Read efik TITUS 2 Bible Online

TITUS 2 - efik bible

TITUS 2

¹EDI ama edi afo, tiŋ ikɔ eke ekemde ye eti ukpep-ŋkpɔ.

²Kpep ŋkani owo ete efara ke idem, etie uku-uku, enyene eti ibuot, enyuŋ ekop idem ke mbuɔtidem, ye ima, ye ime.

³Kpep ŋkani iban ŋko ete, esaŋa ke ido uteŋe, ekudi mbon ebiari, ekunyuŋ eyak mmin akan mmɔ,

⁴edi edi mme ɔnɔ nti item; man mmɔ eteme mkparawa iban ema ebe mmɔ,

⁵ema nditɔ mmɔ, enyene eti ibuot, enyene but, etie ke ufɔk enam ŋkpɔ, enyene mfɔn-ido, enyuŋ esuk idem enɔ ebe mmɔ; mbak ikɔ Abasi edidia esuene.

⁶Nyuŋ nɔ mkparawa iren item ete, enyene eti ibuot:

⁷Ke kpukpru usuŋ kama idem fo ke iso mmɔ nte uwut-ŋkpɔ eti utom; ke ukpep-ŋkpɔ, nɔ mmɔ akpanikɔ eke minyeneke mbiara,

⁸ye ekikere eke odobide, ye nti ikɔ eke owo mikemeke nditiŋ ndian; man but anam mmɔ emi ebiɔŋɔde nnyin, kemi mmɔ minyeneke se etiŋde edian nnyin.

⁹Nɔ ifin item ete, esuk idem enɔ mme ete mmɔ, enyuŋ enem mmɔ esit ke kpukpru usuŋ:

¹⁰Ekubɔrɔ mmɔ ikɔ, ekunyuŋ efai ŋkpɔ eda, edi ewut idem nte mbon akpanikɔ ke kpukpru usuŋ; man mmɔ enam ukpep-ŋkpɔ Abasi Andinyaŋa nnyin enyene uku ke kpukpru usuŋ.

¹¹Koro mfɔn Abasi ama ɔbiɔŋɔre edida erinyaŋa ɔsɔk kpukpru owo;

¹²onyuŋ ekpep nnyin ŋkpɔ, man oto do nnyin idianare ikpɔŋ idiɔk ido ye idiɔk udɔŋ ererimbot, idu uwem ke eti ibuot ye edinen ido ye ido Abasi ke eyo emi;

¹³inyuŋ itie ibet eti idori-enyin ye eriyarare Ubɔŋ Akwa Abasi ye Andinyaŋa nnyin Christ Jesus;

¹⁴Emi akayakde Idem Esie ɔnɔ kabaŋa nnyin, man Enye afak nnyin osio ke kpukpru mme idiɔk-ŋkpɔ, onyuŋ anam nnyin asak-ubɔk ikɔt Esie, emi isinde esit inam nti utom.

¹⁵Tiŋ ŋkpɔ emi, nyuŋ nɔ owo item, nyuŋ sua nɔ mmɔ nte ekekeme. Kuyak baba owo kiet ese fi ke ndek.