Read efik JOSHUA 22 Bible Online

JOSHUA 22 - efik bible

JOSHUA 22

¹EKEM Joshua okot mme Reubenite, ye mme Gadite, ye ubak esien Manasseh edi, onyuŋ ɔdɔhɔ mmɔ, ete,

²Mbufo ema enim kpukpru se Moses owo Jehovah okowukde mbufo, ema enyuŋ ekop uyo mi, nte ŋketemede mbufo kpukpru:

³mbufo ikɔkpɔŋke nditɔ-ete mbufo anyan ini emi tutu osim mfin emi, edi ema etim enim se Jehovah Abasi mbufo okowukde.

⁴Ndien ke emi Jehovah Abasi mbufo ɔmɔnɔ nditɔ-ete mbufo nduɔk-odudu, kpa nte enye ɔkɔdɔhɔde mmɔ: mbufo enyɔŋɔ, ndien, eka ke mme tent mbufo, ke isɔŋ emi mbufo edade, emi Moses owo Jehovah ɔkɔnɔde mbufo ke edem Jordan oko.

⁵Edi mbufo ekpeme ndinim mbet ye mme ewuhɔ emi Moses owo Jehovah eketemede mbufo, enyuŋ ema Jehovah Abasi mbufo, enyuŋ esaŋa ke kpukpru usuŋ esie, enyuŋ etim enim mbet esie, enyuŋ eyire ye enye, enyuŋ enam ŋkpɔ esie ke ofuri esit mbufo, ye ke ofuri ukpɔŋ mbufo.

⁶Ndien Joshua ɔdiɔŋ mmɔ, onyuŋ ayak mmɔ: ndien mmɔ enyɔŋɔ ke mme tent mmɔ

⁷Ndien Moses ɔkɔnɔ ubak esien Manasseh udeme ke Bashan: ndien Joshua ɔnɔ ubak eken udeme ke otu nditɔ-ete mmɔ ke edem Jordan oko emi utin osopde. Ndien ŋko ke ini Joshua ayakde mmɔ enyɔŋɔ ke mme tent mmɔ, enye ɔdiɔŋ mmɔ,

⁸onyuŋ ɔdɔhɔ mmɔ, ete, Mbufo eda ediwak inyene, ye ediwak ufene eti-eti, ye silver, ye gold, ye okpoho, ye ukwak, ye ɔfɔŋ-idem ediwak eti-eti, enyɔŋɔ ke mme tent mbufo: eda mbume mme asua mbufo edeme enɔ nditɔ-ete mbufo.

⁹Ndien nditɔ Reuben, ye nditɔ Gad, ye ubak esien Manasseh, enyɔŋɔ ekpɔŋ nditɔ Israel ke Shiloh, emi odude ke isɔŋ Canaan, enyuŋ eka ke isɔŋ Gilead, ke isɔŋ udeme mmɔ emi mmɔ ekedade ke uyo Jehovah, ke ubɔk Moses.

¹⁰Ndien adaŋemi mmɔ esimde edem Jordan, emi odude ke isɔŋ Canaan, nditɔ Reuben, ye nditɔ Gad, ye ubak esien Manasseh enam itie-uwa do ke mben Jordan, itie-uwa emi okponde ndise.

¹¹Ekem nditɔ Israel ekop ete, Sese, nditɔ Reuben, ye nditɔ Gad, ye ubak esien Manasseh ema enam itie-uwa emi asakde iso ese isɔŋ Canaan, ke edem Jordan, ke edem nditɔ Israel oko.

¹²Ndien adaŋemi nditɔ Israel ekopde, ofuri esop nditɔ Israel esop idem ke Shiloh, ete idɔk ika ekɔŋ ye mmɔ.

¹³Ndien nditɔ Israel edɔŋ Phinehas, eyen Eleazar oku utom ke ɔtɔ nditɔ Reuben, ye eke nditɔ Gad, ye eke ubak esien Manasseh,

¹⁴ke isɔŋ Gilead, ye mbɔŋ duop ŋko, ɔbɔŋ kiet ke ufɔk ete kiet, ɔbɔŋ kiet ke ufɔk ete kiet, ke kpukpru esien Israel, ndien kpukpru mmɔ edi mbɔŋ ufɔk mme ete mmɔ ke otu mme tɔsin Israel.

¹⁵Ekem mmɔ edisim nditɔ Reuben, ye nditɔ Gad, ye ubak esien Manasseh, ke isɔŋ Gilead,

¹⁶ndien edɔhɔ mmɔ, ete, Ntem ke ofuri esop Jehovah edɔhɔ, ete, Nso oruk eridue edi emi mbufo eduede Abasi Israel, ke erifiak mfin ŋkpɔŋ Jehovah, ŋkanam itie-uwa ke idem mbufo, man mbufo esɔŋ ibuot ye Jehovah mfin emi?

¹⁷Nte idiɔk ido Peor edi ekpri ŋkpɔ ye nnyin, emi nnyin mika-isanake kaŋa tutu osim mfin emi; ndien esop Jehovah okokut ufen?

¹⁸Ndien mbufo eyom ndiwɔŋɔre mfin emi ŋkpɔŋ Jehovah: ndien ama ekem, edieke mbufo esɔŋde ibuot ye Jehovah mfin emi, mkpɔŋ enye eyeyat esit ye ofuri esop Israel.

