Read efik JOSHUA 10 Bible Online

JOSHUA 10 - efik bible

JOSHUA 10

¹EDIKEM ke adaŋemi Adoni-zedek ɔbɔŋ Jerusalem okopde nte Joshua akadade Ai, okonyuŋ osobode enye; kpa nte enye akanamde Jericho ye ɔbɔŋ esie, kpa ntre ke enye anam Ai ye ɔbɔŋ esie; nte mme andiduŋ Gibeon ekenyuŋ emanade iman ye Israel, enyuŋ edu ke otu mmɔ; ndik anam mmɔ eti-eti:

²koro Gibeon edide akwa obio, nte obio edidem kiet; koro enye onyuŋ okponde akan Ai, kpukpru iren-owo esie enyuŋ edi mbon uko.

³Ndien Adoni-zedek, ɔbɔŋ Jerusalem ɔdɔŋ ekedɔhɔ Hoham ɔbɔŋ Hebron, ye Piram ɔbɔŋ Jarmuth, ye Japhia ɔbɔŋ Lachish, ye Debir ɔbɔŋ Eglon, ete,

⁴Mbufo edɔk edi ke ebiet mi, enyuŋ eŋwam mi, man nnyin isobo Gibeon: koro mmɔ ekekade ekemana iman ye Joshua ye nditɔ Israel.

⁵Ekem mbɔŋ mme Amorite ition oro esop idem ɔtɔ kiet, kpa ɔbɔŋ Jerusalem, ye ɔbɔŋ Hebron, ye ɔbɔŋ Jarmuth, ye ɔbɔŋ Lachish, ye ɔbɔŋ Eglon, mmɔ ye kpukpru mbon-ekɔŋ mmɔ, ndien mmɔ edɔk ekenam nna ekpere Gibeon, enyuŋ eŋwana ekɔŋ ye enye.

⁶Ekem mbio-obio Gibeon edɔŋ eketiŋ enɔ Joshua ke nna ke Gilgal, ete, Ke usuk ubɔk fo ukpɔŋ ikɔt fo; wara dɔk di tiene nnyin, nyaŋa nnyin, nyuŋ ŋwam nnyin: koro kpukpru mbɔŋ mme Amorite emi eduŋde ke ikpɔ obot emesop edi ikɔ ye nnyin.

⁷Ndien Joshua oto ke Gilgal ɔdɔk, ye kpukpru mbon-ekɔŋ ŋko, ye kpukpru mbon uko.

⁸Ndien Jehovah ɔdɔhɔ Joshua, ete, Kufehe mmɔ: koro ndade mmɔ nsin fi ke ubɔk; owo mmɔ ndomo kiet idikemeke ndida fi ke iso.

⁹Ndien Joshua edibuat mmɔ; enye oto ke Gilgal ɔdɔk ke ofuri okoneyo.

¹⁰Ndien Jehovah asuan mmɔ ke iso Israel, onyuŋ osobo mmɔ akamba nsobo ke Gibeon, onyuŋ ebine mmɔ oduk ke usuŋ emi edɔkde eka Beth-horon, onyuŋ osobo mmɔ tutu osim ke Azekah ye Makkedah.

¹¹Edikem adaŋemi mmɔ efeŋede itɔk ke iso Israel, mmɔ edu ke usuhɔre Bethhoron, Jehovah etie ke enyɔŋ otop ikpɔ itiat ɔtɔ mmɔ tutu esim ke Azekah, ndien mmɔ ekpaŋa; mme andikpaŋa ke edim itiat ewak ekan mme mmɔ emi nditɔ Israel ewotde ke ofut.

¹²Ndien Joshua ɔdɔhɔ Jehovah ke usen emi Jehovah adade mme Amorite onim ke iso nditɔ Israel, enye onyuŋ ɔdɔhɔ ke iso Israel, ete, Utin, bet ke Gibeon; ɔfiɔŋ,

¹³bet ŋko ke itihere Aijalon. Ndien utin ebet, ɔfiɔŋ onyuŋ ebet, tutu mmɔ esio usiene enɔ mme asua mmɔ. Nte iwetke emi isin ke ŋwed Jashar? Ntem ke utin atuak ada ke ufɔt enyɔŋ, inyuŋ iwarake ndisuhɔre ke ofuri usen oro.

