Read efik MME HEBREW 1 Bible Online

MME HEBREW 1 - efik bible

MME HEBREW 1

¹ABASI, emi akadade mme prophet etiŋ ikɔ mkpuhɔ-mkpuhɔ ye ke nsio-nsio usuŋ ɔnɔ mme ete nnyin ke eyo oko,

²ke ukperedem ini emi ama etiŋ ɔnɔ nnyin ke Eyen; emi Enye ekemekde onim, ete edidi andinyene kpukpru ŋkpɔ, okonyuŋ adade ubɔk Esie obot ekondo:

³Enye oro edi uyama ubɔŋ Abasi, ye ata mbiet Idem Esie, onyuŋ ada uyo odudu Esie omum kpukpru ŋkpɔ akama: ekem, ke Enye ama akama utom erinam owo esana ke mme idiɔk-ŋkpɔ, Enye ɔsuhɔre etetie ke ubɔk nnasia Andinyene-ubɔŋ ke enyɔŋ;

⁴Enye ama onyuŋ akabare okpon akan mme angel, adaŋa nte Enye akadade enyiŋ emi ɔfɔnde akan eke mmɔ enyene.

⁵Koro akananam Abasi ɔdɔhɔ angel ewe ete, Afo edi Eyen Mi Mmobon Fi mfin emi? Onyuŋ ɔdɔhɔ ete, Ami nyedi Ete Esie, Enye eyenyuŋ edi Eyen Mi?

⁶Ŋko, ke adaŋemi Enye editɔŋɔde ntak ada Akpan Esie edi ke ererimbot, Enye ɔdɔhɔ ete, Yak kpukpru mme angel Abasi enyuŋ etuak ibuot enɔ Enye.

⁷Enye onyuŋ ɔdɔhɔ abaŋa mme angel, ete, Enye anam mme angel Esie edi ofim, Onyuŋ anam mme asaŋutom Esie edi edeme-ikaŋ.

⁸Edi Enye ɔdɔhɔ abaŋa Eyen, ete, Ebekpo Fo, O Abasi, ebigi ke nsinsi; Mmɔnyɔ edinen ido edi mmɔnyɔ Ubɔŋ Fo.

⁹Afo amama se inende, onyuŋ asua se ikwaŋade; Mmɔdo Abasi, kpa Abasi Fo, adade aran idaresit eyet fi akan mme nsaŋa Fo.

¹⁰Ŋko, Ke eritɔŋɔ Afo, Ɔbɔŋ, okowuk isɔŋ ke itie esie, Enyɔŋ onyuŋ edi utom ubɔk Fo.

¹¹Mmɔ eyebe efep; edi Afo eyesuhɔ: Mmɔ kpukpru eyetaha nte ekura,

¹²Afo eyenyuŋ ofut mmɔ nte akwa ɔfɔŋidem, Nte ekura, ndien mmɔ eye-kpuhɔre: Edi Afo edi kpasuk Enye, Mme isua Fo idinyuŋ ikureke.

¹³Edi akananam Enye ɔdɔhɔ angel ewe ete, Tie ke ubɔk nnasia Mi, Tutu nnam mme asua Fo ekabare edi udorukot Fo?

¹⁴Nte mmɔ kpukpru idige mme spirit emi esaŋade utom, emi esiode edɔŋ mmɔ ete, enam ŋkpɔ enɔ mmɔ emi edidade erinyaŋa enyene?