Read efik ŊWED MBON COLOSSAE 4 Bible Online

ŊWED MBON COLOSSAE 4 - efik bible

ŊWED MBON COLOSSAE 4

¹MME ete-ufɔk, enɔ ifin mbufo se inende inyuŋ ikemde; sia efiɔkde ete mme imɔ ŋko imenyene ete-ufɔk ke heaven.

²Eyire ke akam; eda ekɔm etiŋ enyin ndinam ntre.

³Ebɔŋ akam ebaŋa nnyin ŋko, man Abasi eberere usuŋ ɔnɔ nnyin ikwɔrɔ ikɔ Esie, itiŋ ndibe-ŋkpɔ Christ,

⁴emi ekɔbide mi ebaŋa; kpaŋ nyarare ndibe-ŋkpɔ oro, nte odotde mi nditiŋ.

⁵Esaŋa nte mbon eti ibuot ke mbubehe eke mbufo enyenede ye mmɔ emi edude ke esien: ededep ifet.

⁶Eyak nneme mbufo enyene inem ke esit kpukpru ini, nte esinde inuŋ ke esit, kpaŋ mbufo ediɔŋɔ nte mbufo ekpemende ikɔ enɔ kpukpru owo ibɔrɔ.

⁷Tychicus, edima eyen-ete mi, emi edide anam-utom emi anamde akpanikɔ, ye nsaŋa mi ke utom Ɔbɔŋ, eyetiŋ kpukpru se ibaŋade mi ɔnɔ mbufo.

⁸Ŋkɔdɔŋ enye ke ɔtɔ mbufo ke ntak emi, man mbufo efiɔk nte ntiede, man enye onyuŋ ɔdɔŋ mbufo esit.

⁹Onesimus, edima eyen-ete mi, emi anamde akpanikɔ onyuŋ edide owo mbufo kiet, asaŋa ye enye. Mmɔ eyesian mbufo kpukpru se itibede ke idem mi.

¹⁰Aristarcus, nsaŋa mi ke ufɔk-ŋkpɔkɔbi, ye Mark eyen-eka Barnabas (emi ekenɔde mbufo uyo ebaŋa enye ete, edieke enye edide do, edara enye),

¹¹ye Jesus emi ekerede Justus, ete ekɔm mbufo; mmɔ emi ikpɔŋ-ikpɔŋ eto ke otu mme ana-mbobi ewɔrɔ edi mme nsaŋa mi ke utom Obio Ubɔŋ Abasi; mmɔ enam mi ŋkop ndɔŋesit.

¹²Epaphras, owo mbufo kiet, emi edide owo Christ Jesus, ete ekɔm mbufo; enye edi owo emi aŋwanade kpukpru ini ke akam esie oyom ufɔn mbufo: man mbufo efɔn ema, enyuŋ etim efiɔk ofuri uduak Abasi.

¹³Koro ndi ntiense nte enye akpa utom eti-eti ke ibuot mbufo ye ke ibuot mmɔ emi edude ke Laodicea,

¹⁴ye mmɔ emi edude ke Hierapolis. Luke, abia-ibɔk emi owo emade, ye Demas ete ekɔm mbufo.

¹⁵Ekɔm nditɔ-ete emi edude ke Laodicea, ye Nymphas ye ufɔk Abasi emi ebonode ke ebiet esie.

¹⁶Ndien ke ema ekot ŋwed emi ke otu mbufo, enam ekot enye ke ufɔk Abasi nditɔ Laodicea ŋko; enyuŋ ebɔ ŋwed emi otode ke Laodicea ŋko ekot.

¹⁷Enyuŋ edɔhɔ Archippus ete, Tim kpeme utom emi afo ɔkɔbɔde ke Ɔbɔŋ, man anam enye ama.

¹⁸Nda ubɔk mi ŋwet ekɔm mi. Eti ŋkpɔkɔbi mi. Mfɔn akpakam odu ye mbufo.