Read efik JOSHUA 24 Bible Online

JOSHUA 24 - efik bible

JOSHUA 24

¹EDIKEM Joshua obon kpukpru esien nditɔ Israel ke Shechem, onyuŋ okot mbiowo Israel, ye ikpɔ owo mmɔ, ye mme ekpe-ikpe mmɔ, ye mme andidaha mmɔ edi; ndien mmɔ edida ke iso Abasi.

²Ndien Joshua ɔdɔhɔ kpukpru owo, ete, Ntem ke Jehovah Abasi Israel ɔdɔhɔ, ete, Mme ete mbufo toto ko, Terah ete Abraham, ye ete Nahor ekeduŋ ke edem Akpa oko; enyuŋ enam ŋkpɔ mme abasi efen.

³Ndien ŋkada ete mbufo Abraham ke edem akpa oko, nnyuŋ nda enye nsaŋa ke ofuri isɔŋ Canaan, nnyuŋ nnam ubon esie ewak ndien nnɔ enye Isaac.

⁴Ndien nda Jacob ye Esau nnɔ Isaac; nnyuŋ nnɔ Esau obot Seir, nte ada enye enyene: edi Jacob ye nditɔ esie esuhɔre eka Egypt.

⁵Ndɔŋ Moses ye Aaron utom ŋko, nnyuŋ ndutuhɔ Egypt, kpa nte nnamde ke otu mmɔ; ndien ke ini ŋkpɔ oro ebede nsio mbufo mfep.

⁶Ntre ke ŋkosio mme ete mbufo ke Egypt: ndien mbufo edisim ke inyaŋ; ndien Egypt eda chariot ye horse ebine mbufo esim Ididuot Inyaŋ.

⁷Ndien ke ini mmɔ esemede enɔ Jehovah, enye esin ekim ke ufɔt mbufo ye Egypt, onyuŋ anam inyaŋ edifuk mmɔ; enyin mbufo ema ekut se ŋkanamde ke Egypt: ndien mbufo ema enyuŋ eduŋ ke wilderness ediwak usen.

⁸Ndien nda mbufo nduk ke isɔŋ mme Amorite, emi eduŋde ke edem Jordan oko; ndien mmɔ eŋwana ekɔŋ ye mbufo: ndien mmen mmɔ nsin mbufo ke ubɔk, mbufo enyuŋ eda isɔŋ mmɔ enyene; ami nnyuŋ nsobo mmɔ ke iso mbufo mfep.

⁹Ekem Balak eyen Zippor, ɔbɔŋ Moab, adaha ada ediŋwana ye Israel, enye onyuŋ ɔdɔŋ ekekot Balaam eyen Beor,

¹⁰ete edisuŋi mbufo: edi ŋkonyimeke ndikop nnɔ Balaam: mmɔdo enye akabarede ɔdɔdiɔŋ mbufo: ntre ke nsio mbufo ke ubɔk esie.

¹¹Ekem mbufo ebe Jordan edi Jericho; ndien mbio-obio Jericho, ye mme Amorite, ye mme Perizzite, ye mme Canaanite, ye mme Hittite, ye mme Girgashite, ye mme Hivite, ye mme Jebusite eŋwana ekɔŋ ye mbufo; ndien mmen mmɔ nsin mbufo ke ubɔk.

¹²Ŋkonyuŋ ndɔŋ atat nte ebem mbufo iso, ndien enye ebin mmɔ ke iso mbufo efep, kpa mbɔŋ mme Amorite mbiba; idige ke ofut fo, inyuŋ idige ke utiga fo.

¹³Ndien mma nnɔ mbufo isɔŋ eke mbufo mikanamke utom ke esit, ye obio eke mikɔbɔpke, ndien mbufo eduŋ ke esit: mbufo edia iŋwaŋ vine ye olive eke mikedige mbufo etɔ.

¹⁴Mbufo ebak Jehovah, ndien, enyuŋ enam ŋkpɔ esie ke esit kiet, ye ke akpanikɔ: enyuŋ emen mme abasi emi mme ete mbufo ekenamde ŋkpɔ mmɔ ke edem akpa oko, ye ke Egypt, eduɔk;

¹⁵ndien enam ŋkpɔ Jehovah. Edi mbufo mimaŋa ndinam ŋkpɔ Jehovah, emek ke idem mbufo ndien, mfin emi, enye eke mbufo edinamde ŋkpɔ esie: edide mme abasi emi mme ete mbufo, emi edude ke edem akpa oko, enamde ŋkpɔ enɔ mmɔ, onyuŋ edide mme abasi mme Amorite emi mbufo eduŋde ke isɔŋ mmɔ: edi ama edi ami ye ufɔk mi, nnyin iyenam ŋkpɔ Jehovah.

