Read efik MME HEBREW 11 Bible Online

MME HEBREW 11 - efik bible

MME HEBREW 11

¹NDIEN mbuɔtidem ɔwɔrɔ ete, nnyin itim ibure ifiɔk ite iyebɔ se nnyin idoride enyin ke esit, inyuŋ itim inim ite se idibede owo ke enyin odudu.

²Oto mbuɔtidem ekebuk eti mbuk ebaŋa mbiowo.

³Oto mbuɔtidem nnyin inim ite, ekeda ikɔ-inua Abasi ebot ererimbot; ntem ke ikadaha mme ŋkpɔ eke ewɔrɔde ewut idem ibot se ekutde ke emi.

⁴Oto mbuɔtidem Abel ada uwa eke ɔfɔnde akan eke Cain awa ɔnɔ Abasi, emi otode ke esit etiŋ ikɔ edian enye, ete, enye edi edinen owo; Abasi ke Idem Esie edi ntiense abaŋa enɔ esie; ndien oto do enye osuk etetiŋ ikɔ, okposuk edi nte enye ama akakpa.

⁵Oto mbuɔtidem emen Enoch edɔk ke enyɔŋ, man enye okukut mkpa; owo inyuŋ ikwe enye, sia Abasi ekemende enye ɔnyɔŋ; koro ke ini mimenke enye kaŋa idɔk ekedi ntiense ebaŋa enye ete, enye enem Abasi esit:

⁶edi ke mbuɔtidem miduhe, owo ikemeke ndinem Abasi esit; koro owo eke asaŋade ekpere Abasi enyene ndinim ete Enye odudu, onyuŋ edi Andinɔ mmɔ emi eyomde Enye utip.

⁷Oto mbuɔtidem Noah, sia Abasi ɔnɔde enye ntɔt abaŋa se enyin mikwe kaŋa, ke uteŋe Abasi, ɔkɔŋ ubom ndida nnyaŋa ufɔk esie; ndien ke erinam emi enye obiom ererimbot ikpe, onyuŋ akabare edi andinyene edinen ido eke asaŋade ye mbuɔtidem.

⁸Oto mbuɔtidem Abraham, ke adaŋemi ekotde enye, okop uyo Abasi, ete ɔwɔrɔ aka ke isɔŋ eke enye edidade nte udeme esie enye onyuŋ ɔwɔrɔ aka, ifiɔkke ŋkaŋ eke enye akade.

⁹Oto mbuɔtidem enye akabare edi oduduŋ ke isɔŋ emi Abasi ɔkɔŋwɔŋɔde ɔnɔ enye, nte owo adaŋ ke isɔŋ eke minyeneke enye; onyuŋ oduŋ ntre ke tent ye Isaac ye Jacob, emi etienede enye edi mme andinyene uŋwɔŋɔ oro:

¹⁰koro enye odoride enyin ke Obio eke enyenede nsɔŋɔnda, eke Andibɔp ye Andinam Enye edi Abasi.

¹¹Oto mbuɔtidem kpa Sarah ke idem esie ɔbɔ ukeme ndiyomo, ke ini enye ama ekebe ini uman, koro adade Enye emi ɔkɔŋwɔŋɔde uŋwɔŋɔ ɔnɔ enye ke anam-akpanikɔ:

¹²mmɔdo ndien ke idem owo kiet, emi etiede nte ukem-ukem ye akpa-mkpa, ediwak nditɔ ewɔŋɔ emana, ewak udim nte ntantafiɔŋ ke ikpa-enyɔŋ, enyuŋ ekak ibat nte ntan mben inyaŋ.

¹³Mmɔ emi kpukpru ekpaŋa ke mbuɔtidem; mmɔ ibɔhɔ se ekeŋwɔŋɔde enɔ mmɔ, edi eda nsan-nsan ekut, enyuŋ edara mme uŋwɔŋɔ oro, enyuŋ enyime ete mme imɔ idi isen owo ye oduduŋ ke isɔŋ.

¹⁴Koro mmɔ emi etiŋde oruk ikɔ emi eneŋere ewut ete, mme imɔ iyom isɔŋ idem mme imɔ.

¹⁵Ndien ke akpanikɔ, edieke mmɔ ekpesinde esit ke isɔŋ eke mmɔ eketode ke esit ewɔŋɔ, mmɔ ekpenyene ifet ndifiak nnyɔŋɔ.

¹⁶Edi ke emi mmɔ eyom isɔŋ eke ɔfɔnde akan, oro edi, isɔŋ eke odude ke heaven. Mmɔdo inamke Abasi but ndikere Abasi mmɔ; koro Enye ama ebeŋe Obio ɔnɔ mmɔ.

