Read efik 1ŊWED TIMOTHY 1 Bible Online

1ŊWED TIMOTHY 1 - efik bible

1ŊWED TIMOTHY 1

¹AMI Paul, emi ndide apostle Christ Jesus, nte ekemde ye uyo Abasi Andinyaŋa nnyin ye eke Christ Jesus idori-enyin nnyin, ŋwet ŋwed emi nnɔ esɔk Timothy, ata eyen mi ke mbuɔtidem;

²mfɔn ye mbɔm ye emem akpakam oto ke ubɔk Abasi Ete ye Christ Jesus Ɔbɔŋ nnyin etiene fi.

³Ke adaŋemi mbede ŋkaka ke Macedonia, ŋketeme fi nte osuk etie ke Ephesus, man ɔsɔŋɔ ɔnɔ ndusuk owo do uyo ete mmɔ ekukpep owo ukpep-ŋkpɔ eke ɔkpuhɔrede ye se nnyin ikekpepde,

⁴ekunyuŋ ekpaŋ utɔŋ ke ŋke ye ata anyan mbuk emana, emi esinde eneni odu, edi mikpepke ŋkpɔ ibaŋa ido erinyaŋa Abasi eke asaŋade ye mbuɔtidem.

⁵Edi mma nnɔ uyo emi, man oto do mmɔ enyene ima eke otode ke edisana esit, ye esit eke midiɔŋɔke idiɔk ke idem esie, ye ata mbuɔtidem.

⁶Ndusuk owo ema edue ewɔŋɔre ekpɔŋ mme ŋkpɔ emi, ebine ikpikpu ndutiŋ;

⁷mmɔ eyom ndidi mme ekpep-ibet, okposuk edi nte mmɔ mitimke ifiɔk se mmɔ edɔhɔde, ye se mmɔ esɔŋɔde uyo etiŋ ebaŋa.

⁸Edi nnyin imɔfiɔk ite ibet ɔfɔn, edieke owo adade enye nte asaŋade ekekem ye se enɔde enye ebaŋa, onyuŋ ɔfiɔkde emi ete,

⁹inamke ibet inɔ nti owo, edi enam enɔ mme abiat-ibet ye mbon nsɔŋ-ibuot, ye mmɔ emi miteŋeke Abasi, ye me anam idiɔk, ye owo esit ndek,

¹⁰ye mme oburobut owo ye mme owot-ete ye mme owot-eka, ye mme owot-owo, ye mbon use, ye mme anam obukpo ido, ye mme eyip-owo, ye mme osu-nsu, ye mme ada uŋwɔŋɔ ke abiaŋa, ye mme anam ido eŋwen ekededi eke ɔbiɔŋɔde eti erikpep,

¹¹kpa nte gospel emi ubɔŋ ata edifɔn Abasi ekpepde, emi ekenyuŋ eyakde enɔ mi.

¹²Mmɔkɔm Enye emi ɔkɔnɔde mi ukeme, kpa Christ Jesus Ɔbɔŋ nnyin, koro Enye akabatde mi ke owo akpanikɔ, onyuŋ onimde mi ete nnam utom Esie;

¹³emi ke eyo oko ŋkosuŋide Enye, ŋkonyuŋ ŋkɔbɔde Enye, nnyuŋ nnam Enye esuene: edi Abasi akatua mi mbɔm, koro ŋkanamde emi ke unana ifiɔk, ke ini mmenimke ke akpanikɔ:

¹⁴edi mfɔn Ɔbɔŋ nnyin ama awak eti-eti ɔnɔ mi, ɔkɔrɔ ye mbuɔtidem ye ima eke odude ke Christ Jesus.

¹⁵Ikɔ oro edi akpanikɔ, onyuŋ odot owo ɔbɔ ke ofuri esit, ete, Christ Jesus ekedi ke ererimbot ndinyaŋa mme idiɔk owo; emi ami ndide etubom mmɔ.

¹⁶Edi eketua mi mbɔm ke ntak emi, man Jesus Christ akpada mi, nte akan idiɔk owo, ayarare ofuri anyan ime Esie, onyuŋ onim ete, nda ke ibuot mmɔ emi editienede ebuɔt idem ye enye ekosim uwem nsinsi.

¹⁷Yak emen ukpono ye ubɔŋ enɔ Edidem emi akarade ke kpukpru eyo, emi mikemeke ndikpa, enyin minyuŋ ikemeke ndikut Enye, kpa Abasi kierakiet ke nsinsi-nsinsi. Amen.

¹⁸Uyo emi ke ŋkemen nnɔ fi, Timothy eyen mi, nte ekemde ye se ekebemde iso etiŋ ebaŋa fi, man oto do afo aŋwana eti eŋwan.

¹⁹Yire mbuɔtidem ye eti esit kama; koro ndusuk owo ema etop enye eduɔk enyuŋ ewure ke uwem mbuɔtidem.

²⁰Hymenaeus ye Alexander edu ke otu mbon oro; mma nyak mmɔ nsin Satan ke ubɔk, man ekpep mmɔ nditre ido isuŋi mmɔ.