Read efik 2 ŊWED TIMOTHY 3 Bible Online

2 ŊWED TIMOTHY 3 - efik bible

2 ŊWED TIMOTHY 3

¹EDI fiɔk emi, ete ndiɔk eyo eyedu ke ukperedem ini.

²Koro mme owo eyedi mme ama idem, ye mme ama inyene; enyuŋ ebure idiɔk mbure, eseri iseri, esuŋi isuŋi, esɔŋ ibuot ye ete ye eka, enana esit ekɔm, enana uteŋe Abasi,

³enana ima uduot owo; enyuŋ ebiat uŋwɔŋɔ; ema ebiari, eyak idiɔk itɔŋ akan mmɔ ubɔk, etie obom-obom, enyuŋ esua se ifɔnde;

⁴mmɔ edi mme ada owo nnɔ mme asua, ye mbon idiɔk iwuk, ye mbon ŋkohore-idem; mmɔ ema mbre ekan Abasi;

⁵enyene enyɔŋ-enyɔŋ ido uteŋe Abasi, edi isa ŋake ŋkpɔ ye odudu ke odude ke uteŋe Abasi. Wɔŋɔre kpɔŋ mmɔ eke etiede ntem.

⁶Mme owo eto ke otu mmɔ emi enyɔni eduk ke mme ufɔk ekemum ndisime iban, eda nte mbuot-ekɔŋ mmɔ-iban emi mme idiɔk-ŋkpɔ ebiomode mmɔ edobi, nsio-nsio idiɔk udɔŋ enyuŋ edade mmɔ ediyo;

⁷Mmɔ enyuŋ etak ndikpekpep kpukpru ini, edi ikemeke ndisim ifiɔk akpanikɔ.

⁸Nte Jannes ye Jambres ekaŋwanade ye Moses, kpasuk ntre ke mbon emi eŋwana ye akpanikɔ; mmɔ edi owo eke esit mmɔ ama akabiara, mmɔ ewɔrɔ obukpo ke uwem mbuɔtidem.

⁹Edi mmɔ idikaha iso ibe oro; koro ndisime mmɔ eyena iŋwaŋ ke iso kpukpru owo, kpa nte eke mmɔ oro akanade.

¹⁰Edi afo ama etiene okut se ŋkpepde, ye uwem mi, ye uduak mi, ye mbuɔtidem mi, ye anyan ime mi, ye ima mi, ye ime, ye isin-enyin, ye ndutuhɔ:

¹¹ama onyuŋ okut se ikɔwɔrɔde mi ke Antioch, ye ke Iconium, ye ke Lystra; adaŋa isin-enyin eke okobiomode mi do; edi Ɔbɔŋ akanyaŋa mi ke kpukpru oro.

¹²Ke akpanikɔ kpukpru owo eke eyomde ndidu eti uwem ke Christ Jesus enyene ndibiom isin-enyin.

¹³Edi ndiɔi owo ye mbon abiaŋa eyedɔdiɔŋ ediɔk eka iso, ebiaŋa owo, owo eyenyuŋ ebiaŋa mmɔ.

¹⁴Edi afo, yire ke se afo ekekpepde, onyuŋ otimde ɔfiɔk ete edi akpanikɔ; koro ɔmɔdiɔŋɔ owo emi ekekpepde fi, omonyuŋ ɔfiɔk ete,

¹⁵toto ke uyen afo ama ɔfiɔk Edisana Ŋwed Abasi, emi ekemede ndinam fi ɔwɔrɔ ɔniɔŋ ɔbɔ erinyaŋa ke eribuɔt idem ye Christ Jesus.

¹⁶Kpukpru ŋwed, eke edade odudu Spirit Abasi ewet, enyuŋ edi se ifɔnde ndida ŋkpep owo ŋkpɔ, nnyuŋ nsua nnɔ owo, nnyuŋ nnam owo esaŋa nte enende, nnyuŋ nteme owo edinen ido;

¹⁷man owo Abasi enyene ɔyɔhɔ ifiɔk, onyuŋ ebeŋe idem ke kpukpru nde ndinam eti utom ekededi.