Read efik JOSHUA 8 Bible Online

JOSHUA 8 - efik bible

JOSHUA 8

¹NDIEN Jehovah ɔdɔhɔ Joshua, ete, Kudikhe, kunyuŋ uyak esit ɔduɔ fi: nam kpukpru mbon ekɔŋ esaŋa ye afo, ndien daha ke enyɔŋ dɔk ke Ai; sese, nda ɔbɔŋ Ai, ye ikɔt esie, ye obio esie, ye isɔŋ esie, nsin fi ke ubɔk:

²ndien afo eyenam Ai ye ɔbɔŋ esie, kpa nte akanamde Jericho ye ɔbɔŋ esie: edi mbufo ebume ŋkpɔ esie, ye ufene esie, eda ke idem mbufo: nim mbon-udibe ke edem obio.

³Edikem Joshua adaha ke enyɔŋ ye kpukpru mbon-ekɔŋ, onyuŋ ɔdɔk aka Ai: ndien Joshua emek tɔsin mbon uko edip ye duop, ɔdɔŋ mmɔ eka ke okoneyo.

⁴Enye onyuŋ eteme mmɔ, ete, Sese, mbufo edibe ke edem obio ese obio: ekukpɔŋ obio ata anyan usuŋ, ndien mbufo kpukpru etie ebet:

⁵ndien ami ye kpukpru mmɔ emi edude ye ami iyesaŋa ikpere obio: ndien ama ekem, ke adaŋemi mmɔ ewɔŋɔde ndiŋwana ye nnyin, kpa nte ke akpa, nnyin iyefeŋe ke iso mmɔ,

⁶(Ndien mmɔ eyewɔŋɔ ebine nnyin) tutu nnyin idudi mmɔ ifep ke obio: koro mmɔ eyedɔhɔ ete, Mmɔ efeŋe ke iso nnyin, kpa nte ke akpa: ntem ke nnyin idifeŋe itɔk ke iso mmɔ.

⁷Ndien mbufo edaha ke itie udibe, ekeda obio: Jehovah Abasi mbufo eyenyuŋ ada enye ɔnɔ mbufo ke ubɔk.

⁸Ndien ama ekem, adaŋemi mbufo ema ekeda obio, mbufo efɔp obio ke ikaŋ: mbufo enam ke uyo Jehovah.

⁹Sese, mmowuk mbufo. Ekem Joshua ɔdɔŋ mmɔ utom: ndien mmɔ eka ke itie udibe, ndien mmɔ etie ke ufɔt Bethel ye Ai, ke edem Ai emi utin osopde: Joshua onyuŋ ana ke otu mbon ekɔŋ ke okoneyo oro.

¹⁰Ndien Joshua abak adaha ke enyɔŋ ke usenubɔk otim mbon ekɔŋ, ndien enye ye mbiowo Israel ebem mbon-ekɔŋ iso edɔk eka Ai.

¹¹Ndien kpukpru mbon ekɔŋ eke edude ye enye edɔk, ekpere, enyuŋ edi ke iso obio, enyuŋ enam nna ekɔŋ ke edem edere Ai. Ebedeŋ kiet onyuŋ ana ke ufɔt mmɔ ye Ai.

¹²Ndien enye ada tɔsin owo ition onim ke itie udibe ke ufɔt Bethel ye Ai, ke edem obio emi utin osopde.

¹³Ntem ke mmɔ etim enim ofuri udim-ekɔŋ emi edude ke edem edere obio, ye mbon-udibe mmɔ ke edem obio emi utin osopde, ndien Johsua aka okoduk ke ufɔt ebedeŋ ke okoneyo oro.

¹⁴Edikem adaŋemi ɔbɔŋ Ai okutde, mmɔ ewara ebak edaha ke enyɔŋ, ndien mbio-obio ewɔŋɔ ndidi ekɔŋ ye Israel, enye ye kpukpru ikɔt esie, ke ɔtɔ emi esiakde, ke iso una-isɔŋ; edi enye ifiɔkke ete ke mbon-udibe ena do ebet enye ke edem obio.

¹⁵Ndien Joshua ye ofuri Israel eyak mmɔ oro esuan mmɔ, enyuŋ efeŋe eka edem wilderness.

¹⁶Ndien mmɔ ekot kpukpru owo eke edude ke obio, ete edi ebine mmɔ: ntem ke mmɔ ebine Joshua, enyuŋ edianare ekpɔŋ obio.

¹⁷Ndien owo ndomo kiet eke miwɔrɔke ibine Israel, iduhe ke Ai ye ke Bethel: mmɔ enyuŋ eyak obio ana iŋwaŋ, enyuŋ ebine Israel.

