Read efik ŊWED MBON COLOSSAE 2 Bible Online

ŊWED MBON COLOSSAE 2 - efik bible

ŊWED MBON COLOSSAE 2

¹KORO nyom mbufo efiɔk ɔkpɔsɔŋ eŋwan eke ŋwanade mbaŋa mbufo, ye mmɔ emi edude ke Laodicea, ye kpukpru owo emi mikekwe iso mi ke enyin:

²man mmɔ ekpekam ekop nsɔŋ-esit, enyuŋ ekpep se ima edide. Mmɔ ekpekam esim ofuri uwak mbuɔtidem emi otode ke eritim mfiɔk ŋkpɔ. Mmɔ ekpekam ebure efiɔk ndibe-ŋkpɔ Abasi, oro edi Christ;

³emi ofuri inyene ɔniɔŋ ye ifiɔk edibede enye ke idem.

⁴Mmɔdɔhɔ emi mbak owo baba kiet edida nnem-inua abiaŋa mbufo.

⁵Koro okposuk edi nte mmenduhe ye mbufo ke obukidem, ami do ye mbufo ke spirit, nnyuŋ ndadara ndikut nte mbufo etimde edu uwem, mbuɔtidem mbufo onyuŋ ɔsɔŋɔde ada ke Christ.

⁶Nte mbufo ema ekɔbɔ Christ Jesus Ɔbɔŋ ndien, esasaŋa ke Enye;

⁷yak mbufo emum ŋkam, enyuŋ ekɔri edaha eda ke Enye, enyuŋ edɔdiɔŋ esɔŋɔ eda ke mbuɔtidem, kpa nte ekekpepde mbufo, enyuŋ enɔ Abasi ekɔm eti-eti.

⁸Ekpeme mbak owo ekededi edidu, eke adade ifiɔk owo ye ikpikpu abiaŋa eke esaŋade ye se owo ekpepde obume mbufo; nte asaŋade ekekem ye mme enyene odudu eke ekarade ererimbot, minyuŋ isaŋake ikekem ye Christ.

⁹Koro ofuri Uyɔhɔ Abasi ke ododuŋ Enye ke idem; mbufo enyuŋ enyene uyɔhɔ mbufo ke Enye;

¹⁰Enye onyuŋ edi Ibuot ɔnɔ kpukpru mme andikara ye mme enyene-odudu.

¹¹Ke Enye ke ekenyuŋ enim mbufo mbobi eke midaha ubɔk owo inim, kpa mbobi eke edide erisio idiɔk udɔŋ obukidem mfep, kpa mbobi eke Christ onimde;

¹²mbufo ema ebuhɔ ye Enye ke baptism; ke enyuŋ eda baptism enam mbufo eset ye Enye, oto koro mbufo ebuɔtde idem ke odudu Abasi, emi akanamde Enye eset ke mkpa.

¹³Mbufo emi ekekpaŋade ke eribiat ibet, ye ke eritre ndina mbobi ke obukidem, kpa mbufo ke Abasi okonyuŋ anam edu uwem ye Enye: Enye emefen kpukpru eribiat ibet eke nnyin ikabiatde;

¹⁴Enye ɔmɔsɔhi ŋwed isɔn, emi esinede ke mme ewuhɔ ibet obiom nnyin ikpe; ɔkpɔnɔre enye efep, ɔkɔŋ enye adian ke cross Esie.

¹⁵Enye ama adianare mme andikara ye mme enyene-odudu ke Idem Esie efep onim nsan-nsan, ayarare mmɔ aŋwa-aŋwa, ada mmɔ nte mbuot-ekɔŋ ke cross Esie.

¹⁶Mmɔdo ekuyak baba owo kiet ekpe ikpe ɔnɔ mbufo ke se mbufo ediade, ye ke se mbufo eŋwɔŋde, ye ke ido eke mbufo enimde usɔrɔ ye obufa ɔfiɔŋ ye sabbath.

¹⁷Mme ŋkpɔ oro edi ukpɔŋ ŋkpɔ eke edidide; edi idem ŋkpɔ esaŋa ye Christ.

¹⁸Ekuyak baba owo kiet obiom mbufo ikpe nte enye amama, ke ikɔ nsuhɔre-idem, ye erituak ibuot nnɔ mme angel; oruk owo emi ebure mbure ke ŋkukut, enyuŋ ekohore idem ke ikpikpu ekikere obukidem;

¹⁹edi mmɔ isɔŋɔke iyire ye Ibuot, emi adade ikek ye osip ɔbɔk ofuri idem, omum enye akama adiana, anam enye ɔkɔri ŋkɔri uwem Abasi.

²⁰Edieke mbufo ema ekakpa ye Christ, enyuŋ edianare ekpɔŋ mme enyene-odudu eke ekarade ererimbot, nsinam mbufo, nte mbufo edide mbon ererimbot kaŋa, esuk ibuot enyime ndinam mme item eke ekpepde, ete,

²¹Kumum, Kutabi, Kutuk, nte mme owo etemede enyuŋ ekpepde

²²(koro oruk ŋkpɔ emi etahade, ke adaŋemi owo adade mmɔ anam ŋkpɔ)?

²³Mme owo ebat oruk mme item oro ke ɔniɔŋ, sia mmɔ esaŋade ye erituak ibuot eke owo ke idemesie aduakde ndinam, ye nsuhɔre-idem ye ɔkpɔsɔŋ ntuk-idem; edi mmɔ inyeneke udori baba esisit; mmɔ ededek obukidem.