Read efik ŊWED MBON PHILIPPI 3 Bible Online

ŊWED MBON PHILIPPI 3 - efik bible

ŊWED MBON PHILIPPI 3

¹NTE ukperedem ikɔ, nditɔ-ete mi, edat esit ke Ɔbɔŋ. Ndiwet kpa ŋkpɔ oro nnɔ esɔk mbufo ifekke mi, edi ɔfɔn ye mbufo.

²Ekpeme idem ye mme ebua, ekpeme idem ye idiɔk mme anam utom, ekpeme idem ye mme ekpeŋe idem.

³Koro nnyin idi mme ana mbobi, kpa nnyin emi ituakde ibuot inɔ Abasi ke Spirit, inyuŋ iburede mbure ke Christ Jesus minyuŋ iberike idem ke obukidem.

⁴Ami ke idem mi ŋkponyuŋ mbeberi idem ke obukidem. Edieke owo ekededi esede ete imekeme ndiberi idem ke obukidem, ami ŋkeme ŋkan.

⁵Ekenim mi mbobi ke ɔyɔhɔ usen itiaita, nto ke ubon Israel, ke esien Benjamin, ndi Hebrew eke mme Hebrew ebonde;

⁶ke ikɔ ibet, ndi Pharisee; ke ikɔ ifiopesit, mma ŋkɔbɔ ufɔk Abasi; ke ikɔ eti ido eke otode ke erinim ibet, owo ikwe ŋkpɔ ndibiom ke idem mi.

⁷Edi mme ŋkpɔ eke ekpedide udori enɔ mi, ke ŋkabat mmɔ nte ntak-urua kabaŋa Christ.

⁸Ke akpanikɔ mbat kpukpru ŋkpɔ ke ntak-urua, man mbɔ akan ifiɔk Christ Jesus Ɔbɔŋ mi: emi ŋkayakde kpukpru ŋkpɔ atak kabaŋa Enye, mmonyuŋ nsin mmɔ ke mbio,

⁹man mbɔ Christ nda nnyene, enyuŋ ekut ete ndu ke Enye, ke mmenyeneke edinen ido idem mi eke otode ke erinim ibet, edi edinen ido eke otode ke eribuɔt idem ye Christ, kpa edinen ido emi Abasi ɔnɔde kabaŋa mbuɔtidem;

¹⁰Man ŋkpɔfiɔk Enye ye odudu eriset Esie ke udi, ye nsaŋa ke ndutuhɔ Esie, nnyuŋ ŋkabare ŋkpa mkpa eke ebietde mkpa Esie;

¹¹man ke usuŋ ekededi ŋkposim eriset ke mkpa.

¹²Ndɔhɔke nte mmososim mma, me nte mmefɔfɔn mma; edi mmesin ifik mbine, mme eyeto do ŋkpomum se Jesus Christ okomumde mi ete nnyene ŋkama.

¹³Nditɔ-ete, mbatke nte mmomum ŋkpɔ oro kaŋa ŋkama; edi ŋkpɔ kiet emi ke nanam; mfefre se idude mi ke edem, nnyuŋ nnyanare mbine se inade mi ke iso;

¹⁴Mmesin ifik ŋka iso mbine utit mbuba, man ŋkɔbɔ utip akwa ikot eke Abasi okokotde mi ke Christ Jesus.

¹⁵Eyak kpukpru nnyin, eke ima ikɔkɔri iwɔrɔ idi owo, inyene oruk esit emi, ndien edieke mbufo enyenede ekikere eke ekpuhɔrede ke se ntetiŋ, Abasi eyeyarare emi ɔnɔ mbufo.

¹⁶Edi eyak nnyin isaŋa ke se nnyin ima ikɔbɔ inyene idu uwem.

¹⁷Nditɔ-ete, kpukpru mbufo edi mme andikpebe mi, enyuŋ etiŋ enyin ese mmɔ emi esaŋade ke ido eke ŋwutde mbufo.

¹⁸Koro ediwak owo esaŋa edu uwem, emi mma ŋkasian mbufo ediwak ini, nnyuŋ nsian mbufo ke emi ye mmɔŋ eyet, nte, Mmɔ edi mme asua cross Christ:

¹⁹Nsobo eyedi utit mmɔ, idibi mmɔ edi abasi mmɔ, mmɔ eseŋ ke se isuenede mmɔ, mmɔ ekere ŋkpɔ isɔŋ emi.

²⁰Edi obio nnyin ododu ke heaven, nnyin inyuŋ itie ibet Andinyaŋa emi editode do edi, kpa Ɔbɔŋ Jesus Christ;

²¹emi eyetɔŋɔ ntak obot ikpɔhidem nnyin emi odude ke ata usuhɔre-itie, esin ke mbiet idem Esiemɔ emi enyenede ubɔŋ, oto ke odudu Esie, emi Enye ekemede ndida nsuk kpukpru ŋkpɔ nsin ke idak Esie.