¹⁹Edi edieke isɔŋ udeme mbufo edehede, mbufo esaŋa ebe ke isɔŋ udeme Jehovah, emi iduŋ Jehovah odude ke esit, enyuŋ eda udeme ke otu nnyin; edi ekusɔŋ ibuot ye Jehovah, ekunyuŋ esɔŋ ibuot ye nnyin, ke erinam itie-uwa ke idem mbufo ŋkɔrɔ ke itie-uwa Jehovah Abasi nnyin.

²⁰Nte Achan eyen Zerah ikanamke idiɔk ido ke ŋkpɔ nsobo oro, ndien iyaresit etiene ofuri esop Israel? Ndien owo oro ikakpaha ikpɔŋ ke idiɔk ido esie.

²¹Ndien nditɔ Reuben, ye nditɔ Gad, ye ubak esien Manasseh ebɔrɔ ikpɔ owo mme tɔsin Israel, ete,

²²Abasi, Abasi Jehovah, Abasi, Abasi Jehovah ɔfiɔk, Israel eyenyuŋ efiɔk: ama edi nsɔŋ-ibuot, mme idiɔk ido ye Jehovah (kunyaŋa nnyin mfin emi),

²³esin nnyin inam itie-uwa inɔ idem nnyin, man ifiak edem ikpɔŋ Jehovah, ama onyuŋ edi ndifɔp edifɔp uwa ke esit, mme inuak-udia, mme ndiwa uwa emen ke esit, yak Jehovah oyom;

²⁴ndien edieke misuk idige ndik edi ntak emi nnyin inamde emi, ite, Ndusuk nditɔ mbufo eyedɔhɔ nditɔ nnyin ke ini iso, ete, Mbufo esaŋa nso ye Jehovah Abasi Israel?

²⁵Koro Jehovah onimde akpa Jordan ke adaŋa ke ufɔt nnyin ye mbufo, nditɔ Reuben, ye nditɔ Gad; mbufo inyeneke udeme ke Jehovah: ndien nditɔ mbufo eyenam nditɔ nnyin etre ndibak Jehovah.

²⁶Mmɔdo nnyin ikɔdɔhɔde, ite, Nnyin ikam isin ubɔk inam itie-uwa emi inɔ idem nnyin, idige ke eke edifɔp uwa, inyuŋ idige ke eke uwa emem:

²⁷edi enye edi ntiense ke ufɔt nnyin ye mbufo, ye ke ufɔt mme emana nnyin emi editienede nnyin edem, man nnyin inam utom Jehovah ke iso esie, ke edifɔp uwa nnyin, ye ke mme uwa nnyin efen, ye ke mme uwa emen nnyin; man nditɔ mbufo ekudɔhɔ nditɔ nnyin, ke ini iso, ete, Mbufo inyeneke udeme ke Jehovah.

²⁸Ndien nnyin ikɔdɔhɔ ite, Ama ekem, adaŋemi mmɔ edidɔhɔde (ntem) ye nnyin ye nditɔ nnyin, ke ini iso, nnyin iyebɔrɔ, ndien, ite, Mbufo ese mbiet itie-uwa Jehovah emi mme ete nnyin ekenamde, idige ke eke edifɔp uwa, inyuŋ idige ke eke uwa efen; edi enye edi ntiense ke ufɔt nnyin ye mbufo.

²⁹Nsa nnyin O! nnyin isɔŋke ibuot ye Jehovah, inyuŋ ifiake edem ikpɔŋ Jehovah mfin emi, inyuŋ inamke itie-uwa ke eke edifɔp uwa, ye ke eke inuak-udia, ye ke eke uwa-emem, ikɔrɔ ke itie-uwa Jehovah Abasi nnyin emi odude ke iso iduŋ esie.

³⁰Ndien ke adaŋemi Phinehas oku, ye mbɔŋ esop, ye ikpɔ owo mme tɔsin Israel emi edude ye enye ekopde ikɔ oro nditɔ Reuben, ye nditɔ Gad, ye nditɔ Manasseh edɔhɔde, enem mmɔ esit.

³¹Ndien Phinehas, eyen Eleazar, oku, ɔdɔhɔ nditɔ Reuben, ye nditɔ Gad, ye nditɔ Manasseh, ete, Nnyin imɔfiɔk mfin emi ite ke Jehovah odudu ke ufɔt nnyin: koro mbufo minamke idiɔk-ŋkpɔ emi ye Jehovah: ndien mbufo ema esioŋo nditɔ Israel ke ubɔk Jehovah enyaŋa.

³²Edikem, Phinehas, eyen Eleazar, oku, ye mbɔŋ oro enyɔŋɔ ekpɔŋ nditɔ Reuben, ye nditɔ Gad, ke isɔŋ Gilead, etiene nditɔ Israel ke isɔŋ Canaan, eketiŋ ikɔ enɔ mmɔ.

³³Ndien ikɔ oro enem nditɔ Israel esit; ndien Israel enyuŋ ekɔm Abasi, ndien mmɔ idɔhɔke aba, ite imɔŋɔ ikeŋwana ekɔŋ ye mmɔ, inyuŋ ibiat edem emi nditɔ Reuben ye nditɔ Gad eduŋde ke esit.

³⁴Ndien nditɔ Reuben ye nditɔ Gad esio itie-uwa oro enyiŋ, ete, Enye edi ntiense ke ufɔt nnyin, ete ke Jehovah edi Abasi.