¹⁶Ndien kpukpru owo ebɔrɔ, ete, Nsa nnyin O! nnyin ikpɔŋke Jehovah inam ŋkpɔ abasi efen:

¹⁷koro edi Jehovah Abasi nnyin okosio nnyin ye mme ete nnyin efep ke isɔŋ Egypt, ke ufɔk ufin, ɔdɔk edi, emi okonyuŋ anamde ikpɔ idiɔŋɔ emi ke iso nnyin, onyuŋ ekpemede nnyin ke ofuri usuŋ emi nnyin ikesaŋade ke esit, ye ke otu kpukpru obio oro nnyin ikesaŋade ke ufɔt mmɔ ibe:

¹⁸Jehovah ama onyuŋ osio kpukpru obio oro, ye mme Amorite emi eduŋde ke edem oro, ke iso nnyin efep: mmɔdo nnyin iyenam ŋkpɔ inɔ Jehovah: koro edi enye edi Abasi nnyin.

¹⁹Ndien Joshua ɔdɔhɔ kpukpru owo, ete, Mbufo ikwe nte enamde ŋkpɔ enɔ Jehovah: koro enye edide edisana Abasi; enye edi Abasi ufup; enye idifenke mme ukwaŋ-ŋkpɔ mbufo ye mme idiɔk ido mbufo.

²⁰Edi mbufo ema ekpɔŋ Jehovah, enyuŋ enam ŋkpɔ enɔ isen abasi, enye eyekabare, ndien, anam mbufo idiɔk, onyuŋ osobo mbufo, okposuk edi eke enye ɔkɔfɔnde ye mbufo.

²¹Ndien kpukpru owo edɔhɔ Joshua, ete, Ihih, edi iyenam ŋkpɔ Jehovah.

²²Ndien Joshua ɔdɔhɔ mbon oro, ete, Mbufo edi mme ntiense ebaŋa idem mbufo, ete ke mbufo ema emek Jehovah ke idem mbufo, ete inam ŋkpɔ esie. Ndien mmɔ enyime ete, Nnyin idi mme ntiense.

²³(Enye ete), Mbufo esio ndien isen abasi emi edude ke otu mbufo efep, enyuŋ enuk esit mbufo enɔ Jehovah Abasi Israel.

²⁴Ndien kpukpru owo edɔhɔ Joshua, ete, Nnyin iyenam ŋkpɔ Jehovah Abasi nnyin, inyuŋ ikop uyo esie.

²⁵Ndien Joshua odiomi ediomi ye kpukpru owo ke usen oro, onyuŋ eteme mmɔ mme ewuhɔ ye mme item ke Shechem.

²⁶Joshua onyuŋ ewet kpukpru ikɔ emi, esin ke ŋwed mme ewuhɔ Abasi, onyuŋ emen akamba itiat owuk ke idak ofriyo kiet emi adade adiana edisana ufɔk Jehovah.

²⁷Ndien Joshua ɔdɔhɔ kpukpru owo, ete, Sese itiat emi eyedi ntiense ke otu nnyin: koro enye omokop kpukpru ikɔ Jehovah, emi enye ɔkɔdɔhɔde nnyin: enye eyedi ntiense ke otu mbufo, mbak mbufo edikaŋ Abasi mbufo.

²⁸Ekem Joshua ayak kpukpru owo enyɔŋ ke udeme mmɔ.

²⁹Edikem ke ŋkpɔ emi ema ekebe, Joshua eyen Nun, owo Jehovah, akpa, osim isua ikie ye duop.

³⁰Ndien mmɔ ebuk enye ke adaŋa udeme esie, ke Timnath-serah, emi odude ke obot Ephraim, ke edem edere-edere obot Gaash.

³¹Ndien Israel enam ŋkpɔ enɔ Jehovah, ke ofuri eyo Joshua, ye ke ofuri eyo mbiowo emi edude uwem ekan Joshua, emi enyuŋ efiɔkde ofuri utom Jehovah, emi enye akanamde ɔnɔ Israel.

³²Ndien mmɔ eda mme ɔkpɔ Joseph, emi nditɔ Israel ekemende ke Egypt edɔk, ebuk ke Shechem ke iŋwaŋ oro Jacob ekedepde ye nditɔ Hamor, ete Shechem, ke mbak silver ikie: ndien enye akabare oduk ke udeme nditɔ Joseph.

³³Ekem, Eleazar, eyen Aaron, akpa; ndien mmɔ ebuk enye ke Gibeah Phinehas eyen esie, emi ekenɔde enye ke otu ikpɔ obot Ephraim.