Read efik 1 ŊWED THESSALONICA 4 Bible Online

1 ŊWED THESSALONICA 4 - efik bible

1 ŊWED THESSALONICA 4

¹KE akpatre itie, nditɔ-ete, nnyin imebeŋe mbufo, inyuŋ isɔŋɔ ikpe ye mbufo ke Ɔbɔŋ Jesus, ite, kpa nte mbufo ekekopde ke inua nnyin nte mbufo ekpesaŋade ekenem Abasi esit, kpa nte mbufo enyuŋ esaŋade, mbufo edɔdiɔŋ enam ntre.

²Koro mbufo efiɔk mme item eke nnyin ikɔnɔde mbufo ke enyiŋ Ɔbɔŋ Jesus.

³Koro emi edi uduak Abasi, ete mbufo ekpekabare esana, ete mbufo enyuŋ ebet use;

⁴kpukpru owo ke otu mbufo enyuŋ efiɔk ndikama ŋwan esie ke edisana ido ye ido ukpono,

⁵idige ke ɔkpɔsɔŋ udɔŋ idiɔk itɔŋ, nte mme Gentile emi mifiɔkke Abasi enamde.

⁶Owo baba kiet okubiat ewuhɔ, otuk eyen-ete esie ke ŋkpɔ emi; koro Ɔbɔŋ eyesio usiene ke kpukpru idiɔk-ŋkpɔ emi, nte nnyin ikebemde iso idɔhɔ inyuŋ itim iteme mbufo.

⁷Koro Abasi ikokotke nnyin ite ididu uwem mbubiam, edi okokot nnyin ete, ididu uwem ke edisana ido.

⁸Mmɔdo owo emi esinde ndibɔ item emi isinke item owo, edi esin item Abasi, emi ɔnɔde mbufo Edisana Spirit Esie.

⁹Inaŋa nte ŋwet ŋkpɔ nnɔ mbufo mbaŋa ima nditɔ-ete: koro Abasi ke Idem Esie ke ekpep mbufo ndima kiet eken;

¹⁰mbufo ke enyuŋ edu uwem ntre ye kpukpru nditɔ-ete eke edude ke ofuri Macedonia. Edi imɔsɔŋɔ ikpe ye mbufo, nditɔ-ete, ite edɔdiɔŋ ekɔri ke ima;

¹¹enyuŋ eda ofuri esit eyom nditie suŋ-suŋ, nnyuŋ nse mbubehe mbufo, nnyuŋ nda ubɔk nnam utom kpa nte ikɔnɔde mbufo uyo;

¹²man mbufo edu uwem nte eyede ke iso mbon ererimbot, ekunyuŋ enana baba ŋkpɔ kiet.

¹³Edi nnyin imaŋa mbufo enana ifiɔk, nditɔ-ete, ebaŋa mmɔ emi edede, mbak mbufo edifuhɔ, kpa nte mmɔ eken eke minyeneke idori-enyin.

¹⁴Koro edieke nnyin inimde ke akpanikɔ ite Jesus ama akpa onyuŋ ɔtɔŋɔ ntak eset, imonim kpa ntre ite, Abasi eyeda mmɔ emi edede ke Jesus edi.

¹⁵Koro nnyin ida ikɔ-inua Ɔbɔŋ idɔhɔ mbufo ntem ite, nnyin emi idude uwem, emi isuhɔde itie ibet eridi Ɔbɔŋ, idibemke mmɔ emi edede iso ke baba usuŋ kiet.

¹⁶Koro Ɔbɔŋ ke Idem Esie eyeto ke heaven ɔsuhɔre ye mkpo, ye uyo archangel, ye ukorowo Abasi; ndien mmɔ emi ekpaŋade ke Christ eyebem iso eset:

¹⁷ndien eyemen nnyin emi idude uwem, emi isuhɔde, edɔk ye mmɔ ke ikpa-enyɔŋ, man isobo ye Ɔbɔŋ ke enyɔŋ: ntem ke nnyin ididu ye Ɔbɔŋ ke nsinsi-nsinsi.

¹⁸Mmɔdo emen ikɔ emi edɔŋ kiet eken esit.