Read efik 2 ŊWED TIMOTHY 2 Bible Online

2 ŊWED TIMOTHY 2 - efik bible

2 ŊWED TIMOTHY 2

¹AFO ndien, eyen mi, sɔŋɔ idem ke mfɔn eke odude ke Christ Jesus.

²Nyuŋ men mme ikɔ emi okokopde mi ke inua ke iso ediwak ntiense, yak nɔ mbon akpanikɔ, eke edikemede ndikpep owo eŋwen ŋko.

³Tiene mi biom ukut, nte eti owo-ekɔŋ Christ Jesus.

⁴Baba owo kiet eke akade ekɔŋ idaha idem ikɔkɔmɔ ke mbubehe uwem emi, man enye enem andisin enyiŋ esie ke ŋwed mbon-ekɔŋ esit.

⁵Onyuŋ edieke owo aŋwanade ndikan ke mbre, iyarake enye anyanya ke enye misaŋake ke mme item iŋwana.

⁶Ɔtɔ-iŋwaŋ emi akpade utom enyene ndibem iso ndia mbuŋwum iŋwaŋ.

⁷Tim kere fiɔk se ndɔhɔde, koro Ɔbɔŋ eyenɔ fi ɔniɔŋ ke kpukpru nde.

⁸Ti Jesus Christ, emi ekesetde ke mkpa, emi okotode ke ubon David, nte ŋkwɔrɔde ke gospel mi;

⁹emi ŋkutde ukut ke esit, tutu esin mi ke ŋkpɔkɔbi nte anam-idiɔk: edi owo ikɔbike ikɔ Abasi.

¹⁰Ntre ke mme ime ye kpukpru ŋkpɔ mbaŋa mmɔ emi Abasi ekemekde, man mmɔ ŋko enyene erinyaŋa emi odude ke Christ Jesus, enyuŋ ebɔ nsinsi ubɔŋ.

¹¹Ikɔ emi edi akpanikɔ, ete, Koro edieke ima ikpa ye Enye, iyenyuŋ idu uwem ye Enye;

¹²Edieke imede ime, iyeda ubɔŋ ye Enye; Edieke ikaŋde Enye, Enye eyekaŋ nnyin;

¹³Edieke nnyin minamke akpanikɔ, Enye osuk edi anam-akpanikɔ; Koro Enye mikemeke ndikpuhɔre ŋkpɔŋ uduot Esie.

¹⁴Ti mmɔ ŋkpɔ emi; sɔŋɔ wuk mmɔ ke iso Ɔbɔŋ, ete mmɔ eku-ŋwana ebaŋa ikɔ-inua, koro oro midoroke mmɔ ke baba usuŋ kiet, edi akam ososobo mme andikop mmɔ.

¹⁵Sin ifik wut Abasi idem fo, ete idi owo eke edomode efiɔk, anam-utom eke minyeneke ntak ndikop but, edi itimde isiak ikɔ akpanikɔ.

¹⁶Fep idem ke idiɔk ye ikpikpu ndutiŋ; koro oro edi se idinamde mme owo ekɔri ke unana uteŋe Abasi, ndien se mmɔ etiŋde eyetara nte ɔnɔk, Hymenaeus ye Philetus edu ke otu mmɔ;

¹⁷ema edue ekpɔŋ akpanikɔ, ete, eriset ke mkpa ebebe ama;

¹⁸Ntem ke mmɔ ebiat mbuɔtidem ndusuk owo.

¹⁹Edi ɔkpɔsɔŋ isɔŋ, eke Abasi okowukde ufɔk Esie ke esit, ɔsɔŋɔ ada; ndien enyene idiɔŋɔ ke esit ntem, ete, Abasi ɔmɔfiɔk mmɔ emi enyenede Enye; Ye, Yak kpukpru owo emi esemede ekot enyiŋ Ɔbɔŋ edianare ekpɔŋ ukwaŋkpɔ.

²⁰Edi ke akwa ufɔk idige mkpoduoho gold ye mkpoduoho silver ikpɔŋ edu, edi se edade eto ye mbat enam enyuŋ edu; enim ndusuk mmɔ enɔ itie ukpono, enyuŋ enim mmɔ eken enɔ usuhɔreitie.

²¹Edieke owo adianarede idem ye mbio idiɔk ndutiŋ, enye eyedi ŋkpɔ-utom emi enyenede ukpono, ŋkpɔ-utom emi Abasi anamde asana, emi Ete ufɔk ekemede ndida nnam ŋkpɔ, emi ebeŋede enye enim enɔ kpukpru oruk eti utom.

²²Fehe kpɔŋ mme idiɔk itɔŋ ini uyen, nyuŋ tiene mmɔ eke esemede ekot Ɔbɔŋ ke edisana esit, bine edinen ido, ye mbuɔtidem, ye ima, ye emem.

²³Edi sin ndiduk ke ndisime eneni ɔkɔi sia ɔfiɔkde ete mmɔ ededemere utɔk.

²⁴Ndien owo Ɔbɔŋ inyeneke ndidi owo utɔk; enye enyene ndinyene suŋ-suŋ ido ye kpukpru owo; enye enyene ndifiɔk nditeme owo, nnyuŋ mme ime ke ini enamde enye idiɔk:

²⁵enye onyuŋ enyene ndida ata nsuk-esit nnam mmɔ emi ebiɔŋɔde eneŋere esaŋa; mme eyeto do Abasi anam mmɔ ekabare esit enyene ifiɔk akpanikɔ,

²⁶enyuŋ enyaŋa idem esio ke afia eke Satan akadade omum mmɔ, ke owo Abasi ama akada mmɔ nte mbuot-ekɔŋ, man mmɔ edu uwem esaŋa nte Enye amade.