Read efik 1ŊWED TIMOTHY 3 Bible Online

1ŊWED TIMOTHY 3 - efik bible

1ŊWED TIMOTHY 3

¹IKƆ emi edi akpanikɔ, ete, edieke owo oyomde ndida idaha ufɔk Abasi enye oyom eti utom.

²Ndien ada-idaha ufɔk Abasi enyene ndien ndidi owo emi owo mikemeke ndidori enye ikɔ; enyene ndidi ebe ŋwan kiet; enyene ndidi owo emi afarade ke idem, onyuŋ enyenede eti ibuot, onyuŋ otimde asaŋa, onyuŋ akamade isen owo, onyuŋ amade ndikpep owo ŋkpɔ.

³Enye ikpe-dige owo mmin, ye owo mfiomo; edi enyene ndidi suŋ-suŋ owo, emi midige owo utɔk, minyuŋ isinke esit ke okuk.

⁴Enye enyene ndidi owo emi otimde akama ufɔk esiemɔ, onyuŋ anamde nditɔ esie esuk ibuot ke kpukpru ido eke odotde ukpono

⁵(edi edieke owo mifiɔkke ndikama ufɔk esiemɔ, enye edikeme didie ndikpeme ufɔk Abasi?)

⁶Enye okudi obufa owo ke ido Abasi, mbak enye edikohore idem, ɔduɔ oduk ke ubiom-ikpe Satan.

⁷Akan oro, ana nte enye enyene eti etop ke otu mmɔ emi edude ke esien; mbak enye ediduɔ oduk ke esuene ye ke afia Satan.

⁸Kpasuk ntre mme deacon enyene ndidi owo emi edotde ukpono. Mmɔ ekunyene edeme-ikɔ iba, ekunyuŋ emehe ye ediwak wine, ekunyuŋ esin esit ke obukpo udori;

⁹mmɔ ekpemum ndibe-ŋkpɔ mbuɔtidem ekama ke edisana esit.

¹⁰Yak ebem iso edomo mmɔ efiɔk mme mmɔ edot; ndien mmɔ edinam utom nte deacon, edieke mmɔ minyeneke se idiɔkde.

¹¹Kpasuk ntre ŋko iban mmɔ ekpodot ukpono; mmɔ ikpedige mbon ebiari, edi ekpefara ke idem, enyuŋ enam akpanikɔ ke kpukpru usuŋ,

¹²Mme deacon ekpedi ebe ŋwan kiet; mmɔ ekpetim ekara nditɔ mmɔ, enyuŋ ekama ufɔk mmɔ.

¹³Koro mmɔ emi etimde enam utom deacon ebɔ eti itie enɔ idem mmɔ, enyuŋ enyene ɔkpɔsɔŋ uko ke mbuɔtidem mmɔ ye Christ Jesus.

¹⁴Ŋwewet mme ŋkpɔ emi nnɔ fi ye idori-enyin nte nyewara ndi ke ŋkaŋ fo;

¹⁵edi edieke mbigide ndidi, ŋwet man afo ɔfiɔk usuŋ nte owo ekpedude uwem ke ufɔk Abasi; emi edide ufɔk odu uwem Abasi, adaha ye isɔŋ eke akpanikɔ Abasi odorode ke esit.

¹⁶Owo ikemeke ndineni ete ido Abasi edi akwa ndibe-ŋkpɔ; Edi Enye emi akayararede Idem Esie ke obukidem; Ewut Enye nte edinen ke Spirit; Enye owut idem ɔnɔ mme angel; Ekwɔrɔ Enye ke otu mme idut, Ebuɔt idem ye Enye ke ererimbot. Emen Enye edɔk ke ubɔŋ.