¹⁴Ndien oruk usen nte oro akanam ibemke enye iso, inyuŋ itieneke enye edem, eke Jehovah okopde uyo owo, koro Jehovah aŋwanade ekɔŋ ɔnɔ Israel.

¹⁵Ekem Joshua ye ofuri Israel ŋko efiak edem eka ke nna ke Gilgal.

¹⁶Ndien mbɔŋ ition oro efeŋe ekedibe ke aba ke Makkedah.

¹⁷Ndien mmɔ etiŋ enɔ Joshua, ete, ke ekut mbɔŋ ition oro nte edibede ke aba ke Makkedah.

¹⁸Ndien Joshua ɔdɔhɔ, ete, Mbufo ekpat ikpɔ itiat esin ke inua aba oro, enyuŋ enim owo do ete ekpeme mmɔ:

¹⁹ndien mbufo ekutuak eda, edi ebine mme asua mbufo, enyuŋ ewot mmɔ eke edude ke ukperedem: ekuyak mmɔ eduk ke obio mmɔ: koro Jehovah Abasi mbufo adade mmɔ esin mbufo ke ubɔk.

²⁰Edikem adaŋemi Joshua ye nditɔ Israel ema ekewot mmɔ ata akwa eriwot ntre, tutu mmɔ ekure, ndien mmɔ eke esuhɔde ebɔhɔ eduk ke obio ibibene.

²¹Ndien kpukpru owo efiak ke nna, etiene Joshua ke Makkedah ke ifure: owo ndomo kiet itutke baba eyen Israel kiet inua.

²²Ndien Joshua ɔdɔhɔ ete, Mbufo esirere inua aba oro, enyuŋ esio mbɔŋ ition oro ke aba eda esɔk mi.

²³Ndien mmɔ enam ntre, enyuŋ esio mbɔŋ ition oro ke aba eda esɔk enye: kpa ɔbɔŋ Jerusalem, ye ɔbɔŋ Hebron, ye ɔbɔŋ Jarmuth, ye ɔbɔŋ Lachish, ye ɔbɔŋ Eglon.

²⁴Edikem ke mmɔ ema ekesio mbɔŋ oro eda esɔk Joshua, Joshua okot kpukpru owo Israel edi, onyuŋ ɔdɔhɔ mme etubom mbon-ekɔŋ emi esaŋade ye enye, ete, Mbufo esaŋa ekpere, enyuŋ eda ukot mbufo edori mbɔŋ emi ke itɔŋ. Ndien mmɔ esaŋa ekpere, enyuŋ eda ukot mmɔ edori mmɔ oro ke itɔŋ.

²⁵Ndien Joshua ɔdɔhɔ ete, Mbufo ekudikhe, ekunyuŋ eyak esit ɔduɔ mbufo, esɔŋɔ ubɔk, enyuŋ esɔŋɔ esit: koro ntem ke Jehovah edinam ye kpukpru mme asua mbufo eke mbufo eŋwanade ekɔŋ ye mmɔ.

²⁶Ndien Joshua ɔtɔ mmɔ owot, ndien mmɔ ekɔŋɔ ke eto tutu osim ke mbubreyo.

²⁷Edikem ke ini utin osopde, Joshua owuk ewuhɔ, ndien mmɔ ekɔŋɔre mmɔ ke eto, emen mmɔ eduɔk ke aba oro mmɔ ekedibede do, enyuŋ eda ikpɔ itiat esin ke inua aba oro, tutu osim idem mfin emi.

²⁸Ndien Joshua ada Makkedah ke usen oro, enyuŋ osobo enye ke iso ofut, ndien enye owot ɔbɔŋ mmɔ, kpa mmɔ, ye kpukpru owo emi edude ke esit; enye isuhɔke baba kiet; ntre ke enye anam ɔbɔŋ Makkedah kpa nte akanamde ɔbɔŋ Jericho.

