Read efik JOSHUA 1 Bible Online

JOSHUA 1 - efik bible

JOSHUA 1

¹EDIKEM, ke adaŋemi Moses owo Jehovah ama akakpa, Jehovah ɔdɔhɔ Joshua eyen Nun, asaŋutom Moses, ete, Moses owo mi amakpa;

²daha ke enyɔŋ, ndien, be Jordan emi, afo, ye kpukpru mbio emi, koduk ke isɔŋ emi ami nnɔde mmɔ, kpa nditɔ Israel.

³Kpukpru ebiet eke mbufo ededebi ikpat mbufo, oro ke nda nnɔ mbufo, kpa nte ŋkɔdɔhɔde Moses.

⁴Adaŋa mbufo eyetɔŋɔ ke wilderness ye Lebanon emi akatuak akamba akpa, akpa Euphrates: ofuri isɔŋ mme Hittite, ada tutu okosim ke akamba inyaŋ ke edem usop-utin.

⁵Baba owo kiet idibiɔŋɔke fi ke iso, ke ofuri ini uwem fo: nyedu ye afo kpa nte ŋkodude ye Moses: ndiyakke fi nduɔk, ndinyuŋ ŋkpɔŋke fi.

⁶Sɔŋ ubɔk, nyuŋ sɔŋ esit: koro afo eyeda isɔŋ emi ŋkɔŋwɔŋɔde nnɔ mme ete mbio emi nte ke ndinɔ mmɔ, edeme ɔnɔ mmɔ.

⁷Edi sɔŋ ubɔk, nyuŋ sɔŋ esit eti-eti, ndikpeme nnyuŋ nnam kpukpru mbet emi Moses owo mi eketemede fi: kuwɔŋɔre ukpɔŋ enye uka nnasia mme ufien, man otim anam kpukpru ŋkpɔ eke afo edikade.

⁸Kuyak ŋwed mbet emi ɔwɔrɔ ɔkpɔŋ inua fo; edi kere enye ke uwemeyo ye ke okoneyo, man afo ekpeme ndinam kpukpru se ewetde ke esit: koro ntem ke afo edikut unen ke usuŋ fo,

⁹onyuŋ otim anam. Nte idige ami nteme fi? sɔŋ ubɔk, nyuŋ sɔŋ esit; kudige, kunyuŋ uyak esit ɔduɔ fi: koro Jehovah Abasi fo odude ye afo ke kpukpru ŋkpɔ eke afo akade.

¹⁰Ndien Joshua eteme mme andidaha obio,

¹¹ete, Mbufo esaŋa ke ufɔt nna ebe, enyuŋ eteme kpukpru owo, ete, Mbufo etim udia usuŋ mbufo: koro osuk usen ita, ndien mbufo ebe Jordan emi, eka ekeda isɔŋ emi Jehovah Abasi mbufo ɔnɔde mbufo, ete eda enye enyene.

¹²Ndien Joshua onyuŋ ɔdɔhɔ nditɔ Reuben, ye nditɔ Gad, ye ibio esien Manasseh, ete,

¹³Mbufo eti ikɔ oro Moses owo Jehovah eketemede mbufo, ete, Jehovah Abasi mbufo ama ɔnɔ mbufo itie iduŋ, ama onyuŋ ɔnɔ mbufo isɔŋ emi.

¹⁴Iban mbufo, ye nditɔwɔŋ mbufo, ye ufene mbufo, eyetie ke isɔŋ emi Moses ɔkɔnɔde mbufo ke edem Jordan oko; edi mbufo kpukpru mbon uko ebɔbɔ mbɔbɔ ekɔŋ, ebem nditɔ-ete mbufo iso ekeŋwam mmɔ;

¹⁵tutu Jehovah ɔnɔ nditɔ-ete mbufo itie iduŋ, nte mbufo, mmɔ enyuŋ eda isɔŋ emi Jehovah Abasi mbufo ɔnɔde mmɔ: ndien mbufo efiak ke isɔŋ emi mbufo ekedade, enyuŋ enyene enye, emi Moses owo Jehovah ɔkɔnɔde mbufo ke edem Jordan oko, ke edem usiaha-utin.

¹⁶Ndien mmɔ ebɔrɔ Joshua, ete, Nnyin iyenam kpukpru se afo etemede nnyin, iyenyuŋ ika kpukpru se afo edidɔŋde nnyin.

¹⁷Kpa nte nnyin ikekopde uyo Moses ke kpukpru ŋkpɔ, kpa ntre ke idinyuŋ ikop uyo fo ŋko: edi Jehovah Abasi fo akam odu ye afo, kpa nte okodude ye Moses.

¹⁸Kpukpru owo eke edimiomde uyo fo, midinyuŋ ikopke ikɔ fo, ke kpukpru se afo editemede mmɔ, eyekpaŋa: edi kam sɔŋ ubɔk nyuŋ sɔŋ esit.