa nte odotde ikot emi ekokotde mbufo,

²ke kpukpru nsuk-idem ye ifure-ifure ido, ye anyan ime;

³eme ime ye kiet eken ke ima; esin ifik eda emem nte uruk ebɔp idem edian ɔtɔ kiet ke Spirit.

⁴Idem kiet odu, Spirit kiet onyuŋ odu, kpa nte ekekotde mbufo ke idori-enyin kiet emi asaŋade ye ikot mbufo;

⁵Ɔbɔŋ kiet onyuŋ odu, ye mbuɔtidem kiet, ye baptism kiet;

⁶Abasi kiet odu, kpa Ete kpukpru owo, emi akarade kpukpru owo, onyuŋ ɔyɔhɔde ke kpukpru owo, onyuŋ odu ke esit kpukpru owo.

⁷Edi ema enɔ kpukpru nnyin kiet kiet ŋkpɔ mfɔn eke nnyin, nte Christ ododomo ɔnɔ nnyin.

⁸Mmɔdo edɔhɔde ete, Ke adaŋemi Enye ɔdɔkde ke enyɔŋ, Enye ada mbuotekɔŋ ɔnyɔŋ, Ndien ɔnɔ owo enɔ.

⁹(Ikɔ emi, ete, Enye ɔdɔk ɔwɔrɔ didie? ɔwɔrɔ ete, Enye ama onyuŋ ɔsuhɔre edi mi ke ata idak isɔŋ?

¹⁰Enye emi ɔkɔsuhɔrede edi Enye emi ɔdɔkde, okoŋ akan kpukpru mme heaven, man Enye ɔyɔhɔ ke kpukpru ŋkpɔ)

¹¹Ndien Enye ɔkɔnɔ ndusuk owo nte mme apostle; onyuŋ ɔnɔ ndusuk owo nte mme asiak-uduak Abasi, onyuŋ ɔnɔ ndusuk owo nte mme ɔkwɔrɔ-gospel, onyuŋ ɔnɔ ndusuk owo nte mme andikpeme ye mme anditeme;

¹²man oto do enam ikɔt Abasi efɔn ema, enyuŋ enam utom Abasi okut unen, enyuŋ enam Idem Christ ɔkɔri:

¹³Tutu kpukpru nnyin ikabare idi kiet ke mbuɔtidem ye ke ifiɔk Eyen Abasi, ikɔri ikpon iwɔrɔ owo, isim ofuri idaha uyɔhɔ Christ:

¹⁴man nnyin ikudi aba nditɔwɔŋ, emi ukpep-ŋkpɔ etode ke nsio-nsio edem ebara nte ofim emen etop eduɔk, eda nnyin ediyo ke ŋkari owo eke efiɔkde nditibi usuŋ abiaŋa;

¹⁵Edi man nnyin imum akpanikɔ ye ima ikɔri ke kpukpru ŋkpɔ, ikabare isim Enye emi edide Ibuot, kpa Christ;

¹⁶emi otode Enye ofuri Idem ada se kpukpru ikek otipde, nte idomo utom ndido kiet kiet edide, ɔsɔŋɔ akpaha adiana, ɔdɔdiɔŋ ɔkɔri adaha ada ke ima.

¹⁷Mmɔdɔhɔ ndien ntem, nnyuŋ nsɔŋɔ ntiŋ ke Ɔbɔŋ, nte mbufo ekusaŋa aba nte mme Gentile efen esaŋade, ke ikpikpu ekikere mmɔ;

¹⁸emi enyin esit okimde mmɔ; unana ifiɔk mmɔ ye nsɔŋesit mmɔ enyuŋ enamde mmɔ eda nsan-nsan ye uwem Abasi;

¹⁹sia esit mmɔ odorode ufiɔn, mmɔ eyak idem enɔ mbukpo ido, ndinam mbubiam ido ye okpum.

²⁰Idige ntre ke mbufo ekekpep Christ;

²¹ŋkɔm mbufo ekekop ikɔ Esie enyuŋ ekpep ŋkpɔ ke Enye, kpa akpanikɔ eke odude ke Jesus; ete, esio akani owo eduɔk,

²²emi ekemde ye ido uwem mbufo ke eyo oko, onyuŋ ɔdiɔŋde diɔŋ abiara oto ke eritiene eke mbufo etienede idiɔk itɔŋ eke ebiaŋade owo;

²³Enyuŋ ekabare edi obufa ke spirit eke odude ke esit mbufo, enyuŋ emen obufa owo esine,

²⁴emi ebotde ebiet Abasi ke edinen ido ye edisana ido akpanikɔ.

²⁵Mmɔdo eduɔk nsu, mbufo kpukpru enyuŋ etiŋ akpanikɔ enɔ mbɔhiduŋ esie: koro nnyin idide mbak idem kiet eken.

²⁶Eyat esit, ndien ekudue; ekuyak utin ɔsuhɔre edisim iyaresit mbufo: ekunyuŋ enɔ Satan ufaŋ.

²⁷Owo eke esiyipde inɔ, okuyip aba;

²⁸edi yak enye akam anam ɔkpɔsɔŋ utom, ada ubɔk esie anam eti utom, man enye enyene se adade ɔnɔ owo eke odude ke unana.

²⁹Ekuyak ndek-ndek ikɔ ɔwɔrɔ mbufo ke inua, edi etiŋ se iŋwamde owo ndikɔri ke mfɔn, nte unana owo edide, man eda ufɔn enɔ mmɔ eke ekopde.

³⁰Ekunyuŋ eyat Edisana Spirit Abasi esit, emi edi ke Enye ke ema efik mbufo idiɔŋɔ ebeŋe usen erifak.

³¹Esioŋo kpukpru ndot-ndot ekikere, ye ifuresit, ye iyaresit, ye utɔk, ye isuŋi efep ke otu mbufo, ye kpukpru oruk udu:

³²enyuŋ efɔn ido ye kiet eken, enyuŋ enyene esit mbɔm, enyuŋ efen kiet eken, kpa nte Abasi okonyuŋ efende mbufo ke Christ.