¹⁸Ndien Jehovah ɔdɔhɔ Joshua, ete, Da eduat emi odude fi ke ubɔk nyan se Ai: koro nyeda enye nsin fi ke ubɔk. Ndien Joshua ada eduat emi odude enye ke ubɔk, anyan ese obio.

¹⁹Ndien mbon-udibe ewara eto ke itie mmɔ, efeŋe ke ini enye anyande ubɔk esie, ekeduk obio, enyuŋ eda enye, ndien ewara ekim ikaŋ ke obio.

²⁰Ndien mbio-obio Ai ekabare ese edem ekut, ndien, sese, nsuŋikaŋ obio mmɔ ɔdɔk ke enyɔŋ; ndien mmɔ ikwe nte efeŋede eka nnasia, mme ufien, ke edem mbiba; ndien mbon oro efeŋede eka edem wilderness, efiak edem eŋwana ye mme andibine.

²¹Edikem, adaŋemi Joshua ye ofuri Israel ekutde nte mbon-udibe ema ekeda obio, ye nte nsuŋikaŋ obio ɔdɔkde, mmɔ efiak ekewot mbio-obio Ai.

²²Ndien mmɔ eken ewɔŋɔ ke obio ekebiɔŋɔ mmɔ; ndien mmɔ edu ke ufɔt Israel, usuk ke edem emi, usuk ke edem eken; mmɔ oro enyuŋ ewot mmɔ, tutu iyakke baba owo mmɔ kiet ɔbɔhɔ ɔsuhɔ.

²³Ndien mmɔ emum ɔbɔŋ Ai ye uwem, enyuŋ emen enye esɔk Joshua.

²⁴Edikem adaŋemi Israel ema ekewot kpukpru mme andiduŋ Ai ema ke iŋwaŋ, ye ke ikɔt eke ebinede mmɔ ke esit, ndien adaŋemi kpukpru mmɔ eduɔŋɔde ke iso ofut, tutu esobo mmɔ ema, ndien ofuri Israel efiak edem eka Ai, ekebiat enye ke iso ofut.

²⁵Ndien kpukpru owo eke eduɔŋɔde ke usen oro, iren ye iban, edi tɔsin owo duopeba, kpa kpukpru mbio-obio Ai.

²⁶Koro Joshua mimumke ubɔk esiemɔ, emi enye akamade eduat anyan, ifiak, tutu enye edisobo kpukpru mme andiduŋ Ai.

²⁷Edi Israel eda ufene ye ŋkpɔ mbume obio oro ke idem mmɔ kpa ke uyo Jehovah emi enye okowukde Joshua.

²⁸Ndien Joshua ɔfɔp Ai, onyuŋ onim enye ke ndon ke nsinsi, kpa ŋwure tutu osim mfin emi.

²⁹Enye onyuŋ emen ɔbɔŋ Ai eyiri ke eto tutu osim mbubreyo: ndien ke ini utin osopde, Joshua owuk, ete ekɔŋɔre okpo esie ke eto oro efep, ndien mmɔ eda enye eduɔk ke inua-etop obio, enyuŋ ekubi enye akwa ebok itiat ke idem tutu osim mfin emi.

³⁰Ndien Joshua anam itie-uwa ɔnɔ Jehovah Abasi Israel ke obot Ebal,

³¹kpa nte Moses owo Jehovah eketemede nditɔ Israel, nte enyuŋ ewetde ke ŋwed mbet Moses, itie-uwa mfuri itiat eke owo mikemenke ukwak idiɔŋ mmɔ: ndien mmɔ efɔp edifɔp uwa ke esit enɔ Jehovah, enyuŋ ewa uwa emem.

³²Enye onyuŋ ada utɔŋɔ ntak mbet Moses, emi enye ekewetde ke iso nditɔ Israel, ewet do esin ke mme itiat.

³³Ndien ofuri Israel, ye mbiowo mmɔ, ye ndidaha, ye mme ekpe-ikpe mmɔ, eda ke edem ekebe emi, ye ke edem eken, ke iso mme oku mme Levite, emi ebiomde ekebe ediomi Jehovah, ye esen owo, ye amana ke otu mmɔ; ubak mmɔ kiet ekem ye obot Gerizim, ubak mmɔ eken enyuŋ ekem ye obot Ebal; kpa nte Moses owo Jehovah ekebemde iso owuk, ete mmɔ ediɔŋ nditɔ Israel.

³⁴Ndien ke ŋkpɔ oro ebede, enye okot kpukpru ikɔ mbet oro ye eke eridiɔŋ ye eke isuŋi, ekem ke kpukpru se ewetde ke ŋwed ibet.

³⁵Ndien ikɔ ndomo kiet eke Joshua mikotke ke iso ofuri esop Israel, ye iban, ye nditɔwɔŋ, ye isen owo emi esaŋade ke otu mmɔ, iduhe ke otu kpukpru se Moses eketemede.