Read efik 2 ŊWED TIMOTHY 1 Bible Online

2 ŊWED TIMOTHY 1 - efik bible

2 ŊWED TIMOTHY 1

¹AMI Paul, emi ndide apostle Christ Jesus ke uduak Abasi, nte ekemde ye uŋwɔŋɔ uwem eke odude ke Christ Jesus, nnɔ ŋwed emi esɔk Timothy, eyen ima mi:

²mfɔn ye mbɔm ye emem akpakam oto Abasi Ete ye Ɔbɔŋ nnyin Christ Jesus osim fi.

³Mmɔkɔm Abasi, emi ntienede mme ete mi nnam ŋkpɔ nnɔ Enye ke edisana esit, sia mmendopke nditi fi ke akam mi ke okoneyo ye ke uwemeyo;

⁴ke ɔdɔdɔŋ mi ndikut fi, ke adaŋemi ntide mmɔŋeyet fo, man nyɔhɔ ye idaresit.

⁵Koro mmeti ata mbuɔtidem eke odude fi ke esit; eke ekebemde iso oduŋ ke esit eka eka fo Lois, ye ke esit eka fo Eunice, nnyuŋ nnim ke akpanikɔ nte enye etiene odu fi ke idem.

⁶Ke ntak emi mmeti fi nte edemere enɔ Abasi, emi ekɔnɔde fi ke eridori fi ubɔk mi.

⁷Koro Abasi ikɔnɔŋɔ nnyin spirit ufep, edi spirit odudu ye ima ye mfara-idem.

⁸Mmɔdo kuyak but anam fi ndidi ntiense nnɔ Ɔbɔŋ nnyin, kunyuŋ uyak but anam fi ye ami, owo-ŋkpɔkɔbi Esie; edi kam tiene gospel biom ukut, adaŋa nte asaŋade ekekem ye odudu Abasi:

⁹emi ama anyaŋa nnyin, onyuŋ okot nnyin edisana ikot; itoho ke se nnyin inamde edi oto ke uduak ye mfɔn Esiemɔ, emi ekɔnɔde nnyin ke Christ Jesus, ndien nsinsi eyo edidu;

¹⁰ema enyuŋ ewut uduak ye mfɔn emi ke emi ke eriyarare Andinyaŋa nnyin Christ Jesus, emi akabiatde mkpa,

¹¹okonyuŋ adade gospel Esie osio uwem, kpa uwem eke midikureke, onim ke uŋwana; okonyuŋ onim mi ete ndi andikwɔrɔ gospel emi, ye apostle, ye andikpep.

¹²Emi esin mi ŋkut ndudtuhɔ emi; edi ŋkopke but; koro mmɔfiɔk Enye emi ŋkɔbuɔtde idem ye Enye, mmonyuŋ mbure mfiɔk nte, Enye emekeme ndikpeme se ŋkayakde nsin Enye ke ubɔk tutu osim usen oro.

¹³Mum nti ikɔ eke okokopde mi ke inua kama tutu osim usen oro nte item uwem fo, ke mbuɔtidem ye ima eke odude ke Christ Jesus.

¹⁴Kpeme eti enɔ eke ekayakde enɔ fi oto ke Edisana Spirit emi oduŋde nnyin ke esit.

¹⁵Ɔmɔfiɔk emi, ete kpukpru mmɔ emi edude ke Asia ema ewɔŋɔre ekpɔŋ mi; Phygelus ye Hermogenes enyuŋ edu ke otu mmɔ.

¹⁶Ɔbɔŋ akpakam atua mbon ufɔk Onesiphorus mbɔm; koro enye ɔsɔŋɔde mi idem ediwak ini, minyuŋ inyeneke but ye ŋkpɔkɔbi mi;

¹⁷edi ke adaŋemi enye edide ke Rome, enye esin ifik oyom mi, onyuŋ okut mi.

¹⁸Ɔbɔŋ akpakam ayak enye okut mbɔm ke ubɔk Ɔbɔŋ ke usen oro. Afo omonyuŋ otim ɔfiɔk adaŋa nte enye anamde ediwak ŋkpɔ ɔnɔ mi ke Ephesus.