Read efik 1 ŊWED THESSALONICA 3 Bible Online

1 ŊWED THESSALONICA 3 - efik bible

1 ŊWED THESSALONICA 3

¹MMƆDO ke ini nnyin mikemeke aba ndime ime, ikut ite ɔfɔn nnyin ndisuhɔ ikpɔŋ ke Athens:

²Ndien idɔŋ Timothy, eyen-ete nnyin, emi onyuŋ edide anam-utom Abasi ye gospel Christ, ite anam mbufo esɔŋɔ eda, onyuŋ ɔsɔŋɔ mbufo esit ke mbuɔtidem mbufo;

³mbak owo ndomo kiet edisehere ɔkpɔŋ itie esie ke ntak ukut oro; koro mbufo ke idem mbufo efiɔkde ete oro edi akaŋa nnyin.

⁴Koro ke akpanikɔ ke adaŋemi ikodude ye mbufo, nnyin ibem iso isian mbufo ite nnyin iyebe ke ukut; mbufo emenyuŋ efiɔk ete ama ɔwɔrɔ osu kpa ntre.

⁵Ke ntak emi ami ŋko ŋkekemeke ndime ime aba, nsio owo ndɔŋ, man mfiɔk mbaŋa mbuɔtidem mbufo, mbak ke usuŋ ekededi andidomo ama odomo mbufo, okpɔsɔŋ utom nnyin okponyuŋ ɔwɔrɔ ikpikpu.

⁶Edi ke adaŋemi Timothy otode ke ŋkaŋ mbufo edi ke ɔtɔ nnyin idahemi, onyuŋ adade eti mbuk mbuɔtidem ye ima mbufo ɔsɔk nnyin onyuŋ asiande nnyin ete mbufo eteti nnyin ke eti esit kpukpru ini, onyuŋ ɔdɔdɔŋ mbufo ndikut nnyin kpa nte ɔdɔŋde nnyin ndikut mbufo;

⁷ntre ke etop mbuɔtidem mbufo ɔsɔŋɔ nnyin esit abaŋa mbufo, nditɔ-ete, ke ufɔt ndusihere ye ukut nnyin.

⁸Imokop uwem ndien ke idem, edieke mbufo esɔŋɔde eda ke Ɔbɔŋ.

⁹Koro nso ekɔm ke nnyin ikeme ndikɔm Abasi mbaŋa mbufo, ke ofuri idara eke idarade ke ntak mbufo ke iso Abasi nnyin?

¹⁰Nnyin isɔŋɔ ibɔŋ akam eti-eti okoneyo ye uwemeyo, ite ikpakam ikut mbufo iso, inyuŋ inam se inanade mbufo ke mbuɔtidem ɔyɔhɔ.

¹¹Abasi ye Ete nnyin ke Idem Esie, ye Ɔbɔŋ nnyin Jesus, akpakam ada nnyin usuŋ edi ke ɔtɔ mbufo:

¹²Ɔbɔŋ akpakam onyuŋ anam mbufo ekɔri enyene ima ɔyɔhɔ ɔyɔhɔ ye kiet eken, enyuŋ enyene ima ye kpukpru owo, kpa nte nnyin inyenede ye mbufo;

¹³man oto do Enye anam esit mbufo enyene iwuk onyuŋ anana ndo ke edisana ido ke iso Abasi ye Ete nnyin, ke ini Ɔbɔŋ nnyin Jesus edidide ye kpukpru nti ikɔt Esie.