Read efik 1 ŊWED THESSALONICA 2 Bible Online

1 ŊWED THESSALONICA 2 - efik bible

1 ŊWED THESSALONICA 2

¹KORO mbufo ke idem mbufo, nditɔ-ete, emefiɔk eriduk eke nnyin ikodukde ke otu mbufo, ete ikɔwɔrɔke ikpikpu;

²edi sia nnyin ima ikokut ukut ye esuene ke Philippi, nte mbufo efiɔkde, nnyin ida uko ke Abasi nnyin ikwɔrɔ gospel Abasi inɔ mbufo ke ufɔt ɔkpɔsɔŋ eŋwan.

³Koro nnyin mikadaha oyoŋ ekikere, mme esit ndek, mme abiaŋa, ikpe ye mbufo;

⁴edi nte Abasi okodomode nyin ɔfiɔk, ete nyin imodot nte Imɔ ikpayakde gospel isin nnyin ke ubɔk, ntem ke nnyin itiŋ; itiŋke man inem owo esit, edi ndinem Abasi emi odomode esit nnyin ese.

⁵Koro akanam owo ikwe nnyin idade ikɔ nnem-inua nte mbufo efiɔkde; Abasi onyuŋ edi ntiense ete, akanam nnyin inyuŋ idaha ikɔ idip mbumek;

⁶Nnyin iyomke ubɔŋ ke ubɔk owo, mme ke ubɔk mbufo, mme ke ubɔk owo efen, okposuk edi nte nnyin inyenede unen ndidi mbiomo nnɔ mbufo, sia idide mme apostle Christ.

⁷Edi nnyin iketie suŋ-suŋ ke otu mbufo, nte emi eka ɔbɔkde nditɔ esie mmɔ.

⁸Ndien koro mbufo edɔŋde nnyin eti-eti, nnyin ikut inem, idige ke erinɔ mbufo gospel Abasi ikpɔŋ, edi ke erinyuŋ nyak ukpɔŋ nnyin nde nnɔ mbufo, sia imade mbufo eti-eti.

⁹Nditɔ-ete, mbufo emeti ɔkpɔsɔŋ utom eke nnyin ikanamde, ye nte nnyin ikakpade mba; ke erinam ubɔkutom nnyin okoneyo ye uwemeyo, mbak nnyin ididi mbiomo inɔ owo mbufo ekededi, nnyin ikɔkwɔrɔ gospel Abasi inɔ mbufo.

¹⁰Mbufo edi mme ntiense, Abasi onyuŋ etiene ese, adaŋa nte nnyin ikadade ido eke asanade, onyuŋ enende, onyuŋ ananade ndo idu uwem ye mbufo emi enimde ke akpanikɔ:

¹¹mbufo emenyuŋ efiɔk ete, nnyin ikanam ŋkpɔ ye mbufo, kpa nte ete anamde ŋkpɔ ye nditɔ esie mmɔ; ikɔnɔ mbufo item, inyuŋ isɔŋɔ mbufo esit, inyuŋ isɔŋɔ inɔ mbufo uyo,

¹²man mbufo esaŋa edu uwem nte odotde Abasi, emi okokotde mbufo esin ke Obio Ubɔŋ Esie.

¹³Ndien ke ntak emi nnyin itreke ndinɔ Abasi ekɔm, ite, ke ini mbufo ebɔde ikɔ emi Abasi ɔnɔde ke ubɔk nnyin esɔk mbufo, mbufo idaha enye nte ikɔ owo, edi eda enye nte ikɔ Abasike akpanikɔ edi oroikɔ oro onyuŋ anam utom ke esit mbufo emi enimde ke akpanikɔ.

¹⁴Koro mbufo, nditɔ-ete, emekabare edi mme andikpebe mme ufɔk Abasi emi edude ke Judaea ke Christ Jesus; koro mbufo emekut ukem-ukem ukut ke ubɔk mbio-obio mbufo, kpa nte mmɔ ekutde ke ubɔk mme Jew;

¹⁵emi ekewotde Ɔbɔŋ Jesus ye mme prophet, enyuŋ ekɔbɔde nnyin, minyuŋ inemke Abasi esit,

¹⁶edi edi mme asua ye kpukpru owo, ke emi mmɔ ebiɔŋɔde nnyin nditiŋ ikɔ nnɔ mme Gentile man enyaŋa mmɔ. Ntem ke mmɔ esuk emana enam mme idiɔk-ŋkpɔ mmɔ eyɔhɔ. Edi ifuresit Abasi odoro mmɔ ke idem ɔyɔhɔ-ɔyɔhɔ.

¹⁷Edi nditɔ-ete, sia ema edianare nnyin ye mbufo ke ekpri ibio ini, ke ikpɔhidem, idige ke esit, nnyin iŋwana ikan ndikut mbufo iso ye iso; itɔŋ mbufo ɔdɔŋ nnyin eti-eti;

¹⁸mmɔdo nnyin ikoyom ndidi ke ɔtɔ mbufo, ami Paul mmaŋwana ndidi nnyuŋ ntɔŋɔ ntak ŋŋwana, edi Satan ɔbiɔŋɔ nnyin.

¹⁹Koro nso idi idori-enyin nnyin, ye idaresit nnyin, ye anyanya eke idade ibure mbure? Nte idige mbufo ke nnyin idida inam mbure ke iso Ɔbɔŋ nnyin Jesus ke adaŋemi Enye edidide?

²⁰Koro mbufo edi ubɔŋ nnyin ye idaresit nnyin.