Read efik 2 ŊWED THESSALONICA 2 Bible Online

2 ŊWED THESSALONICA 2 - efik bible

2 ŊWED THESSALONICA 2

¹EDI kabaŋa eridi Ɔbɔŋ nnyin Jesus Christ, ye erisobo emi nnyin idisobode ye Enye, nnyin imekpe mbufo ubɔk, nditɔ-ete

²ite ekuyak baba ŋkpɔ kiet awara esiŋere mbufo ekikere, onyuŋ afina mbufo, ye ŋkpɔ oro edide spirit, ye edide ikɔ, ye onyuŋ edide ŋwed eke etiede nte edi ubɔk nnyin ewet, ete usen Ɔbɔŋ ama ededi.

³Ekuyak owo abiaŋa mbufo ke baba usuŋ kiet; koro usen oro ididige, tutu mfiak-edem ebem iso odu, owo eke edide ata abiat-ibet onyuŋ ayarare idem,

⁴eyen nsobo, kpa enye emi ɔbiɔŋɔde Abasi, onyuŋ emenerede idem onim kenyɔŋ ɔbiɔŋɔ kpukpru se ekotde Abasi enyuŋ etuakde ibuot enɔ; tutu enye etie ke temple Abasi osio idem owut, ete idi Abasi.

⁵Nte mbufo itihi nte ŋkam ntetiŋ ŋkpɔ emi nnɔ mbufo, ke adaŋemi ŋkodude ye mbufo?

⁶Mbufo emɔfiɔk ke emi se ikpande enye, man enye ediyarare idem ke edikem ini esie.

⁷Koro ndibe odudu eribiat-ibet ɔtɔtɔŋɔ utom ke emi: edi ikemeke ndiyarare idem tutu ekpɔnɔre andikpan efep ke usuŋ.

⁸Adaŋoro ndien eyeyarare abiat-ibet oro, emi Ɔbɔŋ Jesus eyeda ibifik inua Esie owot enye, onyuŋ ada eriyarare eridi Esie osobo enye.

⁹Eridi abiat-ibet oro oto ke ubɔk-utom Satan, asaŋa ye kpukpru odudu ye mme idiɔŋɔ ye nsu-nsu mme utibe-ŋkpɔ,

¹⁰ye kpukpru abiaŋa eke etode ukwaŋ ido etiene mmɔ emi esosobo; sia mmɔ minyimeke ndibɔ ima akpanikɔ, man enyaŋa mmɔ.

¹¹Emi esin Abasi ɔdɔŋ abiaŋa ndinam utom ke esit mmɔ, ete enim nsu ke akpanikɔ:

¹²man edikpe ikpe kpukpru owo emi midaha akpanikɔ, edi edarade ke ukwaŋido.

¹³Edi ana ɔnɔ nyin ndikɔm Abasi kpukpru ini mbaŋa mbufo, nditɔ-ete emi Ɔbɔŋ amade, koro Abasi ama ɔkɔtɔŋɔ ke eritɔŋɔ emek mbufo ɔnɔ erinyaŋa, ke erinam mbufo esana ke Spirit, ye ke erinam mbufo ebuɔt idem ke akpanikɔ Esie.

¹⁴Enye okonyuŋ ada gospel nnyin okot mbufo abaŋa emi, ete mbufo edibɔ ubɔŋ Ɔbɔŋ nnyin Jesus Christ enyene.

¹⁵Mmɔdo ndien, nditɔ-ete, esɔŋɔ eda, emum mme item emi ekekpepde mbufo ekama, ye item oro edide ke ikɔ-inua, onyuŋ edide ke ŋwed emi nnyin inɔde.

¹⁶Ndien Ɔbɔŋ nnyin Jesus Christ, ke Idem Esie, ye Abasi Ete nnyin, emi akamade nnyin, onyuŋ ɔnɔde nnyin nsinsi ndɔŋesit ye eti idori-enyin ke mfɔn,

¹⁷akpakam ɔdɔŋ mbufo esit, onyuŋ anam mbufo esɔŋɔ eda ke kpukpru nti utom ye ikɔ.