Read efik 2 ŊWED THESSALONICA 3 Bible Online

2 ŊWED THESSALONICA 3 - efik bible

2 ŊWED THESSALONICA 3

¹KE akpatre itie, nditɔ-ete, enam mkpe-ubɔk enɔ nnyin ete, ikɔ Abasi edifehe asuana onyuŋ enyene ubɔŋ, kpa nte edide ke ŋkaŋ mbufo;

²enyuŋ ebeŋe ete, enyaŋa nnyin esio ke ubɔk mme idiɔk owo, eke esaŋade ke ukwaŋ ekikere esit mmɔ: koro idige kpukpru owo enyene mbuɔtidem.

³Edi Ɔbɔŋ anam akpanikɔ; Enye eyenam mbufo esɔŋɔ eda, eyenyuŋ ekpeme mbufo mbak andidiɔk.

⁴Nnyin imonyuŋ inyene ɔyɔhɔ mbuɔtidem ke Ɔbɔŋ ibaŋa mbufo, ite mbufo ke enanam se nnyin itemede, enyuŋ enam.

⁵Ɔbɔŋ akpakam onyuŋ ɔwɔŋɔre mbufo esit esin ke ima Abasi ye ime Christ.

⁶Imada enyiŋ Ɔbɔŋ nnyin Jesus Christ isɔŋɔ inɔ mbufo uyo, ite edianare idem ye eyen-ete ekededi eke asaŋade otime-otime, minyuŋ isaŋake ke item eke ekɔbɔde ke inua nnyin.

⁷Mbufo ke idem mbufo emotim efiɔk adaŋa nte mbufo ekpekpebede nnyin;

⁸nnyin ikakamake idem otime-otime ke otu mbufo; nnyin ikonyuŋ idiaha udia ke ikpikpu ke ubɔk owo ekededi; edi ikaŋwana idem inam ɔkpɔsɔŋ utom ke okoneyo ye uwemeyo, mbak nnyin ididi mbiomo inɔ owo ekededi ke otu mbufo.

⁹Inamke ntre koro nnyin minyeneke unen ndikpetre utom; edi ikanam ntre, man inɔ mbufo uwut-ŋkpɔ, ete, ekpekpebe nnyin.

¹⁰Koro kpa ke adaŋemi nnyin ikodude ye mbufo, nnyin inɔ mbufo uyo ite, Edieke owo minyimeke ndinam utom, enye okunyuŋ adia ŋkpɔ.

¹¹Koro nnyin imokop ibaŋa ndusuk owo eke esaŋade otime-otime ke otu mbufo, minyuŋ inamke utom, edi enɔhɔde ke mbubehe owo eŋwen.

¹²Ima ida uyo Ɔbɔŋ Jesus Christ isɔŋɔ iwuk inyuŋ iteme mmɔ eke etiede ntem, ite mmɔ etie suŋ, enam utom, eŋwana se edade ekama idem.

¹³Ama edi mbufo, nditɔ-ete, ekuduɔ esit ke erinam eti ŋkpɔ.

¹⁴Edieke owo ekededi mikopke uyo eke inɔde ke ŋwed emi, enim owo oro idiɔŋɔ, ekunyuŋ eduk nduk ye enye, man but anam enye.

¹⁵Edi ekubat enye nte usua, edi etunɔ enye nte eyen-ete.

¹⁶Ɔbɔŋ emem ke Idem Esie akpakam ɔnɔ mbufo emem kpukpru ini, ŋkpɔ etie nte etetie. Ɔbɔŋ akpakam odu ye kpukpru mbufo.

¹⁷Ami Paul nda ubɔk mi ŋwet ekɔm mi; oro owut ete edi ami ŋwet ke kpukpru ŋwed mi: ntem ke ŋwewet.

¹⁸Mfɔn Ɔbɔŋ nnyin Jesus Christ akpakam odu ye kpukpru mbufo