¹⁷Oto mbuɔtidem Abraham awa Isaac ke uwa, ke ini Abasi odomode enye ese; ŋkɔm enye, emi ɔkɔbɔde mme uŋwɔŋɔ ke idaresit, ɔmɔŋ ediwa ikpɔŋ-ikpɔŋ eyen esie;

¹⁸kpa Abraham, emi eketiŋde enɔ enye ete, Edikot ubon fo ke Isaac:

¹⁹sia okonim ete, Abasi ekeme ndisio enye ke otu mme akpa-mkpa nnam enye eset; ndien ke ido ŋke, enye okonyuŋ ɔtɔŋɔ ntak ɔbɔ enye ke mkpa ada.

²⁰Oto mbuɔtidem Isaac ɔdiɔŋ Jacob ye Esau abaŋa se ididide.

²¹Oto mbuɔtidem Jacob, ke ini enye ɔmɔŋ edikpa, ɔdiɔŋ nditɔ Joseph mbiba; onyuŋ ɔnuhɔ ke ibuot esaŋ esie okpono Abasi.

²²Oto mbuɔtidem Joseph, ke ini enye ɔmɔŋ edikpa, etiŋ abaŋa unyɔŋ nditɔ Israel, onyuŋ ɔnɔ uyo abaŋa mme ɔkpɔ esie.

²³Oto mbuɔtidem ete ye eka Moses edip enye ke ɔfiɔŋ ita ke ini enye amanade, koro mmɔ ekutde ete enye edi ediye eyen;

²⁴mmɔ inyuŋ ifeheke ewuhɔ edidem. Oto mbuɔtidem Moses, ke ini enye ama okopon, esin ndikere eyen adiaha Pharaoh;

²⁵sia Enye emekde ndibiom ukut ye ikɔt Abasi, akan ndidia inemesit idiɔk-ŋkpɔ ke ekpri ini:

²⁶enye onyuŋ abat esuene Christ nte inyene eke okponde akan ŋkpɔ uto Egypt: koro enye owukde enyin ese utip eke edinɔde enye.

²⁷Oto mbuɔtidem enye ɔwɔrɔ ɔkpɔŋ Egypt, ifeheke iyaresit edidem; koro enye ɔsɔŋɔde ada nte ŋkpɔ eke okutde Enye emi enyin owo mikwe.

²⁸Oto mbuɔtidem enye onim passover ye erisime iyip, mbak andisobo akpan edituk mmɔ.

²⁹Oto mbuɔtidem mmɔ esaŋa ke Ididuot Inyaŋ ebe, nte owo ebe ke edisat isɔŋ; ndien, ke ini mbon Egypt edomode ndinam kpasuk ntre, mmɔ esomo ke mmɔŋ.

³⁰Oto mbuɔtidem ibibene Jericho owure, ke nditɔ Israel ema ekanare enye ekuk usen itiaba.

³¹Oto mbuɔtidem Rahab, ŋwan akpara oro, etre nditiene mmɔ oro edide mbon ntut-utɔŋ mbuana ke nsobo, sia enye akadade mbon-uyep esin ke ufɔk ke emem.

³²Ndien nso ke ndidɔdɔ mbe emi? Koro ini ididuhe ami ndibuk mbuk Gideon, ye Barak, ye Samson, ye Jephthah, ye David, ye Samuel,

³³ye mme prophet; emi ekedade mbuɔtidem ekan mme idut, enam edinen ido, ebɔ mme uŋwɔŋɔ, ekibi mme lion inua, enime ide ikaŋ,

³⁴ebɔhɔ iso ofut, ewɔŋɔ ekpɔŋ mmem-idem ekabare ekop idem, ewɔŋɔ edi uko ke ekɔŋ, enyuŋ enam udim-ekɔŋ mme idut efeŋe.

³⁵Iban ebɔ mme akpa-mkpa ke eriset ke mkpa; mmɔ eken ekut ndutuhɔ, inyuŋ inyimeke ndibɔhɔ, man mmɔ ekpenyene eriset ke mkpa eke ɔfɔnde akan.

³⁶Mmɔ efen ekut idomo oto nsahi ye ufen ye ŋkpɔkɔbi ye ufɔk-ŋkpɔkɔbi ŋko;

³⁷etɔŋɔ mmɔ ke itiat, eyɔk mmɔ esibe mbio iba, edomo mmɔ, ewot mmɔ ke efut: mmɔ oro esine ikpa-erɔŋ ye ikpa-ebot eduyo;

³⁸mmɔ enana ŋkpɔ, ekut ukut, ebɔ ndutuhɔ (edi ererimbot idotke mmɔ); mmɔ esaŋa eyo ke desert ye obot, ye obube, ye aba itiat isɔŋ.

³⁹Etiŋ ŋkpɔ etuk kpukpru mmɔ kabaŋa mbuɔtidem mmɔ; edi mmɔ ikɔbɔhɔ se Abasi ɔkɔŋwɔŋɔde ndinɔ mmɔ;

⁴⁰sia Abasi okonimde se ifɔnde ikan ɔnɔ nnyin; ntem ke ikemeke ndinam mmɔ efɔn ema ke nnyin miduhe.