Read efik 2 ŊWED TIMOTHY 4 Bible Online

2 ŊWED TIMOTHY 4 - efik bible

2 ŊWED TIMOTHY 4

¹KE iso Abasi, ye ke iso Christ Jesus, emi edikpede ikpe mme odu-uwem ye mme akpa-mkpa, mmada eriyarare Esie ye Ubɔŋ Esie ŋwuk fi nte, Kwɔrɔ ikɔ Abasi;

²Sin ifik nam emi, ke edide ekem ini, ye ke minyuŋ idige ekem ini, wut mme owo ndudue mmɔ, sua nɔ mmɔ, kpe ye mmɔ; saŋa ye ofuri ime ye erikpep nam utom emi.

³Koro ini ɔmɔŋ edi eke mme owo midibɔhɔ eti ukpep-ŋkpɔ; ndien sia utɔŋ edebede mmɔ ndikop isio ikɔ, mmɔ eyekɔ mme andikpep enɔ idem nte ekemde ye mme idiɔk udɔŋ mmɔ,

⁴eyenyuŋ esio utɔŋ efep ke akpanikɔ, enyuŋ ewɔŋɔre ebine ikpikpu mbuk.

⁵Edi ama edi afo, fara ke idem ke kpukpru ŋkpɔ, biom ukut, nam utom ɔkwɔrɔ-gospel, nam utom fo ma.

⁶Koro ke emi emɔŋ ediŋwaŋa mi eduɔk nte ediŋwɔŋ uwa, ini unyɔŋ mi ke ekpere.

⁷Mma ŋŋwana eti eŋwan, mma mfehe mbuba mi mma, mma nsɔŋɔ mmum mbuɔtidem ŋkama.

⁸Ema enim anyanya eti ido ebeŋe mi, emi Ɔbɔŋ, kpa Edinen Ebierikpe, edinɔde mi ke usen oro; idinyuŋ inɔŋɔ mi ikpɔŋ, edi eyenyuŋ ɔnɔ kpukpru mmɔ emi emade eriyarare Esie.

⁹Ŋwana nte ekekeme ndisɔp mbine mi.

¹⁰Koro Demas ɔmɔkpɔŋ mi, sia enye amade eyo emi odude ke emi, adaha ɔnyɔŋ ke Thessalonica; Crescens aka Galatia, Titus onyuŋ aka Dalmatia.

¹¹Luke kiet kpɔt odu ye ami. Da Mark ye idem fo di, koro enyeɔfɔn ye ami ke erinam ŋkpɔ nnɔ mi.

¹²Mmosio Tychicus ndɔŋ utom ke Ephesus.

¹³Ke adaŋemi afo edidide, da ɔfɔŋ-idem, eke ŋkɔkpɔŋde ke ubɔk Carpus ke Troas, ye ŋwed mi, akpan-akpan ŋwed ikpa, di.

¹⁴Alexander odom-utim akanam mi ibak eti-eti; Ɔbɔŋ eyesio enye usiene nte ekemde ye se enye akanamde.

¹⁵Kpeme idem ye enye, koro enye akaŋwanade eti-eti ye mme ikɔ mi.

¹⁶Akpa ini emi ndade ke itie-ikpe nnyaŋa idem, baba owo kiet idaha mi ke ŋkaŋ, kpukpru owo ema edianare enyɔŋɔ ekpɔŋ mi; Abasi okukam ada oro ekpe ikpe ye mmɔ.

¹⁷Edi Ɔbɔŋ adada mi ke ŋkaŋ, ɔsɔŋɔ mi esit nditiŋ ikɔ gospel ɔyɔhɔ-ɔyɔhɔ, man kpukpru mme Gentile ekop: ntem ke Enye anyaŋa mi osio ke inua lion.

¹⁸Ɔbɔŋ eyenyaŋa mi osio ke kpukpru idiɔk ndunam owo, eyenyuŋ ekpeme mi okosim Obio Ubɔŋ Esie ke heaven. Enɔ Enye ubɔŋ ke nsinsi-nsinsi. Amen.

¹⁹Kɔm Prisca ye Aquila, ye mbon ufɔk Onesiphorus.

²⁰Eratus ama ɔsuhɔ ke Corinth; edi ŋkɔkpɔŋ Trophimus ye unana-nsɔŋidem ke Miletus.

²¹Domo ukeme fo ndidi, ndien ukwɔ edisuk. Eubulus, ye Pudens, ye Linus ye Claudia, ye kpukpru nditɔ-ete enɔ ekɔm.

²²Ɔbɔŋ akpakam odu ye spirit fo. Mfɔn akpakam odu ye mbufo.