²⁹Ekem Joshua adaha ke Makkedah, ofuri Israel enyuŋ esaŋa ye enye, aka Libnah, onyuŋ aŋwana ekɔŋ ye Libnah:

³⁰ndien Jehovah ada enye ŋko, ye ɔbɔŋ esie, esin Israel ke ubɔk; ndien mmɔ eda iso ofut esobo enye, ye kpukpru owo emi edude ke esit: mmɔ isuhɔke baba nsuhɔ ke esit: edi enam ɔbɔŋ mmɔ kpa nte ekenamde ɔbɔŋ Jericho.

³¹Ndien Joshua ye ofuri Israel ŋko edaŋa ke Libnah, ebe eka Lachish, ekenam nna ekɔŋ ekpere enye, enyuŋ eŋwana ye enye:

³²ndien Jehovah ada Lachish esin Israael ke ubɔk, ndien mmɔ eda enye ke udiana-akpa usen, enyuŋ eda iso ofut ebiat enye ye kpukpru owo emi edude ke esit, kpa nte ekenamde kpukpru ŋkpɔ ye Libnah.

³³Ndien Horam ɔbɔŋ Gezer ɔdɔk ete idiŋwam Lachish, ndien Joshua asuan enye ye ikɔt esie, tutu isuhɔke baba nsuhɔ kiet inɔ enye.

³⁴Ekem Joshua ye ofuri Israel edaŋa ke Lachish eka Eglon, ekenam nna ekɔŋ ekpere enye, enyuŋ eŋwana ekɔŋ ye enye.

³⁵Ndien mmɔ eda enye ke usen oro, enyuŋ esobo enye ke iso ofut; enye onyuŋ osobo kpukpru owo emi edude ke esit ke usen oro, kpa nte enye akanamde Lachish kpukpru ŋkpɔ.

³⁶Ndien Joshua ye ofuri Israel ŋko edaŋa ke Eglon edɔk eka Hebron, ekeŋwana ekɔŋ ye enye.

³⁷Ndien mmɔ eda enye, enyuŋ esobo enye ke iso ofut, ye ɔbɔŋ esie, ye kpukpru obio esie, ye kpukpru owo emi edude ke esit; enye isuhɔke baba nsuhɔ kiet, kpa nte enye akanamde Eglon kpukpru ŋkpɔ; edi osobo enye ye kpukpru owo emi edude ke esit.

³⁸Ndien Joshua ye ofuri Israel ŋko efiak ke Debir; enyuŋ eŋwana ekɔŋ ye enye:

³⁹enyuŋ eda enye, ye ɔbɔŋ esie, ye kpukpru obio esie; enyuŋ ewot mmɔ ke iso ofut, enyuŋ esobo kpukpru mmɔ emi edude ke esit; enye isuhɔke baba nsuhɔ kiet: kpa nte akanamde Hebron, kpa ntre ke enye anam Debir ye ɔbɔŋ esie; kpa nte enye okonyuŋ anamde Libnah ye ɔbɔŋ esie.

⁴⁰Ntem ke Joshua akan ofuri edem ikpɔ obot, ye eke usuk, ye eke una-isɔŋ edem inyaŋ, ye eke mme usuhɔre, ye kpukpru mbɔŋ mmɔ: enye isuhɔke baba nsuhɔ kiet, edi osobo kpukpru se iduɔkde ibifik, kpa nte Jehovah Abasi Israel okowukde.

⁴¹Joshua onyuŋ akan mmɔ, ɔtɔŋɔde ke Kadesh-barnea tutu osim ke Gaza, ye ofuri isɔŋ Goshen, tutu osim ke Gibeon.

⁴²Ntre ke Joshua ada kpukpru mbɔŋ emi ye isɔŋ mmɔ ini kiet: koro Jehovah Abasi Israel aŋwanade ekɔŋ ɔnɔ Israel.

⁴³Ekem Joshua ye ofuri Israel ŋko efiak ke nna-ekɔŋ ke Gilgal.