Read efik JOSHUA 17 Bible Online

JOSHUA 17 - efik bible

JOSHUA 17

¹NDIEN esien Manasseh eda udeme: koro enye edide akpan Joseph; Machir akpan Manasseh, ete Gilead ada Gilead ye Bashan: koro enye edide owo ekɔŋ.

²Nditɔ Manasseh efen enyuŋ (eda udeme), ke ubon, ke ubon; nditɔ Abiezer, ye nditɔ Helek, ye nditɔ Asriel, ye nditɔ Shechem, ye nditɔ Hepher, ye nditɔ Shemida; mme mmɔ edi nditɔ-iren Manasseh eyen Joseph, ke ubon, ke ubon.

³Edi Zelophehad, eyen Hepher, eyen Gilead, eyen Machir, eyen Manasseh, inyeneke nditɔ-iren, ibɔhɔke nditɔ-iban: ndien mme mmɔ emi edi enyiŋ nditɔ-iban esie, Mahlah, ye Noah, ye Hoglah, ye Milcah, ye Tirzah.

⁴Ndien mmɔ esaŋa ekpere ke iso Eleazar oku, ye ke iso Joshua eyen Nun, ye ke iso mbɔŋ, ete, Jehovah ɔkɔdɔhɔ Moses, ete ɔnɔ nnyin udeme ke otu nditɔ-ete nnyin iren. Ndien enye ɔnɔ mmɔ udeme ke otu nditɔ-ete ete mmɔ, ekem ke uyo Jehovah.

⁵Ntem ke mbak duop ewɔrɔ enɔ Manasseh, ekɔrɔ ke isɔŋ Gilead ye Ashan, emi edude ke edem Jordan oko;

⁶koro nditɔ-iban Manasseh edade udeme ke otu nditɔ-iren esie: ndien isɔŋ Gilead enyene nditɔ-iren Manasseh emi esuhɔde.

⁷Ndien adaŋa Manasseh ɔtɔŋɔ ke Asher aka Michmethah, emi asakde iso ese Shechem; ndien adaŋa aka usuk-usuk tutu osim mme andiduŋ En-tappuah.

⁸Manasseh ada isɔŋ Tappuah: edi nditɔ Ephraim eda Tappuah ke adaŋa Manasseh;

⁹ndien adaŋa asaŋa ke akpa Kanah ɔsuhɔre, ke edem usuk-usuk akpa: mme obio emi enyene Ephraim ke otu mme obio Manasseh. Ndien adaŋa Manasseh ana ke edem edere akpa, utit esie onyuŋ atuak ke inyaŋ:

¹⁰edem usuk enyene Ephraim, ndien edem edere enyene Manasseh, inyaŋ onyuŋ edi adaŋa esie; ndien mmɔ esobo ke Asher ke edem edere, ye ke Issachar ke edem usiaha-utin.

¹¹Manasseh onyuŋ enyene Beth-shean, ye mme obio esie, ye Ibleam, ye mme obio esie, ye mme andiduŋ Dor, ye mme obio esie, ye mme andiduŋ Endor, ye mme obio esie, ye mme andiduŋ Taanach, ye mme obio esie, ye mme andiduŋ Megiddo, ye mme obio esie, edem obot ita.

¹²Edi nditɔ Manasseh ikwe nte esioŋode mme andiduŋ obio emi efep; edi mme Canaanite eyom ndiduŋ ke edem oro.

¹³Edikem, adaŋemi nditɔ Israel esɔŋɔde odudu, mmɔ enam mme Canaanite ekabare edi mbon utomo; edi ikwe nte esioŋode mmɔ efep.

¹⁴Ekem nditɔ Joseph edɔhɔ Joshua, ete, Afo anam didie ɔnɔ nnyin udeme kierakiet, ye ubak kierakiet inyene, ndien nnyin idi ediwak owo, sia Jehovah ama ɔkɔdiɔŋ nnyin tutu osim emi?

¹⁵Ndien Joshua ɔbɔrɔ mmɔ, ete, Koro mbufo edide ediwak owo, mbufo edɔk ke akai eketem ke idem mbufo do, ke isɔŋ mme Perizzite, ye eke mme Rephaim, edieke obot Ephraim afahade mbufo.

¹⁶Ndien nditɔ Joseph edɔhɔ ete, Obot oro ikemke nnyin: ndien kpukpru mme Canaanite emi eduŋde ke itihere isɔŋ, ye mme mmɔ emi edude ke Beth-shean, ye ke mme obio iŋwaŋ esie, ye mme mmɔ emi edude ke ebedeŋ Jezreel, enyene chariot ukwak.

¹⁷Ndien Joshua ɔdɔhɔ ufɔk Joseph, kpa Ephraim ye Manasseh, ete, Mbufo edi ediwak owo, enyuŋ enyene akamba odudu: mbufo ididaha udeme kiet kpɔt;

¹⁸edi mbufo eyeda obot oro, koro enye edide akai, ndien mbufo eyekpeŋe enye eduɔk; mbufo eyenyuŋ eda mme ebiet emi ekperede enye: koro mbufo eyesioŋo mme Canaanite efep: koro mmɔ emenyene chariot ukwak emenyuŋ esɔŋɔ odudu.