Read efik 1 ŊWED THESSALONICA 5 Bible Online

1 ŊWED THESSALONICA 5 - efik bible

1 ŊWED THESSALONICA 5

¹NDITƆ-ETE, inaŋa nte ewet baba ŋkpɔ kiet enɔ mbufo ebaŋa mme ini ye mme eyo.

²Koro mbufo ke idem mbufo emetim efiɔk ete usen Ɔbɔŋ mɔŋ edi nte inɔ ke okoneyo.

³Ini mme owo edɔhɔde ete, idu ke emem ye ifure, kpa adaŋoro ke nsobo abuat mmɔ, nte emi uman abuatde ŋwan idibi; ndien mmɔ idikwe usuŋ ubɔhɔ.

⁴Edi mbufo nditɔ-ete iduhe ke ekim, eke ekpesinde usen oro abuat mbufo nte inɔ:

⁵koro kpukpru mbufo edi nditɔ uŋwana ye nditɔ uwemeyo: nnyin idige mbon okoneyo inyuŋ idige mbon ekim.

⁶Mmɔdo ndien, eyak nnyin ikude idap, nte mmɔ eken, edi eyak nnyin itaba idap ikpeme, imum idem ikama.

⁷Koro mmɔ eke edede idap ede ke okoneyo; mmɔ eke enyuŋ ekpade mmin ekpa mmin ke okoneyo.

⁸Edi eyak nnyin, emi idide nditɔ uwemeyo, imum idem nnyin ikama, isine mbuɔtidem ye ima nte ŋkpɔ ikpanesit, inyuŋ iyara idori-enyin erinyaŋa nte ndun ibuot.

⁹Koro Abasi mikonimke nnyin inɔ iyaresit, edi okonim nnyin ete ibɔ erinyaŋa ke Ɔbɔŋ nnyin Jesus Christ;

¹⁰emi akakpade ke ibuot nnyin, man, ye nnyin itabade idap ke uwem, ye nnyin idede, ikpodu uwem ye Enye.

¹¹Mmɔdo mbufo esɔŋɔ kiet eken esit, enyuŋ enam kiet eken ɔkɔri, kpa nte mbufo enanam.

¹²Imebeŋe mbufo, nditɔ-ete, ite ediɔŋɔ mmɔ emi enamde utom ke otu mbufo, enyuŋ ekararde mbufo ke Ɔbɔŋ, enyuŋ enɔde mbufo item.

¹³Ekpono mmɔ eti-eti ke ima kabaŋa utom mmɔ.

¹⁴Edu ke emem ke ufɔt mbufo. Imonyuŋ ikpe ye mbufo, nditɔ-ete, esua enɔ mmɔ eke esaŋade otime-otime, esɔŋɔ mbon iduɔ-esit idem, ekama mbon mmem-idem, enyene anyan ime ye kpukpru owo.

¹⁵Ekpeme ekuyak owo ada idiɔk osio owo usiene idiɔk; edi kpukpru ini ebine se ifɔnde, owo anam ntre ye kiet eken, onyuŋ anam ntre ye kpukpru owo.

¹⁶Edat esit kpukpru ini;

¹⁷Ekudop akam;

¹⁸Enɔ ekɔm ke kpukpru ŋkpɔ; koro emi edi se Abasi amade mbufo enam ke Christ Jesus.

¹⁹Ekunimi Spirit;

²⁰Ekusin erisiak uduak Abasi ke ndek;

²¹edomo kpukpru ŋkpɔ ese; emum se ifɔnde ekama;

²²Ebet kpukpru oruk idiɔk-ŋkpɔ.

²³Abasi emem ke Idem Esie akpakam anam mbufo esana ofuri-ofuri, onyuŋ ekpeme mbufo ofuri-ofuri ke spirit ye ukpɔŋ ye ikpɔhidem, anam mbufo ekunyene ndo ke ini Ɔbɔŋ nnyin Jesus Christ edidide.

²⁴Enye emi okotde mbufo edi Abasi akpanikɔ; Enye eyenyuŋ anam se Enye ɔkɔŋwɔŋɔde osu.

²⁵Nditɔ-ete, enam mkpe-ubɔk enɔ nnyin.

²⁶Ekɔm kpukpru nditɔ-ete ye edisana ntim-inua.

²⁷Mmowuk mbufo ke Ɔbɔŋ nte mbufo enam ekot ŋwed emi enɔ kpukpru nditɔ-ete.

²⁸Mfɔn Ɔbɔŋ nnyin Jesus Christ akpakam odu ye mbufo. Amen