Read efik 1ŊWED TIMOTHY 5 Bible Online

1ŊWED TIMOTHY 5 - efik bible

1ŊWED TIMOTHY 5

¹KUSƆŊƆ uyo usua unɔ ebi-owo, edi nɔ enye item nte ete, nyuŋ teme mkparawa nte nditɔ-ete:

²nɔ ŋkani iban item nte mme eka, nyuŋ teme mkparawa iban nte nditɔ-ete ke ata edisana ido.

³Kpono mme ebe-akpa emi edide mme ebe-akpa ke akpanikɔ.

⁴Edi edieke ebe-akpa enyenede nditɔ mme nditɔ nditɔ, yak mmɔ oro ekpep ndibem nnam se idotde ye mbon ufɔk, nnyuŋ nsio usiene nnɔ mme eka mmɔ; koro emi ɔfɔnde Abasi ke enyin.

⁵Edi ŋwan emi edide ebe-akpa ke akpanikɔ onyuŋ etiede ikpɔŋ ama odori enyin ke Abasi, onyuŋ eyire ke akam ye mkpe-ubɔk ke okoneyo ye uwemeyo.

⁶Edi ebe-akpa eke ɔduɔde oduk ke mbre amakpa ke eyo uwem.

⁷Nɔ uyo emi ndien, man mmɔ ekunyene se edoride mmɔ.

⁸Owo eke mitimke ŋkpɔ inɔ oruk esie, akpan-akpan mbon ufɔk esie, esiŋe nsa ye mbuɔtidem, onyuŋ ɔdiɔk akan owo eke minimke ke akpanikɔ.

⁹Kusin enyiŋ baba ŋwan kiet ke ŋwed nte ebe-akpa, ke enye misimke isua ata:

¹⁰Enye enyene ndidi ŋwan emi ɔkɔdɔde ebe kiet, onyuŋ enyene ndiwɔrɔ eti etop mbaŋa nti utom esie, ete edi ŋwan emi ɔkɔbɔkde nditɔ, okonyuŋ akamade isen owo, onyuŋ eyetde ukot ikɔt Abasi, onyuŋ aŋwamde mbon ukut, onyuŋ esinde idem anam kpukpru oruk nti utom.

¹¹Kubɔ enyiŋ mme ebe-akpa eke edide mkparawa iban usin ke ŋwed; koro ke ini mme idiɔk itɔŋ mmɔ edudide mmɔ ekpɔŋ Christ, mmɔ eyeyom ndidɔ ndɔ:

¹²ntre ke ikpe eyebiom mmɔ, sia mmɔ ebiatde akpa ediomi ye Enye.

¹³Akan oro, mmɔ ekpep ndifu ifu, esaŋa ke ufɔk ke ufɔk: inyuŋ idige ifu ikpɔŋ, edi ekabare mbabara ye mbon ibaŋa, etiŋ se mmɔ mikpetiŋke.

¹⁴Nyom ndien mme ebe-akpa emi misɔŋke edɔ ndɔ, enyuŋ eman nditɔ, enyuŋ ekpeme ufɔk, ekunyuŋ enɔ mme asua ifet ndisuene nnyin:

¹⁵koro ndusuk mme ebe-akpa ema ewɔrɔ ekpɔŋ usuŋ etiene Satan.

¹⁶Edieke ŋwan emi onimde ke akpanikɔ enyenede mme ebe-akpa, yak enye aŋwam mmɔ, okufihe ufɔk Abasi ye mbiomo; man ufɔk Abasi ekeme ndiŋwam ata mme ebe-akpa.

¹⁷Yak ebat ete, mbiowo eke etimde ekara edot akwa utip; akpan-akpan mmɔ emi ekpade utom ke ukwɔrɔ-ikɔ ye ukpep-ŋkpɔ.

¹⁸Koro ŋwed Abasi ɔnɔ uyo ete, Kubɔp enaŋ inua ke ini enye edigide ibokpot; onyuŋ ɔdɔhɔ ete, Anam-utom odot ukpe-utom esie.

¹⁹Kukop ikɔ-edem eke etiŋde edian ebiowo, ibɔhɔke oto ke inua owo iba mme ita.

²⁰Mmɔ emi enamde idiɔk-ŋkpɔ, sua nɔ mmɔ ke iso kpukpru owo, man mmɔ eken efehe ndik.

²¹Mmowuk fi ke iso Abasi, ye Christ Jesus, ye ndimek angel, nte afo ekpeme ndinam uyo emi; okubem iso obiom owo ke unana ntak, okunyuŋ anam baba ŋkpɔ kiet ke uma.

²²Kusɔp udori owo ubɔk umen usin ke itie; kunyuŋ unyene udeme ke idiɔk-ŋkpɔ owo eŋwen. Nim idem edisana-edisana.

²³Kuŋwɔŋ mmɔŋ-mmɔŋ aba, edi da wine esisit kabaŋa idibi fo ye unana nsɔŋidem eke ɔkɔbɔde fi.

²⁴Idiɔk-ŋkpɔ ndusuk owo eyarare, ebem iso ewɔrɔ ubiere-ikpe; edi idiɔk-ŋkpɔ ke etiene ndusuk owo ke edem.

²⁵Kpa ntre ŋko nti ido edu eke enade iŋwaŋ-iŋwaŋ; se minyuŋ inaŋa iŋwaŋ idikemeke ndidibe.