Read efik ŊWED MBON EPHESUS 6 Bible Online

ŊWED MBON EPHESUS 6 - efik bible

ŊWED MBON EPHESUS 6

¹NDITƆ ekop uyo mme ete ye mme eka mbufo ke Ɔbɔŋ; koro emi enende.

²Kpono usɔ ye uka (emi edi akpa ibet eke asaŋade ye uŋwɔŋɔ),

³man ɔkpɔfɔn ye afo, afo okponyuŋ odu uwem ebigi ke isɔŋ.

⁴Ndien mbufo mme ete, ekufiomo nditɔ mbufo; edi ekama mɔ ke ntunɔ ye item Ɔbɔŋ.

⁵Ifin, esuk ibuot enɔ mmɔ emi edide mme ete ufɔk mbufo ke obukidem, ke uteŋe ye nnyekidem ye ofuri esit, nte enam enɔ Christ.

⁶Ekunam utom enyin owo, nte mbon mbukpek, edi enam se Abasi amade ye esit kiet nte ifin Christ;

⁷eda erinyime esit enam utom, nte ŋkpɔ eke mbufo minamke inɔ owo, edi enamde enɔ Ɔbɔŋ.

⁸Koro mbufo efiɔkde ete eti ŋkpɔ ekededi eke owo anamde, kpa oro ke enye editɔŋɔ ntak ɔbɔ ke ubɔk Ɔbɔŋ, ye enye edide ofin ye enye edide eyen-isɔŋ.

⁹Ndien mbufo mme ete, enam kpa ntem ye mmɔ, enyuŋ etre nditiŋ ikɔ ndikhe; sia efiɔkde ete, Ete mmɔ ye eke mbufo odu ke heaven; Enye inyuŋ iteŋeke owo enyin.

¹⁰Nte akpatre ikɔ, esɔŋɔ idem ke Ɔbɔŋ ye ke ɔkpɔsɔŋ odudu Esie.

¹¹Esine ofuri ŋkpɔ-ekɔŋ Abasi, man mbufo edikeme ndiŋwana ye ŋkari Satan.

¹²Koro nnyin miŋwanake eŋwan nnyin ye obuk ye iyip, edi iŋwana ye mbɔŋ, ye mme enyene-odudu ye mme andikara ekim ererimbot, ye udim mme idiɔk spirit eke edude ke enyɔŋ.

¹³Mmɔdo eda ofuri ŋkpɔ-ekɔŋ Abasi, man mbufo edikeme ndisɔŋɔ nda ke usen idiɔk, enyuŋ esɔŋɔ eda ke ema ekenam kpukpru ŋkpɔ.

¹⁴Esɔŋɔ eda ndien: eda akpanikɔ ebɔbɔ ke isin, enyuŋ esine edinen ido nte ukwak ikpanesit,

¹⁵enyuŋ eda mbeŋe-idem ndikwɔrɔ gospel emem esine nte ikpa-ukot;

¹⁶enyuŋ eda mbuɔtidem nte otu-ekɔŋ, emi edidade ekeme ndinime kpukpru enyim ikaŋ andidiɔk.

¹⁷Enyuŋ eyara erinyaŋa nte ndun ke ibuot, enyuŋ ekama ofut Spirit, emi edide ikɔ Abasi:

¹⁸eda kpukpru akam ye mkpe-ubɔk ebɔŋ akam ke Spirit kpukpru ini, enyuŋ ekpeme ndinam ntem, enyuŋ eda ofuri ifik ye mkpe-ubɔk ekpeme ndibɔŋ akam mbaŋa kpukpru ikɔt Abasi, nnyuŋ mbaŋa mi ŋko,

¹⁹man enɔ mi ukeme nditat inua ntiŋ ikɔ nyarare ndibe-ŋkpɔ gospel ye uko;

²⁰emi ndide isuŋ esie ke ŋkpɔkɔbi; kpaŋ ŋkwɔrɔ enye ye uko nte odotde mi ndikwɔrɔ.

²¹Tychicus, edima eyen-ete ye ata isuŋ Ɔbɔŋ eyesian mbufo kpukpru ŋkpɔ, man mbufo efiɔk se ibaŋade mi ye nte ntiede.

²²Ŋkɔdɔŋ enye edi ke ɔtɔ mbufo ke ntak emi, man mbufo efiɔk nte ŋkpɔ etiede ye nnyin, enye onyuŋ ɔdɔŋ mbufo esit.

²³Emem ye ima eke asaŋade ye mbuɔtidem akpakam oto ke ubɔk Abasi Ete ye Ɔbɔŋ Jesus Christ etiene nditɔ-ete.

²⁴Mfɔn akpakam odu ye kpukpru mmɔ emi emade Ɔbɔŋ nnyin Jesus Christ ye ima eke midibiarake.