Read efik ŊWED MBON PHILIPPI 2 Bible Online

ŊWED MBON PHILIPPI 2 - efik bible

ŊWED MBON PHILIPPI 2

¹EDIEKE odudu ndidemere mbufo odude ke Christ, edieke ima ekemede ndituk mbufo esit, edieke mbufo enyenede nsaŋa ye Spirit, edieke ima ye mbɔm odude mbufo ke esit, enam nnyene idaresit ɔyɔhɔ-ɔyɔhɔ.

²Yak mbufo edi mbon esit kiet, emi enyuŋ enyenede ima kiet, enyuŋ enyenede iwuk kiet, ye ekikere kiet.

³Ekunam baba ŋkpɔ kiet ke ndomo-idem mme ke ntaŋ-idem, edi yak owo kiet kiet ada nsuhɔre-esit abat ete, owo eŋwen ɔfɔn akan imɔ.

⁴Kuyak mbufo ese ŋkpɔ eke mbufo, edi ekam ese ŋkpɔ owo eŋwen.

⁵Yak mbufo enyene oruk esit emi okodude ke Christ Jesus.

⁶Okposuk edi nte enye ekedide mbiet Abasi, Enye ikabatke ndida ŋka-ŋka ye Abasi ke ŋkpɔ eke okpomumde akama:

⁷edi Enye akaŋwaŋa idem Esie, ada mbiet ofin, owut idem nte owo; ndien sia Enye ɔwɔrɔde edi ke ido owo,

⁸Enye ɔsuhɔre idem, akabare osuk ibuot tutu ɔsuŋɔ ke mkpa, kpa mkpa cross.

⁹Ke ntak oro Abasi ekemenere Enye onim ke enyɔŋ, onyuŋ ɔnɔ Enye enyiŋ emi okoŋde akan kpukpru enyiŋ;

¹⁰man ke enyiŋ Jesus kpukpru edɔŋ ekpetɔŋɔ enɔ Abasi, ye eke mme andidu ke heaven, ye eke mme andidu ke isɔŋ, ye eke mme andidu ke idak isɔŋ;

¹¹kpukpru edeme ekponyuŋ enyime ete Jesus Christ edi Ɔbɔŋ, enɔ Abasi Ete ubɔŋ.

¹²Ntre, ndima mi, kpa nte mbufo ekam esukde ibuot enɔ uyo mi kpukpru ini, idige ke ini ndude ye mbufo ikpɔŋ, edi akpan-akpan ke ini mmenduhe ye mbufo, esaŋa ke ndik ye nnyek-idem enam erinyaŋa mbufo ɔwɔrɔ usuŋ;

¹³koro edi Abasi esine mbufo ke idem anam mbufo enyime enyuŋ enam, man eti uduak Esie ediwɔrɔ.

¹⁴Ke erinam kpukpru ŋkpɔ etre nsuk-uyo ye eneni;

¹⁵man mbufo ekunyene ubiom-ikpe, ekunyuŋ enyene ndudue, edi edi nditɔ Abasi eke enanade ndo ke ufɔt ŋkwakwaŋa ye idiɔk emana; emi mbufo ke eyayama ke otu mmɔ nte ntantafiɔŋ ke ererimbot,

¹⁶Emenere ikɔ uwem ewut owo, man ŋkpe-keme ndida mbufo nnam mbure ke usen Christ, nte, ŋkefeheke itɔk ikpikpu, ŋkonyuŋ nnamke utom ikpikpu.

¹⁷Edi edieke eŋwaŋade mi eduɔk ke enyɔŋ uwa eke mbuɔtidem mbufo adade ɔsɔk Abasi, ndat esit nnyuŋ ntiene kpukpru mbufo ndara;

¹⁸kpa ntre mbufo nde edat esit enyuŋ etiene mi edara.

¹⁹Edi mmodori enyin ke Ɔbɔŋ Jesus ndiwara ndɔŋ Timothy edi ke ɔtɔ mbufo, man mfiɔk mbaŋa mbufo, nnyuŋ nnyene nsɔŋ-esit.

²⁰Koro nnyeneke owo eke ebietde enye, eke edikerede ŋkpɔ mbufo ke akpanikɔ.

²¹Koro kpukpru owo ke eyoyom ŋkpɔ idem mmɔ, idige ŋkpɔ Jesus Christ.

²²Edi mbufo emefiɔk nte edomode enye ese ete, nte eyen asaŋade ye ete anam utom, ke enye ama asaŋa ye ami asuan gospel.

²³Mmɔdo edi enye ke ndori enyin ndisio ndɔŋ edi ke ɔtɔ mbufo idem idahemi, ke mma mfɔfiɔk nte ŋkpɔ ediwɔrɔde ye ami.

²⁴Edi mmonim ke Ɔbɔŋ nte ami ke idem mi nyewara ndi.

²⁵Edi ŋkere nte ŋkposio Epaphroditus ndɔŋ ke ɔtɔ mbufo, emi edide eyen-ete mi ye nsaŋa utom mi ye nsaŋa mi ke ekɔŋ, onyuŋ edide isuŋ mbufo, onyuŋ anamde ŋkpɔ ɔnɔ mi ke unana mi.

²⁶Koro mbufo kpukpru edɔŋde enye; enye okonyuŋ odu ke nnanenyin, koro mbufo ema ekop ete enye ɔdɔdɔŋɔ.

²⁷Ke akpanikɔ enye ɔkɔdɔŋɔ ekpere ndikpa: edi Abasi atua enye mbɔm; inyuŋ ituaha enye ikpɔŋ mbɔm, edi atua mi mbɔm ŋko, mbak ndida mfuhɔ ŋkɔrɔ ye mfuhɔ.

²⁸Ntem ke mmawara ndɔŋ enye ŋkan man mbufo edat esit ke ini etɔŋɔde ntak ekut enye, man mfuhɔ mi nde efere akan.

²⁹Edara enye ndien ke Ɔbɔŋ ye ɔyɔhɔ idaresit, enyuŋ enɔ oruk owo emi ukpono;

³⁰koro osuk esisit enye ndikpa ke erinam utom Christ, ikereke uwem esie, man enye anam se isuhɔde mbufo ndinam nnɔ mi ɔyɔhɔ.